Read Mousgoum Piɵi 4 Bible Online

Piɵi 4 - Mousgoum bible

Piɵi 4

¹EPIƊ-ƊAI a miɗini Musus gaini Aaron

²Arbaɗi ɗai na war pinzibani Levi ɗa, ki piɵiɗi pinzibani Kehat ɗa na buza doogo doogo hu par haa sini doogo doogo ɵim ta, ku piɵiɗi piɗi humuni humuni, piɗi pakatai pakatai. Ki miliɗi aŋ zi sda zamai amlai war Gumu n’e nivi gaini EPIƊ-ƊAI warni.

⁴Sdaɗi ɗa a giɗamni wazagai n’e zi sda gaini ɗa wiini EPIƊ-ƊAI kiini.

⁵Won hlai n’aliɗi Izrayel e fiki li aŋ hili ɗa, Aaron gaiɗi alini e hilisi e pili rido n’a ɓurwa arbani hlai na sɗik gaini na sɗik gara azumai, e biriŋ midini Zunduk zi bonu n’ali-fuŋ na babɗamai na wiini bonu aŋ warni ɗa.

⁶E biri amurni hilif dofen ɗa midini bar, e birisi sapa z'ayirni adumai na mekele cih cih amai par midini bar, e wii luwoŋai na mogokai n’e libi Zunduk gaini paɵani ɗik ɗik lai.

⁷Table n’e mili peŋ n’a sa sini EPIƊ-ƊAI midini ɗa, e biri sapa z'ayirni adumai na gaini futini na mekele cih cih midiɗi, e mili sufrakai gaini kopai gaini wazagai n’e zi ɓaka zi vin, gaini peŋ n’e miliŋ midiɗi table kureɗ kureɗ lai midiɗi.

⁸E biri sapa z'ayirni adumai na gaini futini na mekele cih cih midini wazagai hanɗa bar, e biri amurni hilif dofen midini bar lai, asakal par e wii luwoŋai n’e libiŋ gaini ɗa paɵani.

⁹E biri sapa na gaini futini na mekele cih cih midini wala n’e higi lampa sini gaini lampani ɗa, gaini wazagai n’e zi sda sini gaini: jiɓam, wazagai n’e mili salte edi gaini, wazagai n’e mi emel n’e zi sda gaini woni warni lai.

¹⁰Gaini wazagai n’e zi sda gaini sini paŋ e biri amur na wiini Hilif dofen ɗa sini bar, e tikiŋ amai midini wala n’e libiŋ gaini ta.

¹¹Aga e biri sapa z'ayirni adumai na gaini futini na mekele cih cih midini gûwiŋ zi ɓaka zi or, e biri amurni hilif dofen midini bar, asakal par e wii luwoŋai na mogokai n’e libiŋ gaini ɗa paɵani gûwiŋ ɗa ɗik ɗik lai.

¹²E mili wazagai n’e zi sda wiini Alaw gaini amlai war hlai na sɗik ɗa, e biri sapa z'ayirni adumai na mekele cih cih midini bar, e biri amurni hilif dofen midini bar lai, asakal par e tikiŋ amai midini wala n’e libiŋ gaini ta.

¹³E lili bono na mini gûwiŋ zi ɓaka zi yi ɗa edi yaw, buri sapa n’e biriŋ sapa z'ayirni adumai na mekele keŋ midini bar.

¹⁴E mili wazagai n’e zi sdani ɓaka gaini midini, wazagai n’e yi wazagai zi ɗûgûdi zi lûgûzi warni, juɓaŋ n’e pikisi neŋ avu par gaini, pel gaini kup n’e yiimi fel gaini, wazagai n’e zi sda gaini Gûwiŋ zi ɓaka paŋ, e biri amurni hilif dofen amai par midini bar, asakal par e wii luwoŋai na mogokai paɵani Gûwiŋ zi ɓaka ɗik ɗik.

¹⁵Won hlai n’Aaron gaiɗi alini e fiɗi li Gumu na sɗik gaini wazagai n’e zi sda warni gaini lai ɗa, aliɗi Izrayel e fiki e hili, nɵa alini Kehat e hilisi e miliŋ. Amma na ɓa a faaɗa kai hai ɗa e tiki tiɗi sini kai, ɵa kai ɗa aga e mri, hanɗa a sda na Kehatitekai e ziŋ sini Gumu n’e nivi gaini EPIƊ-ƊAI warni ɗa.

¹⁶Eliyazar n’ahini pai zi ɓaka Aaron ɗa, abai na midini emel n’e miŋ warni lampa gaini wazagai zi ɗûgûdi zi lûgûzi n’e yiŋ aŋ ɓaka ɗa, gaini ɓaka n’e ziŋ kureɗ kureɗ gaini alini seyem, gaini emel n’e tiki ɗai war sda gaini. Abai na midini hlai na sɗik gaini wazagai n’amlai warni paŋ, hlai na sɗik ɗa gaini wazagai n’e zi sda gaini amlai warni paŋ.

¹⁷EPIƊ-ƊAI a miɗini wiini Musus gaini Aaron maini nɵa:

¹⁸Piɗi humunini Kehat ɗa, ki hiniɗi e vidi edi arbaɗi pinzibani levi ɗa par kai.

