Read Mousgoum Piɵi 21 Bible Online

Piɵi 21 - Mousgoum bible

Piɵi 21

¹Pai n’Arad ɗa a ɗif na Kanaaniya, a sumna war Negev. A ɵina ɓa aliɗi Izrayel e ɗa hilisi warɗi futi n’Atarim par ɗaw? Nɵa a hitimiɗi, a yima zamai arbaɗi par aŋ bagakai.

²Aliɗi Izrayel e miɗini wiini EPIƊ-ƊAI maini nɵa: Na ɓa ku siɗiyi li ɗai hanɗa war tiyi ɗa, fuŋ n’abakai aga mi tûûriŋ edi marwai.

³EPIƊ-ƊAI a ɵina miɗi ɗai na Izrayel, a siɗi Kanaaniyakai war tiɗi. Aliɗi Izrayel e fiɗiɗi edi, e tûûri fuŋɗi n’abakai edi lai. E ɵini yiki wiini hlai hanɗa ɓa: Hormo, a dara muɗa: ɓilki n’edi.

⁴Aliɗi Izrayel e fikiɗi siɗi huwuŋ na Hor ɗa par, e tikiti futi n’agoɗom wulaom ɗa ɗawni yem ra n’abai zi vayai sek ɗa kapai e vigi edi sini afti na Edom ɗa ɗaw. Amma won hlai n’e ɗa hili edi warni basga na kaɗataŋ ɗa, e siɗi wala n’e zi ɗa kir kai.

⁵Ɗai na Izrayel e tiki piɗi e miɗi meefeŋ sini Alaw gaini Musus, e miɗi: Tiki ki miliyisi edi war Egipte par tiɓ buri maɗa? Ki kiyisi na ɗa aŋ mri edi war basga na kaɗataŋ na ɗi? Peŋ won na kai, yem kai, simi na hihir hanɗa mal ɗa a baza miyi ta.

⁶Nɵa EPIƊ-ƊAI a ɵinasi wala meefeŋ zi masnaw midiɗi aliɗi Izrayel. A limiɗi, ɗai na Izraye e mri viya.

⁷Ɗai e hilisi sini Musus e miɗini: Tiyi mi zi tuwur, mi miɗi meefeŋ sini EPIƊ-ƊAI, suku tuku lai. Siiwa EPIƊ-ƊAI kapai a birga wala meefeŋ zi masnaw hanɗa edi arbayi par. Musus a siiwa buriɗi.

⁸EPIƊ-ƊAI a miɗini wiini Musus: Za wala meefeŋ zi masnaw ktai gaini kiya, ku hag'aŋ amai sini luwuŋ, asiya ɗi paŋ na wala meefeŋ a lumaŋ li, n’a mula arni li amai sini ɗa, a mra kir kai.

⁹Musus a za wala meefeŋ zi kiya, a hag'aŋ amai sini luwuŋ. A siya ɗi paŋ na wala meefeŋ a lumaŋ li, n’a mula arni li amai sini ɗa a mra kir kai.

¹⁰Aliɗi Lzrayel e hli, e pi a Obot.

¹¹E fikiɗi a Obot par, e hili e pi a Iye-Abarim edi war basga na kaɗataŋ, n’a na wuzaɗi Mowab war gal na piɗi futi na dawai par.

¹²Woni par e fiki e hili e pi agoɗom wulani yem zi ki na Zered.

¹³A Zered par e hili e pi anene duɓani ra Arnon n’a naka edi war basga na kaɗatan, na pini aŋsi midini afti na wiiɗi Amoritekai par su, buri ɓa ra Arnon ɗa a haga n’arbani afti n’arbani afti na wiiɗi Amoritekai gaini na wiiɗi Muwabitekai.

¹⁴Buri nɵa, a ɗo war maktuŋ na wiini gaw na wiini EPIƊ-ƊAI maini nɵa: Fuŋ n’abai na Vaheb, gaini arakaini, miini afti na Sufa, Ra Arnon

¹⁵Gaini arakaini, n’a vuga haa sini fuŋ n’abai na Ar, haga na wiini afti na Muwab.

¹⁶Woni par e hili a Beer a dara a muɗa: kalaŋ. A kalaŋ n’EPIƊ-ƊAI a miɗini wiini Musus gaini ɓa: Tipiɗisi ɗai kapai mu siɗi yem e ci ɗa.

