Read Mousgoum Piɵi 3 Bible Online

Piɵi 3 - Mousgoum bible

Piɵi 3

¹Pinzibani Aaron gaini Musus war sarti n’EPIƊ-ƊAI a muɗa gaini Musus amai midiɗi huwuŋ Sinai ɗa a na maini nɵa:

²Yikiɗi alini Aaron ɗa a na maini nɵa, n’abai ɗa yikini ɓa: Nadab, na zamai ɗa a Abihu, Eleyazar gaini Itamar lai.

³Hanɗa a yikiɗi alini Aaron na paakai zi ɓaka, n’e mi emel n’e tiki ɗai war sda gaini midiɗi, n’e miliɗi war sda zi paakai zi ɓaka.

⁴Nadab gaini Abihu e nivi mri wuzani EPIƊ-ƊAI edi war basga na kaɗatan na Sinai, buri e kisi afu na kadai war Gûwiŋ zi ɓaka. E mri ɗa aliɗi kai, e hini e zi sda zi paakai zi ɓaka ɗa a Eliyazar gaini Itamar, Aaron n’epiɗi a talaŋ tiɗi.

⁵EPIƊ-ƊAI a miɗini wiini Musus:

⁶Ku yikiɗisi pin i zibani Levi ɗa, ku tipiɗi gaini Aaron kapai e zi sda gaini.

⁷Aga e zi ɵeŋni lai, e zi ɵeŋɗi vokɗi Izrayel na doogo mini Gumu n’e nivi gaini EPIƊ-ƊAI warni lai, e zi sda na sini Gumu n’e nivi gaini EPIƊ-ƊAI warni ɗa paŋ.

⁸Gɗamni wazagai n’e zi sda gaini amlai war Gumu n’e nivi gaini EPIƊ-ƊAI warni aŋ war tiɗi, e zi ɵeŋ na wiiɗi aliɗi Izrayel ɗa lai, kapai sda na wiini Gumu n’enivi gaini EPIƊ-ƊAI warni ɗa a va amai.

⁹Aga ku siɗi Levitekai wiini Aaron gaiɗi alini, aliɗi Izrayel paŋ aga e siɗini aŋ znaini jre jre.

¹⁰Aaron gaiɗi alini ɗa ku miliɗi war sdaɗi zi paakai zi ɓaka, ɗif zamai n’a za sda hanɗa li, na ɓa a pai zi ɓaka kai ɗa, a nava fiɗi n’edi.

¹¹EPIƊ-ƊAI a miɗini wiini Musus:

¹²Tala, mu viriɗi Levitekai arbaɗi aliɗi Izrayel par eziɗi ali n’e wii avut aha warɗi Izrayel ɗa paŋ, Levitekai ɗa e ɗi wiya.

¹³Buri ɓa ahi n’a wa avut paŋ ɗa a wiya, mefeŋ na mu fiɗiɗi aliɗi ɗai n’Egipte n’e wii avut ɗa, mu ziɗi aliɗi Izrayel n’e wii avut ɗa aŋ wiya, aliɗi n’e wii avut gaini alini farai ɗa paŋ a wiya, EPIƊ-ƊAI ɗa muta.

¹⁴Edi war basga na kaɗatan na Sinai ɗa, EPIƊ-ƊAI a miɗini wiini Musus:

¹⁵Ku piɵiɗi pinzibani Levi ɗa piɗi pakatai pakatai, piɗi humuni humuni. Ku piɵiɗi aliɗi na maɵagai ɗa n’e zi tile ɗaw par ta amai sek ɗa paŋ.

¹⁶Musus a piɵiɗi pini miɗi na wiini EPIƊ-ƊAI maini n’a gdaŋ ɓa a zaŋ ɗa nɵa.

¹⁷Yikiɗi alini Levi ɗa a na maini nɵa: Gerson, Kehat gaini Merari.

¹⁸Yikiɗi alini Gerson, piɗi humuniɗi humuniɗi, a na maini nɵa: Lini gaini Simey.

¹⁹Alini Kehat, piɗi humuniɗi humuniɗi: Amram, Yetsebar, Hebron gaini Uzziyel lai.

²⁰Alini Merari piɗi humuniɗi humuniɗi: Mahli gaini Musi. Hanɗa e ɗi ɗai na piɗi humuni na wiini Levi piɗi pakataiɗi pakataiɗi.

²¹Pinziba na wiini Gerson ɗa, pini humuni sulu, na wiini Libni gaini na wiini Simey, e ɗi Gersonitekai ɗa.

²²Pɵaɗi Gersonitekai na maɵagai ɗa paŋ sini tile ɗaw par ta amai sek ɗa, e zi paŋ ɗai 7. 500

²³Piɗi humuni na wiiɗi Gersonitekai ɗa e pisi piɗi futi na koskoi par duɓani Gumu n’e nivi gaini EPIƊ-ƊAI warni ɗa.

²⁴Abai na miɗiɗi ɗa a Eliyasaf n’ahini Laiel.

²⁵Sdaɗi Gersonitekai na sini hlai na sɗik ɗa a hanɗa: Gumu n’e nivi gaini EPIƊ-ƊAI warni ɗa, Wala n’e biriŋ midini ɗa, rido na mini Gumu ɗa lai.

²⁶Wala n’e ɗû sini wazagai aŋ zuf gaini, rido na mini pakatai na sini hlai na sɗik gaini Gûwiŋ zi ɓaka gaini sogom n’e piŋ amai gaini ɗa lai. Sda hanɗa paŋ ɗa aŋ tiɗi Gersonitekai.

²⁷Pinzibani Kehat ɗa, piɗi humuni puɗu: na wiiɗi Amramitekai, na wiiɗi Yiseharitekai, na wiiɗi Hebronitekai gaini na wiiɗi Uzziyelitekai. E ɗi Kehatitekai ɗa.