¹⁹Kapai e simni karɗi e mri kai, Won hlai n’aga e zi sda gaini wazagai na sɗik gara ɗa, Aaron gaiɗi alini ɗa e zi siɗi maini nɵa: Aaron gaiɗi alini aga e siŋkiɗi balamɗi ta ta, e siŋkiɗi sdaɗi ta ta lai.

²⁰Nɵa aga e kiɗi e hili aŋ ɵi arɗi amlai aŋ tili wazagai na sɗik kai, ɵa kai ɗa aga e mri.

²¹EPIƊ-ƊAI a miɗini wiini Musus:

²²Piɵiɗi pinzibani Gerson piɗi pakatai pakatai, piɗi humuni humuni lai.

²³Ku piɵiɗi nagai na buzaɗi a za doogo doogo hu par haa sini doogo doogo ɵim ta, n’e kiɗi aŋ zi sda amlai warni Gumu n’e nivi gaini EPIƊ-ƊAI warni.

²⁴Sdaɗi Gersonitekai n’a sa tiɗi ɗa a hanɗa, sdaɗi n’aga e ziŋ gaini wazagai n’aga e libiŋ ɗa:

²⁵E libi sapa n’e yimiŋ sini hlai na sɗik ɗa, gaini na sini Gumu n’e nivi gaini EPIƊ-ƊAI warni ɗa, gaini amurni adumai na maɵagai gaini amurni hilif dofiŋ n’e biriŋ amai par midini, gaini rido na mini Gumu n’e nivi gaini EPIƊ-ƊAI warni,

²⁶gaini sapa n’e yimiŋ sini pakatai, gaini rido na mini pakatai na sini hlai na sɗik gaini Gûwiŋ zi ɓaka lai, sogom na mini gaini wazagai n’e zi sdaɗi gaini paŋ.

²⁷Gersonitekai e zi ɗa a sda na Aaron gaiɗi alini e siŋɗi aŋ zi ɗa, koo sdaɗi n’e ziŋ, koo wazagai n’e libiŋ. Aaron gaiɗi alini e siŋkiɗi wala n’e ziŋ ɗa gaini wala n’e libiŋ ɗa lai.

²⁸Hanɗa a sda na Gersonitekai e siɗi aŋ ziŋ sini Gumu n’e nivi gaini EPIƊ-ƊAI warni ɗa. Itamar n’ahini pai zi ɓaka Aaron, a abai na midini sda na wiiɗi ɗa.

²⁹Ku piɵiɗi pinzibani Merari ɗa, ku piɵiɗi piɗi humuni humuni piɗi pakatai pakatai.

³⁰Ku piɵiɗi nagai na buzaɗi a za doogo doogo hu par ta haa sini doogo doogo ɵim ta, n’e kiɗi aŋ zi sda amlai warni Gumu n’e nivi gaini EPIƊ-ƊAI warni ɗa.

³¹Sda n’a sa tiɗi, n’e kiɗi aŋ ziŋ amlai warni Gumu n’e nivi gaini EPIƊ-ƊAI warni ɗa a hanɗa: luwoŋai n’e piŋ tiɓ tiɓ aŋ kadre na wiini hlai na sɗik, luwoŋai na mogokai na paɵani su su, gaarakai gaini wazagai n’e miliŋ azumai par pini,

³²gaarakai na siɗi pakatai gaini wazagai n’e miliŋ azumai par pini, luwoŋai na gaini pi tiɓ tiɓ, sogom gaini wazagai n’e zi sdaɗi gaini paŋ, tiki paakai zi ɓaka ɗa aga ki siŋkiɗi wazagai n’aga e libiŋ ɗa gaini yikini yikini.

³³Hanɗa a sda na Merrritekai e siɗi aŋ ziŋ sini Gumu n’e nivi gaini EPIƊ-ƊAI warni, Itamar n’ahini pai zi ɓaka Aaron a abai na midini sda na wiiɗi lai.

³⁴Musus gaini Aaron gaiɗi abakai na midini vok na wiiɗi aliɗi Izrayel, e piɵiɗi pinzibani Levi ɗa paŋ, pini humuni na wiini Kehat, Gerson gaini na wiini Merari lai, n’e zi buza na doogo doogo hu par ta haa sini buza doogo doogo ɵim ta n’e kiɗi e zi sda amlai war Gumu n’e nivi gaini EPIƊ-ƊAI warni, piɗi humuni humuni, piɗi pakatai pakatai lai. Buri ɓa EPIƊ-ƊAI a miɗini wiini Musus buri a piɵiɗi. Pɵaɗi a na maini nɵa: war pinzibani Kehat ɗa ɗai 2. 750 war pinzibani Gerson ɗa ɗai 2. 630 war pinzibani Merari ɗa ɗai 3. 200 pɵaɗi Levitekai paŋ a na ɗai 8. 580 Levit paŋ a nava gadai na midini sdani n’aga a zaŋ gaini wazagai n’aga a lban ɗa, maini n’EPIƊ-ƊAI a miɗiŋni wiini Musus ɗa nɵa.