Read Mousgoum Piɵi 32 Bible Online

Piɵi 32 - Mousgoum bible

Piɵi 32

¹Pinzibani Ruben gaiɗi pinzibani Gad, e ɗifu gaini farani farai viya, a fara n’abai gara. E tili afti na Yazer gaini na Galaad, a hlai na pɗem zi zi farai.

²Nɵa e hili sini Musus gaini pai zi ɓaka Eleyazar, gaiɗi abakaiɗi ɗa lai, e miɗiɗi:

³Atarot, Dibon, Yazer, Nimra, Hesbon, Eleyale, Sebam, Nebo, gaiɗi Beyon.

⁴Hanɗa paŋ a afti n’EPIƊ-ƊAI a tuuraŋ edi wuzaɗi aliɗi Izrayel. Afti ni ɗa a afti zi zi farai, tiyi mi ɗa gaini farani farai tiyi viya.

⁵Na ɓa a kiɗa a za ɗa, za barka, siyi afti ni ta aŋ bullum na wiyi. Siyi hlai war gal hanɗa par ta.

⁶Amma musus a miɗiɗi wiiɗi pinzibani Gad, gaiɗi pinzibani Ruben: Tawalakaiki e hili aŋ hatam, amma tiki ki hini ka won na ca ɗi?

⁷Ki firyi ki ɓilkiɗi hiiniɗi aliɗi Izrayel aŋ hili midini afti n’EPIƊ-ƊAI a siŋɗi kaai ɗa buri ma ɗa?

⁸Hanɗa a sda na tamaiki e ziŋ, won hlai na mu ɵiniɗi a Kades -Barneya par aŋ tilisi afti ɗa ka!

⁹E hili haa sin huduk na Eskol e tilisi afti ɗa. Amma won hlai n’e wiyisi ɗa, e ɓilki hiiniɗi aliɗi Izrayel kapai e niyi aha midini afti na EPIƊ-ƊAI a siŋɗi ɗa kai.

¹⁰EPIƊ-ƊAI a za hiy siɗi war mefeŋ ni ɗa, a ha wala min a muɗa:

¹¹Ɗai n’e niyisi aha war Egipte par, na sini buza caaɓa par ta amai sek, aga e tili afti na mu ha wala ma aŋ siŋni Abraham, wiini Isaak gaini Yakob ɗa duk kai zaŋ, buri e yimi seŋŋa aŋ jre kai.

¹²Sai a Kaleb n’ahini Yefune, na war pinzibani Kenaz, par gaini Yosva n’ahini Nun, nagai e yimi seŋni EPIƊ-ƊAI aŋ jre, e zi pini lai.

¹³EPIƊ-ƊAI a za hiy siɗi aliɗi Izrayel, a hiniɗi aŋ giliŋi ediwar basga na kaɗataŋ haa buza doogo doogo puɗu, haa vuna n’e zi meefeŋ arni EPIƊ-ƊAI e vidi edi.

¹⁴Tiyana tiki ki fikisi sdaɗi tamaiki na tuwarai, maini tin luwuŋ n’a pasi amlai par nɵa. Ki firyi ɓa hiy na wiini EPIƊ-ƊAI na siɗi Izrayel a riya amai a suwa pra ɗi?

¹⁵Buri ɓa, na ɓa tiki ki ɵini pini EPIƊ-ƊAI kai ɗa, aga a riya mefeŋni simniɗi aliɗi Izrayel na doogo paŋ n’edi war basga ɗa amai, ki biɗi fu ɗai ɗa edi na ɗa, ki tiki lai.

¹⁶E wiyisi sini Musus par e miɗini: Tiyi mi tiki ka ɵaɓ sini adumaiyi gaini haakaiyi ta ta, mi rgi ka fuŋ n’abakai zi ɵaga wiiɗi falakaiyi gaiɗi aliyi ca ca lai.

¹⁷Asakal hanɗa par ɗa, aga mili wazagaiyi zi gaw, mi hili wuzaɗi tawalakaiyi, haa mi kiɗi war hlai na wiiɗi nagai ɗa falakaiyi gaiɗi aliyi aga e hini ka war fuŋ n’abakai zi ɵaga ɗa, kapai ɗai na midini afti hanɗa e siɗi aŋ ziɗi kai.

¹⁸Tiyi aga mi wiyisi aha war dalamyi kai, sai na ɓa aliɗi Izrayel e nivi afti zi bulum li paŋ.

¹⁹Tiy aga mi nivi bulum na wiyi gaiɗi anene par duɓani Yurdan ɗa kir kai. Buri mi nivi gal na wiyi piɗi futi na dawai par ya.