²⁸Kehanitekai na maɵagai ɗa paŋ, na sini tile ɗaw par ta amai sek ɗa, e zi paŋ ɗai 8. 600, e zi sda amlai war hlai na sɗik

²⁹Pinzibani Kehat ɗa e pisi war gal n’amai par tini hlai na sɗik ɗa.

³⁰Abai na midiɗi ɗa a Elisafan n’ahini Uzziyel.

³¹Sdaɗi Kehatitekai a: Zunduk zi bonu, table n’e mili zi peŋ midiɗi, wala n’e higi lampa sini, Gûwiŋ zi ɓaka, wazagai n’e zi sda gaini amlai war hlai na sɗik, gaini rido n’amlai warni hlai na sɗik ɗa lai. Wazagai hanɗa paŋ ɗa gɗamni aŋ war tiɗi.

³²Abaiɗi abakai na wiiɗi Levitekai paŋ ɗa a Eliyazar n’ahini pai zi ɓaka Aaron, ɗai n’e zi sda amlai war hlai na sɗik paŋ ɗa, abai na midiɗi ɗa a ni.

³³Pinzibani Merari ɗa, piɗi humuni sulu, na wiini Mahli gaini na wiini Musi, e ɗi Meraritekai.

³⁴Meraritekai na maɵagai ɗa paŋ na sini tile ɗaw par ta amai sek ɗa, e zi paŋ ɗai 6. 200

³⁵Abai na midiɗi ɗa a Suriyel n’ahini Abihayil, e pisi war gal n’azumai par tini Gumu n’e nivi gaini EPIƊ-ƊAI woni ɗa.

³⁶Sdaɗi Meraritekai na sini hlai na sɗik ɗa a hanɗa, luwoŋai n’e piŋ tiɓ tiɓ aŋ kadre na wiini hlai na sɗik, luwoŋai na mogokai na paɵani su su, gaarakai gaini wazagai n’e tikiŋ midini, gaini wazagai n’e zi sda amlai warni gaini, gaini wazagai zamai zamai n’e zi sda na sini hlai na sɗik gaini lai,

³⁷gaarakai na siɗi pakatai gaini wazagai n’e tikiŋ midini ɗa, luwoŋai n’e piŋ tiɓ tiɓ gaini sogom ɗa lai.

³⁸Musus lai, Aaron gaiɗi alini lai e pisi mini hlai na sɗik par piɗi futi na dawai par a dara a muɗa mini Gumu n’e nivi gaini EPIƊ-ƊAI warni, woni gal na futi te diyasi woni par ɗa. E zi sda amlai war hlai na sɗik buriɗi aliɗi Izrayel paŋ. Ɗif na ɓa a pai zi ɓaka kai a halasi li woni ɗa a nava fiɗi n’edi.

³⁹Pɵaɗi Levitekai na maɵagai na sini tile ktai par ta amai sek na Musus gaini Aaron e piɵiɗi piɗi humuni humni pini miɗi na wiini EPIƊ-ƊAI e zi paŋ ɗai 22. 000.

⁴⁰EPIƊ-ƊAI a miɗini wiini Musus: Ku piɵiɗi aliɗi Izrayel na maɵagai n’e wii avut ɗa paŋ, sini tile ɗaw par ta amai sek, ku ɗo yikiɗi paŋ, ktai a hina kai.

⁴¹Ku miliɗiŋa Levitekai ɗa edi aŋ wiya war balamɗi aliɗi Izrayel na maɵagai n’e wii avut ɗa, muta m’EPIƊ-ƊAI. Faraiɗi ɗe war balamni aliɗi farai n’a wa avut na wiiɗi aliɗi Izrayel ɗa paŋ lai.

⁴²Musus a piɵiɗi aliɗi Izrayel na maɵagai n’e wii avut na sini tile ɗaw par ta amai sek maini n’EPIƊ-ƊAI a miɗiŋni nɵa.

⁴³Pɵaɗi aliɗi na maɵagai n’e wii avut sini tile ɗaw par ta amai ɗa, e zi paŋ ɗai 22. 273.

⁴⁴EPIƊ-ƊAI a miɗini wiini Musus:

⁴⁵Ku miliɗi Levitekai war balamɗi aliɗi Izrayel na maɵagai n’e wii avut ɗa, faraiɗi Levitekai ɗe war balamni ali faraiɗi lai, Levitekai ɗa e ɗi wiya, muta m’EPIƊ-ƊAI.

⁴⁶Amma aliɗi Izrayel na maɵagai n’e wii avut na 273 n’e suwa pɵa na wiiɗi Levitekai edi ɗa, ɗai ɗi ɗa e bindiɗi,

⁴⁷midini ɗif paŋ ɗa, e virgi sulai z'arzaŋ ɵim ɵim, na gumani gram doogo doogo sini sulai n’e ɗa zi sda gaini amlai war hlai na sɗik ɗa.

⁴⁸Farai hanɗa ku siŋni wiini Aaron gaiɗi alini, a farai na midiɗi ali Izrayel na maɵagai n’e wii avut n’e sûwi edi ɗa.

⁴⁹Musus a yima farai na midiɗi nagai n’e sûwi edi, na ɗai ɗi e bindiɗi ɗa.

⁵⁰Farai n’a navaŋ paŋ ɗa a za sulai z'arzaŋ 1365, sini sulai n’e ɗa zi sda gaini amlai war hlai na sɗik.

⁵¹Musus a sini farai hanɗa wiini Aaron gaiɗi alini, pini miɗi na wiini EPIƊ-ƊAI maini n’a gdaŋ miɗini nɵa.