Read Mousgoum Piɵi 28 Bible Online

Piɵi 28 - Mousgoum bible

Piɵi 28

¹EPIƊ-ƊAI a miɗini wiini Musus: Siɗi gadai hanɗa wiiɗi aliɗi Izrayel. Ku miɗiɗi ɓa e zi hangal gaini ɓakaŋa n’e siŋŋa ɗa. Won hlai n’e dirir e siŋa simi na wiya, zaw e ziŋa ɓaka n’e yiŋ edi gaini afu, zaw e yi wala na lugosni a ɵiɗiti agula azumai, e ziŋ ɗa war sartini n’aŋ gai ɗiyi ta ta ɗa, pin gadaini lai.

³Ɓaka n’e yiŋ edi gaini afu burini EPIƊ-ƊAI, aga a za ɗa mai hanɗa nɵa: Yivai paŋ, ki kiŋasi alini adumai sulu, na buza ɗaw ɗaw, na tirki sini kai, ki ziŋa ɓaka zi yi gaini. Ɓaka hanɗa, ki ziŋ yivai paŋ ɵa kûreɗ kûreɗ.

⁴Ahini adime na ktai ɗa ku za ɓaka gaini gorof par, na ktai ɗa futi te nawa sek ɗa lai.

⁵Ɓaka na gaini ali-seyem ɗa, ki kisi avdi kilo hu n’e hiɗɗiŋ gaini emel na gai futini litir ɗaw gai gal.

⁶Hanɗa a ɓaka zi yi n’a za mefeŋ mefeŋ paŋ, maini n’a zasi amai midiɗi huwuŋ Sinai ɗa ɵa. A ɓaka n’EPIƊ-ƊAI a firya lugosni gara, n’e yiŋ edi gaini afu burini EPIƊ-ƊAI lai.

⁷Ahini adime paŋ ɗa e kisi vin pini litir ɗaw gai gal, e miŋ azumai aŋ ɓaka war hlai na sɗik na wiini EPIƊ-ƊAI lai.

⁸Ahini adime n’ag'an sulu ɗa, ku za ɓaka gaini won hlai na futi te nawa sek ɗa lai. Ku za ɓaka na gaini ali seyem gani vin na pini ɗa maini na gorof par ɵa lai. Hanɗa a ɓaka n’e yiŋ edi gaini afu burini EPIƊ-ƊAI aŋ wala n’EPIƊ-ƊAI a firya lugosni gara.

⁹Yivai na wiini Sabbat ɗa, ki kiŋasi alini adumai sulu na buza ɗaw ɗaw, na tirki sini kai, aŋ ɓaka na gaini ali seyem ɗa, ki kisi avdi kilo ɵaara, n’e hiɗɗiŋ gaini emel na gai futini gaini ɓaka zi vin na pini ɗa lai.

¹⁰Hanɗa a ɓaka zi yi na wiini yivai na wiini Sabbat ɗa. Sabbat paŋ a za mai hanɗa ɵa. A tika sini na war yivai ta lai, gaini ɓaka zi vin na pini ɗa lai.

¹¹War mefeŋ n’avuti na wiini tile paŋ ɗa, ki zi ɓaka zi yi wiini EPIƊ-ƊAI gaini garakai sulu, adime ktai, alini adumai na buza ɗaw ɗaw muguzak lai. Wazagai hanɗa paŋ tirki sini kai,

¹²avdi n’e hiɗɗiŋ gaini emel na gai futini aŋ ɓaka na gaini alini-seyem kilo ɵeeŋe midini gari paŋ, kilo ɵaara midini adime paŋ,

¹³kilo hu midini ahini-adime paŋ lai. Hanɗa a ɓaka zi yi, a wala n’EPIƊ-ƊAI a firya lugosni gara, a ɓaka n’e yiŋ edi gaini afu burini EPIƊ-ƊAI lai.

