Read Mousgoum Piɵi 27 Bible Online

Piɵi 27 - Mousgoum bible

Piɵi 27

¹Nɵa Mahla, Nowa, Hogla, Milka gaiɗi Tirsa lai e ɗi alini Selofad na falakai. Selofad ni ɗa a ahini Hefer n’ahini Galaad, n’ahini Makir, n’ahini Manase, n’ahini Yosef.

²E hilisi wuzani Musus gaini pai zi ɓaka Eleyazar gaiɗi abakaiɗi ɗai, gaiɗi aliɗi Izrayel na doogo paŋ lai, mini gumu n’e nivi gaini EPIƊ-ƊAI woni, e miɗi:

³Epiyi ɗa a mrasi edi war basga na kaɗataŋ, a nafu arbaɗi ɗai na pini Kore, n’e fiki amai sini EPIƊ-ƊAI ɗa kai, a mra buri tuwur na wiini gaini midini, a wa ahi na wus kai.

⁴Kapai yikini apiyi ɗa a haza wiini edi arbaɗi ɗai na war piɗi humunini par buri ɓa a wa ahi na wus kai ɗa ɗi? A za kai; siyi bulum wiyi tiyi arbaɗi tawalakaini apiyi ɗa lai.

⁵Musus a ka seŋɗi ɗa wuzani EPIƊ-ƊAI.

⁶EPIƊ-ƊAI a miɗini wiini Musus: Alini Selofad ɗa, seŋɗi a futini, ku siɗi hlai aŋ bulum arbaɗi tawalakaini epiɗi ta, bulum na wiini epiɗi ɗa, ku siŋɗi wiiɗi.

⁸Ku miɗiɗi wiiɗi aliɗi Izrayel ɗa ɓa: Na ɓa ɗif n’ahini na wus aŋ kai a mra li ɗa, bulumni ki siŋɗi wiiɗi ahini na muni.

⁹Na ɓa ahini na muni t'aŋ kaalai ɗa, ki siŋɗi wiiɗi tawalakaini.

¹⁰Na ɓa tawalakaini e ɗi kai ɗa, ki siŋɗi wiiɗi tawalakaini epini,

¹¹Na ɓa tawalakaini epini e ɗi kai ɗa, ki siŋi wiini zigelni na piɗi humunini tar ɗa, a mula bulum ɗa a ɗif hanɗa. Wala hanɗa a hina aŋ gadai buriɗi aliɗi Izrayel, maini n’EPIƊ-ƊAI a miɗiŋni wiini Musus ɗa nɵa.

¹²EPIƊ-ƊAI a miɗini wiini Musus: Niya amai midiɗi huwuŋ Abarim, tala afti n’aga mu siŋɗi wiiɗi aliɗi Izrayel ɗa.

¹³Aga ku talaŋ, amma, tuku lai aga ku mra, ku hala gaiɗi tiyakaiku maini Aaron na tawalku nɵa lai.

¹⁴Buri ɓa tiki ɗa, edi war basga na kaɗataŋ na Sin ɗa, ki ɵini ma kai, won hlai n’aliɗi a doogo e piyiŋa ma ɗa, tiki ki siŋkiɗi wiiɗi aliɗi Izrayel ɓa Alaw na jre ɗa muta, ki siŋkiŋa edi ɵa kai, won hlai n’e ɗa piyi yem ɗa. Alaw a muɗa na ɗa gaini yem na Meriba, gaini yem zi "hiy" na war Kades, n’edi war basga na kaɗataŋ na Sin.

¹⁵Musus a miɗini wiini EPIƊ-ƊAI: A pɗem ɓa EPIƊ-ƊAI, Alaw n’a sa suŋfa war wazagai zi rgi paŋ a vara ɗif ktai n’aga a ɵa wuzaɗi aliɗi Izrayel na doogo ta.

¹⁷Ɗif n’a kiɗa aŋ wuzaɗi hlai paŋ, woɗi paŋ, kapai ɗaiku e hini bar maini farani farai na ɗifni zi gɗam aŋ kai nɵa kai.

¹⁸EPIƊ-ƊAI a miɗini wiini Musus: Yima Yosva n’ahini Nun ɗa, a ɗif na sezeŋa aŋ midini, ku tika tuku midini.

¹⁹Ku ɗiyaŋ wuzani pai zi ɓaka Eleyazar gaiɗi aliɗi Izrayel na doogo ɗa, ku sini gadai wuzani arɗi.

²⁰Ku sini pini spakku par, kapai aliɗi Izrayel e ɵini pini.

²¹Aga a za sda wuzani pai zi ɓaka Eleyezar, a zilba dirini Alaw gaini Urim buri ni a pai zi ɓaka ɗa. Yosva gaiɗi aliɗi Izrayel na doogo paŋ aga e ɵini pini hlai paŋ, woɗi paŋ.

²²Musus a za maini n’EPIƊ-ƊAI a miɗiŋni nɵa. A yima Yosva, a ɗiyaŋ wuzani pai zi ɓaka Eleyazar gaiɗi aliɗi Izrayel na doogo paŋ.

²³A mula tini midini, a sini gadai maini n’EPIƊ-ƊAI a muɗaŋ war mini Musus ɗa nɵa.