Read Mousgoum Piɵi 5 Bible Online

Piɵi 5 - Mousgoum bible

Piɵi 5

¹EPIƊ-ƊAI a miɗini wiini Musus:

²Ku miɗiɗi wiiɗi aliɗi Izrayel buri e birgiɗi ɗai na haharai paŋ edi arbaɗi par: nagai paŋ na veglek zi dugum aŋ siɗi, na wala a ka piɗi, na siɗi a tika sini kopoŋ paŋ lai,

³koo ɓa a wus, koo ɓa te muni, ki birgiɗi edi arbaki par, kapai e bindiɗi aliɗi Izrayel na mu sumna arbaɗi ɗa haharai kai.

⁴Aliɗi Izrayel e zi maini nɵa, e birgiɗi edi arbaɗi par, maini n’EPIƊ-ƊAI a miɗiŋni wiini Musus ɗa nɵa.

⁵EPIƊ-ƊAI a miɗini wiini Musus:

⁶Ku miɗiɗi wiiɗi aliɗi Izrayel ɓa: na ɓa ɗif na wus zaw, na muni a za meefeŋ li sini maini, n’a pɵa aŋ meefeŋ sini Alaw lai ɗa, ɗif hanɗa seŋ aŋ midini,

⁷nɵa ɗa, ɗif hanɗa a muɗa meefeŋ n’a zaŋ ɗa edi gaini mini, asakal par a wiyini walani ɗif n’a tikaŋsi ɗa, a sini gal n’ag'aŋ ɵim midini pra.

⁸Na ɓa epin-gezani wala ɗa a mra su, zigelni n’amlai tar n’e sini wala hanɗa aŋ kaalai ɗa, wala hanɗa e siŋni wiini EPIƊ-ƊAI a dara a muɗa wiini pai zi ɓaka, adime n’e zi ɓaka na wiini hizini tuwur edi gaini ɗa a pɵa arbani kai.

⁹Na ɓa aliɗi Izrayel e tiki li wala pini ɓakaɗi n’e ziŋ wiini Alaw ɗa par, e siŋni li wiini pai zi ɓaka ɗa, gal hanɗa a wiini pai zi ɓaka ɗa.

¹⁰Wala na ɗif a saŋ wiini Alaw ɗa, a siŋni wiini pai zi ɓaka, wala n’a sa sini pai zi ɓaka ɗa a wiini lai.

¹¹EPIƊ-ƊAI a miɗini wiini Musus:

¹²Miɗiɗi wiiɗi aliɗi Izrayel, ku miɗiɗi maini nɵa: na ɓa munini ɗif payaiɗi a na meefeŋ, te ɗuula mafaɗi lai,

¹³Na ɓa ɗif aŋ gaiɗi amma mafaɗi a sɗa hanɗa kai, na ɓa te bunda siɗi hi-hiri war ŋoyai ɗif n’a kiɗa a muɗa zaida hanɗa midiɗi aŋ kai, ɗif a yimitisi ka war zini maɵara kaalai,

¹⁴na ɓa hiini zi sile a niya li warni mafaɗi, a na za sile buriɗi munini, amma na ɓa tiɗi war seŋni kai,

¹⁵ɗif hanɗa a kiti munini wuzani pai zi ɓaka, a kasi wala zi ɓaka na buriɗi ɗa: Avudi na wiini Orge kilo hu, a sa emel midini kai, a sa wazagai zi ɗûgûdi zi lûgûzi midini kaalai. Buri ɓa a ɓaka na burini sile, a ɓaka n’e ziŋ kapai a siŋka meefeŋ n’a na ɗa edi.

¹⁶Pai zi ɓaka a kiti muni hanɗa amlai war hlai na sɗik wuzani EPIƊ-ƊAI aŋ tala seŋɗi ɗa.

¹⁷Pai zi ɓaka a bula yem na sɗik war feŋ tini do, a mula alogodo n’amlai war hlai na sɗik par arni yem hanɗa.

¹⁸Pai zi ɓaka a ɗiyiti muni wuzani EPIƊ-ƊAI zaw, a baada ayir a midiɗi amai a siɗi ɓaka n’a siŋka meefeŋ ɗa edi, n’a za buri sile ɗa war tiɗi, pai zi ɓaka a yima yem na ɗewek, zi tuusa ɗa war tini.

¹⁹Pai zi ɓaka a miɗiɗi wiiɗi muni buri te ha wala mɗi, a miɗiɗi ɓa: Na ɓa ɗif a fana gaiku kai, na ɓa k’aŋ gaini mofaku na ɗa, ku paya payai na meefeŋ kai, ku za suku hi-hir kaalai ɗa, yem na ɗewek zi tuusa hanɗa a za wala na meefeŋ suku kai.

²⁰Amma na ɓa k’aŋ gaini mofaku na ɗa, ku na paya payai na meefeŋ, ku zasuku hi-hir ta, ɗif zamai a fana gaiku waŋ ɗa,

²¹EPIƊ-ƊAI a bunduku muɗaŋ, a horo warku ɗa, kapai ɗaiku midiɗi a kɵa gaiku won hlai na e diri e hi wala zi tusa n’abai maini hanɗa nɵa miɗi ɗa.

²²A zuva ɓa yem zi tusa hanɗa, a niya amlai suku kapai warku a hora, ku bunda muɗaŋ lai. Muni aga te wiyini seŋ ɓa: A na ɵa, a zuva ɓa a za ɗa ɵa.

²³Pai zi ɓaka a ɗo tusa hanɗa war wala ɗo, asakal par a maŋ edi gaini yem na ɗewek.

²⁴A siɗi yem na ɗewek, zi tusa ɗa wiiɗi muni ɗa, te caŋ, yem hanɗa a niya warɗi.

²⁵Wuzani hanɗa a tika ɓaka n’a siŋka meefeŋ edi ɗa, edi tiɗi muni par, ɓaka na buri sile ɗa, a sa ɓaka hanɗa wiini EPIƊ-ƊAI, gaini de n’e siŋ gaini ɗa, asakal par a kaŋ midini gûwiŋ zi ɓaka.

²⁶Pai zi ɓaka a mula pin avdi zi ɓaka n’a siŋka meefeŋ edi hanɗa par ti zuguɗ, a yaŋ amai midini gûwiŋ zi ɓaka ɗa. Asakal hanɗa par, a siɗi yem na ɗewe ɗa miɗi aŋ ci.

²⁷Won hlai n’e siɗi yem hanɗa li ɗa, na ɓa te za siɗi hi-hiri ta, te nafu te duula mofoɗi lai ɗa, yem zi tusa hanɗa aga a niya warɗi, a hora warɗi, a binditi muɗaŋ lai. Muni hanɗa aga te bunda aŋ wala zi tusa arbaɗi ɗai ɗi.

²⁸Amma na ɓa muni hanɗa te za siɗi hi-hiri kai, na ɓa te na hilu, wala ktai na meefeŋ aga a za siɗi kai, aga te wa ali pra.

²⁹Hanɗa a gadai na burini sile, won hlai na muni t'aŋ pini ɗif dam, te paya payai na meefeŋ te za siɗi hi-hiri lai.

³⁰Ɗif na hiini zi sile a niya li warni, n’a hiina ɓa munini t'aŋ gaini ɗif, a kitisi muni hanɗa wuzani EPIƊ-ƊAI, pai zi ɓaka a za de hanɗa siɗi lai.

³¹Mofoɗi muni ɗa, seŋ midini kai, amma muni ɗa, na ɓa tiɗi aŋ war seŋ ɗa, meefeŋɗi aga a pɵa midiɗi.