Read Mousgoum Piɵi 31 Bible Online

Piɵi 31 - Mousgoum bible

Piɵi 31

¹EPIƊ-ƊAI a miɗini wiini Musus: Hala ziɗi meefeŋ wiiɗi Madianitekai, midini na nagai e ziŋɗi wiiɗi aliɗi Izrayel ɗa. Asakal hanɗa par aga ki hala piɗi tiyakaiku lai.

³Musus a miɗiɗi wiiɗi ɗai: zamai arbaki aga e mili wazagaiɗi zi gaw, e zizini siɗi aŋ htimi gaiɗi Madianitekai, kapai hiy na wiini EPIƊ-ƊAI na siɗi Madianitekai ɗa a siŋka edi gaiki.

⁴Pinziba na war Izrayel paŋ a ɵina ɗai dubu ɗaw ɗaw. Pinziba a hina kai.

⁵E mili ɗai war pinziba paŋ par dubu ɗaw ɗaw, a za paŋ ɗai dubu doogo pi sulu

⁶Ɗai na dubu ɗaw ɗaw na war pinziba par ɗa, Musus a ɵini edi min hatam paŋ. A ɵina pai zi ɓaka Pinehas n’ahini Eleyazar, na wazagai zi sda na sɗik pan aŋ tini, gaini faana na siŋka ɓa gaw a na ɗa lai.

⁷E hitimiɗi ɗai na Madian ɗa maini n’EPIƊ-ƊAI a miɗiŋni wiini Musus ɗa nɵa. E fiɗiɗi maɵagai ɗa edi kafa.

⁸War mefeŋ ni ɗa e fiɗiɗi paaki na Madian na ɵim ɗa edi lai. Yikiɗi a na maini nɵa: Evi, Rekem, Sur, Hur, gaini Reba. E fiɗi Balaam n’ahini Beyor ɗa edi lai.

⁹Aliɗi Izrayel e miliɗisi falakai na Madianitekai gaiɗi aliɗi lai aŋ bagakai; e mili wazagaiɗi n’ezini puɗu puɗu, farani faraiɗi paŋ gaini derɗi na zamai ɗa paŋ lai.

¹⁰E ɵi afu pin fuŋɗi n’abakai paŋ gaini kaŋɗi n’e simni warni ɗa paŋ lai.

¹¹Asakal par e milisi der na min gaw gaini wazagai paŋ n’e niviŋsi edi min gaw ɗa: ɗai gaini wazagai n’ezini puɗu puɗu paŋ.

¹²E kiɗisi bagakai n’e yimiɗisi ɗa gaini wazagai n’e niviŋsi paŋ gaini der na min gaw ɗa paŋ, e kiŋsi wuzani Musus gaini Eleyazar na pai zi ɓaka gaiɗi aliɗi Izrayel na doogo paŋ lai, war kaŋ na war hlai na plas na Mowab, ɵimani ra Yurdan, wuzaɗi Yeriko tar.

¹³Musus, Eliyazar gaiɗi abakaiɗi ɗai paŋ, e niyisi anene miɗi, war kaŋ par.

¹⁴Musus a za hiy siɗi abakaiɗi askarai ta. A za hiy siɗi abakaiɗi askarai na ɗai piɗi dubu ɗaw ɗaw, gaiɗi na ɗai piɗi miya ɗaw ɗaw n’e wiyisi edi min hatam par ɗa.

¹⁵Musus a miɗiɗi: Falakai n’e ɗi na paŋ, ki fiɗiɗi edi kai buri maɗa?

¹⁶Seŋ n’a za war Peyor ɗa, e zi seŋ ɗa e ɗi falakai hanɗa, pin miɗi na Balaam a miɗiŋɗi ɗa, e kiɗi aliɗi Izrayel aŋ zi meefeŋ sin EPIƊ-ƊAI. Nɵa gir a halasi midiɗi ɗai na wiini EPIƊ-ƊAI buri hanɗa.