¹⁷Aliɗi Izrayel e zini yama burini kalaŋ hanɗa ɓa: Ɗuulumu gaini firiyi, yem a naɓasi li azumai war kalaŋ par.

¹⁸A kalaŋ n’abakaiɗi ɗai e hûdiŋ ɗa, e ɓiliŋ gaini amaraŋa n’e ɵi wuze gaini, gaini amaraŋa zi pai na wiiɗi lai. Edi war basga na kaɗatan par, aliɗi Izrayel e hili war fuŋ n’abai na Mattana.

¹⁹A Mattana par, e fki e hili a Nahaliyel, a Nahaliyel par a Bamot.

²⁰A Bamot par e hili war huduk na midini afti na Mowab amai merfeŋɗi huwuŋ Pisga, midiɗi huwuŋ hanɗa par arku edi midini basga na kaɗataŋ kafa.

²¹Aliɗi Izrayel e ɵini ɗai sini Siho pai na wiiɗi Amoritekai, e miɗini maini nɵa:

²²Tiyi mi firiyi mi vigiɗi midini aftiku ɗaw, mi niyi edi war vuwai kaalai, war zardeŋ zi vin kaalai, mi ci yem na war kalaŋki kaalai. Mi tikiti te futi n’amai ɗa ɵa cir, haa mi vigi edi midini aftiku par.

²³Amma Sihon a dara a siɗi futi buri e vigi midini aftini kai. A tipiɗi ɗai na wiini, e niyisi edi miɗi aliɗi Izrayel war basga na kaɗataŋ, war fuŋ n’abai na Yahas, a faka aŋ hitimiɗi.

²⁴Aliɗi Izrayel e fiɗiɗi edi gaini kaɵkar sini ra Arnon par haa sini ra Yabok, haa sini haga na wiiɗi Ammonitekai ta, buri ɓa haga na wiiɗi Ammonitekai a nafu gaini ɵaga.

²⁵Aliɗi Izrayel e mili fuŋ n’abakai na wiiɗi Amoritekai kafa, e simni warni fuŋ n’abakai hanɗa, war Hebron gaini fuŋ na piɗi paŋ.

²⁶Buri ɓa Hebron te kapital na Sihon, pai na wiiɗi Amoritekai a sumna warɗi, a hitima gaini pai na Mowab n’a naka war hlai ni ɗa, a tika afti haa sini ra Arnon ta.

²⁷Buri hanɗa, ɗai n’e ɗû seŋ, e miɗi maini nɵa: Hilisi a Hebron, Rgi fuŋ n’abai na wiini pai Sihon ɗa amai, ziziniŋ war ezini n’avut!

²⁸Buri ɓa afu a niyasi edi war Hesbon par, alesni afu war fuŋ n’abai na wiini Sihon par, a ya fuŋ n’abai na Ar midini afti na Mowab, a yiɗi na jrekai kai midini boŋorai na Arnon.

²⁹Haw gara burku Mowab, ɗai na wiini Kemos ki bi li, ɗai na maɵagai n’e hini gaiɗi na falakai a siɗi aŋ bagakai war tini Sihon pai na midiɗi Amoritekai.

³⁰Tiy mi vidiɗi edi gaini ɓaraw, a Hesbon par haa a Dibu ta, -haa a Nofa, na te na gobi gaiɗi Madba ta, mi giɵi hlai azumai kafa.

³¹Aliɗi e simni midini afti na wiiɗi Amoritekai ɗa maini hanɗa ɵa.

³²Musus a ɵina ɗai aŋ tilisi fuŋ n’abai na Yaser. E mili fuŋ na pini ɗa lai. E birgiɗi Amoritekai na woni ɗa edi.

³³Asakal par e tikiti futi na Basan. Og, pai na Basan a niyasi edi miɗi gaiɗi ɗai na pini paŋ aŋ hitimiɗi war Edrey.

³⁴EPIƊ-ƊAI a miɗini wiini Musus: Ku hunaŋ kai, aga mu saŋ war tuku, ni gaiɗi ɗaini, gaini aftini paŋ. Aga ku za sini maini na ku zaŋ sini Sihon, pai na wiiɗi Amoritekai n’a sumna war Hesbon ɗa ɵa.

³⁵E rɗi amai midini, ni gaiɗi alini gaiɗi ɗai na pini paŋ, e hini ɗif ktai maa piɗi karni kai, e tiki futi na wiini lai.