Read Mousgoum Piɵi 23 Bible Online

Piɵi 23 - Mousgoum bible

Piɵi 23

¹Balaam a miɗini wiini Balak. Rgaŋa gûwiŋ zi ɓaka muguzak war hlai hanɗa, ki piyiŋasi garakai muguzak, adumai na maɵagai muguzak lai.

²Balak a za maini na Balaam a miɗini nɵa, Balak gaini Balaam e zi ɓaka zi yi midini gûwiŋ zi ɓaka, midini gûwiŋ paŋ e fiɗi ktai lai, adime ktai lai.

³Balaam a miɗini wiini Balak: Yika ɵimani ɓakaku zi yi ɗa zaw, ta aga mu yima sa edi agwi, ablaŋtaŋkai ɗa, EPIƊ-ƊAI a kiɗa a halasi a nava gaya ɗi ɗa, nɵa wala n’a muɗaŋa li ɗa, aga mu muɗuŋku. A niya amai midini boŋor na wala a diya midini kai.

⁴Alaw a halasi a nava gaini Balaam a miɗini: Mu zizinasi gûwiŋ zi ɓaka aŋsi muguzak, gûwiŋ paŋ ɗa, mu zasi ɓaka midini gaini gari ktai lai, adime ktai lai.

⁵EPIƊ-ƊAI a wiini seŋ ktai war mini Balaam a miɗini: Waya sini Balak, ku miɗini maini n’a na ɗa ɵa.

⁶A waya seŋ sini Balak, Balak a nafu ɵimani ɓakani zi yi ɗa zaw, abakaiɗi ɗai na Mowab gaini ca lai.

⁷Balaam a tika pini aŋ muɗa seŋ maini nɵa: Balak a yikaŋasi war Siriya par, pai na Mowab a yikaŋasi sini hlai zi huwuŋ na piɗi dawai par ɓa: Halasi tûûsiɗiŋa ɗai na Izrayel ɗa, halasi glasi hiy na wiini EPIƊ-ƊAI midini pnzibani Yakob.

⁸Ɗif n’Alaw a tuusaŋ kai ɗa, ta mu tuusaŋ ɗa maɵa maɵa ɗa? Pinziba n’EPIƊ-ƊAI a za hiy sini kai ɗa, ta mu za hiy sini ɗa maɵa maɵa ɗa?

⁹Won hlai na mu talaŋɗi amai par merfeŋni huwoŋai, mu talaŋ amai par midini boŋorai ɗa, a pini ziba na kiini ta ni lai a sɗa sini ɓa a na maini pinziba na zamai ɗa kai.

¹⁰Ɗif n’a kiɗa a pɵa pinzibaɗi Izrayel ɗa a asiya ɗa? Ɗai na war pinzibani Yakob ɗa e sûwi viya gara maini alogodo nɵa, a kiɗa aŋ piɵiɗi ɗa a siya ɗa? Marya mu mra maiɗi ɗai n’e ɵini mini Alaw ɵa, mu mra ɗa maiɗi nagai nɵa lai.

¹¹Balak a miɗini wiini Balaam: Ku zaŋa ɵa ɗa a maŋ Mu yikukusi ɓa, ku tûûsiɗi gawŋa ɗa, amma tuku ku ɓikiɗi gaini ɓiki.

¹²Balaam a wiyini seŋ: Aga mu muɗuku ɗa a seŋ n’EPIƊ-ƊAI a waŋ war ma aŋ muɗuŋku ɗa kai ɗi?

¹³Balak a miɗini wiini Balaam: Za barka halasi gaya, war hlai zamai. Won na par ɗa ku tala na ɗa a gal n’agwi kadai. Hlai na mu hulumu won na ɗa, aga ku tiliɗi gaini hlaiɗi. Woni par aga ku tûûsiɗiŋa.