¹⁴Ki si vin pini aŋ ɓaka lai. Gari paŋ ɗa, ki si litir hu, adime paŋ ɗaki si litir sulu, ahini adime paŋ ɗa litir ɗaw gai gal lai, hanɗa a ɓaka zi yi n’a sa war tile ɗa. A za tile tile paŋ haa buza te vada ɵa.

¹⁵Ki zi ɓaka zi yi gaini yek ktai wiini EPIƊ-ƊAI, buri hinini tuwur, a tika sin ɓaka na mefeŋ mefeŋ paŋ gaini ɓaka zi vin na pin ɗa lai.

¹⁶War mefeŋ n’ag'aŋ doogo pi puɗu na wiini tile n’avut ɗa, te fet na wiiii Paska.

¹⁷War mefeŋ n’ag'aŋ doogo pi ɵim ɗa te fet na te za kasku ɗa. War mefeŋ na muguzak hanɗa, ɗif a luma peŋ na gaini is arni ɗa kai.

¹⁸War mefeŋ n’avut ɗa, diŋgi na sɗik a za, ki zi sda zi kayai war mefeŋ hanɗa kai.

¹⁹Aga ki zi ɓaka zi yi wiini EPIƊ-ƊAI gaini garakai sulu, adime ktai, alini-adumai na buza ɗaw! ɗaw muguzak lai. Wazagai hanɗa paŋ a wazagai zi ɓaka na tirki sini kai.

²⁰Ɓaka na gaini ali-seyem na midini ɗa, a na maini nɵa: Avdi n’e hiɗɗiŋ gaini emel na gai futini kilo ɵeeŋe midini gari paŋ, kilo ɵaara midini adime paŋ,

²¹kilo hu midini ahini adime paŋ lai.

²²Ki zi ɓaka zi yi gaini yek ktai wiini EPIƊ-ƊAI buri hinini tuwur na wiiki.

²³Ɓaka hanɗa paŋ ɗa, a tika sini ɓaka zi yi n’e ziŋ gorof par gorof par mefeŋ paŋ ɗa.

²⁴Aga ki ziŋ mai hanɗa ɵa mefeŋ mefeŋ paŋ, haa mefeŋ muguzak aŋ ɓaka n’e yiŋ edi gaini afu, aŋ wala n’EPIƊ-ƊAI a firya lugosni gara. A tika sini ɓaka na mefeŋ mefeŋ paŋ, gaini ɓaka zi vin na pin ɗa lai.

²⁵War mefeŋ n’ag'aŋ muguzak ɗa, diŋgi na sɗik a za pra, ki zi sda zi kayai war mefeŋ hanɗa kai.

²⁶mefeŋ na wiini hiɗini seyem n’avut, won hlai n’aga ki zi ɓaka wiini EPIƊ-ƊAI gaini seyem na hehe, war fet na wiini hiɗi na wiiki ɗa, aga ki yiki diŋg na sɗik. aga ki zi sda zi kayai war mefeŋ hanɗa kai.

²⁷Aga ki ziŋa ɓaka zi yi gaini garakai sulu, adime ktai, alini adumai na buza ɗaw ɗaw muguzak lai, aŋ wala n’EPIƊ-ƊAI a firya lugosni gara.

²⁸Ɓaka na gaini alini-seyem na midini ɗa aga a za maini nɵa: avdi n’e hiɗɗiŋ gaini emel na gai futini kilo ɵeeŋe midini gari paŋ, kilo ɵaara midini adime paŋ,

²⁹kilo hu midini ahini adime paŋ lai.

³⁰Ki zi ɓaka gani yek ktai wiini EPIƊ-ƊAI burini hinini tuwur na wiiki lai.

³¹Ɓaka hanɗa a tika sini ɓaka zi yi n’e ziŋ mefeŋ mefeŋ paŋ gaini ɓaka na gaini ali-seyem na midini lai. Ki zi ɓaka ɗa gaini wazagai na tirki sini kai gaini ɓaka zi vin na pini ɗa lai;