²⁰Na ɓa aga ki ziŋ mai hanɗa ɵa, na ɓa aga ki mili wazagai zi gaw wuzani EPIƊ-ƊAI aŋ hatam,

²¹na ɓa ɗai zi hatam paŋ e mili li wazagai zi gaw tiɗi, e vigi yurdan li wuzani EPIƊ-ƊAI, haa EPIƊ-ƊAI a birgiɗi gawɗi li edi wuzaɗi paŋ,

²²na ɓa a rɗasi amai midiɗi gawki li, lai ɗa, meefeŋki gaini EPIƊ-ƊAI kaalai, gaiɗi aliɗi Izrayel ɗa kaalai. Afti hanɗa aga a hina aŋ bulum na wiiki wuzani EPIƊ-ƊAI.

²³Amma na ɓa ki ziŋ maini na ki miɗiŋ ɵa kai ɗa, ki zi ɗa tuwur sini EPIƊ-ƊAI, ki yimiŋ midiki ɓa tuwurki aga a zilba tiki lai.

²⁴Hili rgi fuŋ n’abakai zi ɵaga wiiɗi falakaiki gaiɗi aliki, ki tiki ɵaɓ sini adumaiki gaini haakaiki lai. Ki zi pin seŋ paŋ n’a niyasi edi war miki par ɗa.

²⁵Pinzibani Gad gaini pinzibani Ruben e miɗini wiini Musus: tiy mi ɗi ɵeŋku, epin-gezayi, aga mi zi wala na ku miɗiyi midini ɗa.

²⁶Falakaiyi, aliyi, farani faraiyi gaini wazagaiyi n’ezini puɗu puɗu, paŋ ɗa, mi hiniŋ ka war fuŋ n’abai zi ɵaga na Galaad ɗa,

²⁷tiyi paŋ ɗa, aga mi mili wazagai zi gaw na wiyi wuzani EPIƊ-ƊAI aŋ hatam, maini na ku muɗaŋ ɗa nɵa.

²⁸Musus a miɗini wiini pai zi ɓaka Eleyazar, gaini Yosva n’ahini Nun, gaiɗi abakaiɗi ɗai na war pinzibaɗi Izrayel, gaiɗi ɗai hanɗa.

²⁹A miɗiɗi: Na ɓa pinzibani Gad gaini pinzibani Ruben e vigi li Yurdan gaiki, na ɓa e mili wazagaiɗi zi gaw ɗa li tiɗi aŋ hatam wuzani EPIƊ-ƊAI, na ɓa ki rɗi amai midini afti ɗa, aga ki siɗi afti na Galaad aŋ bulum.

³⁰Na ɓa e vigi yurdan gaiki kai, e mili wazagaiɗi zi hatam tiɗi kaalai, ki siɗi bri na wiiɗi arbaki midini afti na Kanaan.

³¹Pinzibani Gad gaini pinzibani Ruben e wiyi seŋ e miɗi: Seŋ n’EPIƊ-ƊAI a miɗiŋyi ɗa, aga mi zi pini.

³²Aga mi mili wazagai zi hatam wuzani EPIƊ-ƊAI aŋ hili war Kanaan, amma bri na wiyi, bulum na wiyi ɗa, a za anene duɓani Yurdan, won na par, piɗi futi na dawai par.

³³Musus a siɗi afti na wiini Sihon, pai na wiiɗi Amoritekai, gai na wiini Og, pai na wiiɗi Basan, fuŋɗi n’abakai gaini fuŋɗi n’agogoi na pini ɗa paŋ, wiiɗi pinzibani Gad, gaini galni pinzibani Manase pinzibani Yosef ɗa lai.

³⁴Pinzibani Gad e rgi fuŋ n’abakai hanɗa amai: Dibon, Atarot, Arower,

³⁵Atrot-Sofan, Yazer, Yogboha, Bet-Nimra, Bet-Haran. E rgi fuŋ n’abakai zi ɵaga, e tiki ɵaɓ sini adumaiɗi gaini haakaiɗi lai.

³⁷Pinzibani Ruben e rgi fuŋ n’abakai hanɗa amai: Hesbon, Eleyale, gaiɗi Kiryatayim.

³⁸Nebo, gaiɗi Baal-Meyon, na yikini a bunda pla, gaiɗi Sibna, e sini yiki wiini fuŋ n’abakai n’e rgiŋ amai ɗa paŋ.

³⁹Pinzibani Makir n’ahini Manase ɗa, e hili e tiki afti na Galaad ɗa, e birgiɗi Amoritekai n’e ɗika woni ɗa edi.

⁴⁰Musus a sini afti na Galaad ɗa wiini Makir n’ahini Manase, a sumna woni,

⁴¹Yayir n’ahini Manase, anmula fuŋ n’agogoi na ɵimaɗi par lai, a sini yiki ɓa fuŋ n’agogoi na wiini Yayir.

⁴²Noba a hala a tika fuŋ n’abai na Kenat, gaini fuŋ n’agogoi n’a pini paŋ. A sini yiki ɓa Noba, midini yikini mal.