¹⁴A kaŋ amai merfeŋni huwuŋ Pisga, won hlai na ɗai zi gɗam e ɗiyi woni ɗa. A rga gûwiŋ zi ɓaka muguzak. Midini gûwiŋ paŋ a fuɗa gari ktai lai, adime ktai lai aŋ ɓaka zi yi.

¹⁵Balaam a miɗini wiini Balak: Ɗiya ka ɵimani ɓakaku zi yi ɗa zaw, ta mu hala mu navasi gaini EPIƊ-ƊAI ca.

¹⁶EPIƊ-ƊAI a halasi a nava gaini Balaam, a wiini seŋ ktai war mini Balaam a miɗini: Waya sini Balak ku muɗini maini n’a na ɗa ɵa.

¹⁷A waya sini Balak. Balak a nafu ɵimani ɓakani zi yi ɗa zaw, abakaiɗi ɗai na Mowab gaini ca lai. Balak a zilbaŋ: EPIƊ-ƊAI a muɗasi maɵa maɵa ɗa?

¹⁸Balaam a tika pini aŋ miɗini maini nɵa: Balak, faka amai zuɓura, zaga ɵemaku mini seŋ n’aga mu muɗuŋku ɗa, ahini Sippor.

¹⁹Alaw a ɗif kai, a kiɗa a muɗa eles kai, a bunda hiinini maini ɗif murɗek ɵa kai,

²⁰Ta mu vara ɓa mu ɓikiɗi ɗai hanɗa, buri ɓa Alaw a ɓikiɗi ta. Ta mu kiɗa mu bunda hiinini kai.

²¹EPIƊ-ƊAI a tala wala na meefeŋ sini pini zibani Yakob ɗa kai, a tala gir siɗi ɗai na Izrayel ɗa kai, Epiɗ-ɗai Alaw na wiiɗi a na arbaɗi, e ɵiɓi tiɗi, e ciryi pini lai maini pai ɵa.

²²Alaw a miliɗisi edi war Egipte par gaini spak n’abai gara maini spakni hiluw nɵa.

²³Ɗai n’e tili wala na wuze war pinzibani Yakob e ɗi kai, ɗai n’e zi wazagai zi hiila aha warɗi Izrayel e ɗi kaalai. Amma sda n’Alaw a dara a zaŋ ɗa a miɗiŋɗi wiiɗi pinzibani Yakob gaiɗi Izrayel war sartini.

²⁴Ɗai hanɗa e fiki li sini wala ɗa maiɗi gurnai na muni nɵa, e fiki li aŋ birgi wala ɗa, maini gurnai na wus ɵa, maini gurnai n’a luma wala n’a yimaŋ ɗa kai, a ca felni kaalai ɗa a fana azumai kai ɗa ɵa.

²⁵Balak a miɗini wiini Balaam: Na ɓa ku tûûsiɗi a tuusa kai ɗa, ku ɓikiɗi kaalai.

²⁶Balaam a wiyini seŋ: Mu muɗuku ya ɓa: N'EPIƊ-ƊAI a muɗaŋ li ɗa, aga mu za ɗa a ni kaa.

²⁷Balak a miɗini wiini Balaam. Za barka, halasi gaya, mu kuku war hlai zamai, ablaŋtaŋkai, woni par ɗa Alaw aga a za ha ɓa ku tûûsiɗiŋa ɗi ɗa!

²⁸Balak amai merfeŋɗi huwuŋ Peyor, n’amai midiɗi par arku edi midini basga na kaɗataŋ ɗa par.

²⁹Balaam a miɗini wiini Balak: Rgaŋa gûwiŋ zi ɓaka muguzak, ku payaŋa garakai muguzak gaini adumai na maɵagai muguzak lai.

³⁰Balak a za wala na Balaam a miɗini gaini ɗa. A za ɓaka zi yi midini gûwiŋ zi ɓaka paŋ gaini gari ktai ktai, adime ktai ktai lai.