¹⁷Tiyana ɗa fiɗiɗi ali na maɵagai ɗa edi kafa, gaiɗi falakai n’e tipi gaiɗi maɵagai duk ya ɗa lai.

¹⁸Amma falakai n’e tipi gaini wus duk kai ɗa, ki hiniɗi karɗi, e ɗi wiiki.

¹⁹Tiki paŋ na ki fiɗi ɗif, zaw na ki tiki tiki sini kopoŋ ɗa, ki niyi aha war kaŋ kai, ki simni edi par ca, haa mefeŋ muguzak; nagai paŋ n’e fiɗi ɗif, zaw n’e tiki tiɗi sini kopoŋ ɗa, aga e zi siɗi edi hilu war mefeŋ n’ag'aŋ hu gaini mefeŋ n’ag'aŋ muguzak ɗa lai. Gadai hanɗa a na buriki gaiɗi bagakai na ki yimiɗisi ɗa lai.

²⁰Sapa na siki wazagai z'amur, wazgai n’e ziŋ gaini ayirni haakai, gaini wazagai ziluwuŋ paŋ ɗa, ki ziŋ edi hilu lai.

²¹Eleyazar na pai zi ɓaka a miɗiɗi wiiɗi askarai n’e ɗisi edi min hatam maini nɵa: Gadai zi ɗiyi n’EPIƊ-ƊAI a siŋni wiini Musus a na maini nɵa:

²²Wazagai n’a zizina gaini or, zaw gaini arzaŋ zaw gaini kiya, zaw gaini kawai zaw eteŋ, zaw tatna,

²³wala paŋ n’a kiɗa a za edi hilu gaini afu ɗa, ki ɵiŋ arni afu, kapai a za edi hilu. Amma wala paŋ n’a kiɗa a za edi hilu gaini afu kai ɗa, ki ɵiŋ arni yem, kapai a za edi hilu lai.

²⁴War mefeŋ n’ag'aŋ muguzak ɗa, ki mi sapa na siki edi, ki bindi hilu, nɵa ki siɗi ki wiyi aha war kaŋ.

²⁵EPIƊ-ƊAI a miɗini wiini Musus: Tuku gaini pai zi ɓaka Eleyazar gaiɗi tamai dalam na war Izrayel paŋ, pɵi wazagai na ki niviŋsi moin gaw par ɗa: Ɗai gaini wazagai n’ezini puɗu puɗu lai.

²⁶

²⁷Ku ɓurwa wazagai hanɗa azumai sulu; gal na ktai a wiiɗi askarai n’e ɗisi edi min hatam ɗa, na ktai a wiiɗi na doogo ɗa lai.

²⁸Pin wazagai na wiiɗi askarai par ɗa, ɗai e zi li miya ɵim ɗa, ku saŋa ɗif ktai, ɵaakai miya ɵim ɗa, ku saŋa pin ktai, ablehökai miya ɵim ɗa ku saŋa pini ktai, adumai zaw hakai miya ɵim ɗa, ku saŋa pin ktai lai.

²⁹Bri na wiya na ku yimaŋsi war gal na tiɗi par ɗa, ku siŋni wiini Eleyazar, na pai zi ɓaka, aŋ wala n’a sa edi burini EPIƊ-ƊAI.

³⁰War gal na wiiɗi aliɗi Izrayel na doogo par ɗa, ɗai e zi li doogo doogo ɵim ɗa, ku saŋa ɗif ktai, ɵaakai doogo doogo ɵim ɗa, ku saŋa ktai, ablehökai doogo doogo ɵim ɗa, ku saŋa ktai, adumai zaw haakai doogo doogo ɵim ɗa, ku saŋa ktai, wazagai zamai n’ezini puɗu puɗu ɵa lai. Ku siŋɗi wiiɗi levitekai n’e ɗa zi sda amlai war hlai na sɗik, na wiini EPIƊ-ƊAI ɗa.

³¹Musus gaini pai zi ɓaka Eleyazar e zi maini n’EPIƊ-ƊAI a miɗiŋni wiini Musus ɗa nɵa.

³²Wazagai n’aliɗi Izrayel e miliŋsi min gaw par, n’a hina piɗi, a na maini nɵa: Adumai gaini haakai a na 675000

³³ɵaakai 72000, ablehökai 61000, falakai n’e tipi gaiɗi maɵagai duk kai 32000.

³⁴

³⁵

³⁶Gal n’a sa siɗi askarai n’e ɗisi edi min hatam a na maini nɵa: Adumai gaini haakai 337500.

³⁷Arbani par ɗa 675 a wiini EPIƊ-ƊAI,

³⁸ɵaakai 36000, arbani par ɗa 72 a wiini EPIƊ-ƊAI,

³⁹ablehökai ɗa 30. 500, arbani par 61 a wiini EPIƊ-ƊAI,

⁴⁰Ɗai 16000, arbani par ɗa 32 a wiini EPIƊ-ƊAI.

⁴¹Musus a sini bri na wiini EPIƊ-ƊAI wiini pai zi ɓaka Eleyazar, aŋ wala n’a sa edi burini EPIƊ-ƊAI maini n’EPIƊ-ƊAI a muɗaŋ ɗa nɵa.

⁴²Gal n’a sa siɗi aliɗi Izrayel na doogo ɗa, gaini na wiiɗi askarai ɵa ta lai. Adumai gaini haakai 337500,

⁴⁷War gal na wiiɗi ɗai na doogo par ɗa, wala n’a za li doogo doogo ɵim paŋ ɗa, a yima edi pini ktai, wiini EPIƊ-ƊAI. A siŋɗi wiiɗi levitekai n’e zi sda amlai war hlai na sɗik, na wiini EPIƊ-ƊAI, maini n’EPIƊ-ƊAI a miɗiŋɗi wiini Musus ɗa nɵa.

⁴⁸Abakaiɗi askarai, abakai na ɗai piɗi dubu ɗaw ɗaw gaiɗi na ɗai piɗi miya ɗaw ɗaw lai e hilisi sini Musus.

⁴⁹E miɗini maini nɵa: Tiyi mi pɵiɗi askarai n’e ɗi ka piyi ɗa ta ta, mi vidisi na ɗa, ktai maa a basi piyi kai.

⁵⁰Tiyana ɗa tiyi mi firyi mi sini like wiini EPIƊ-ƊAI gaini wazagai zi or na mi niviŋ ɗa, cen na wule, girliŋ, adoŋo zi tampoŋ wala na ɵime, gaini madai n’e giɓiŋ wulaɗi lai. Kapai mi zi siyi edi hilu gaini midiyi dama wuzani EPIƊ-ƊAI.

⁵¹Musus gaini pai zi ɓaka Eleyazar, e yimi wazagai n’e ziŋ gaini or, na gai futini hanɗa tiɗi par.

⁵²Gumani or na n’abakaiɗi askarai na ɗai piɗi dubu ɗaw ɗaw gaiɗi na ɗai piɗi miya ɗaw ɗaw e siŋ ɗa a za kilo 170.

⁵³Askarai na piɗi ɗa, ɗif paŋ a giɗima wala n’a navaŋ ɗa aŋ wiini wiini.

⁵⁴Musus gaini pai zi ɓaka Eleyazar e mili wazagai zi or na n’abakaiɗi askarai na ɗai piɗi dubu ɗaw ɗaw gaiɗi na ɗai piɗi miya ɗaw ɗawe siŋ ɗa, e kiŋ amlai war gumu n’e nivi gaini EPIƊ-ƊAI woni, kapai EPIƊ-ƊAI midini aga wula gaiɗi Izrayel kai.