Read Mousgoum Piɵi 6 Bible Online

Piɵi 6 - Mousgoum bible

Piɵi 6

¹EPIƊ-ƊAI a miɗini wiini Musus:

²Miɗiɗi wiiɗi aliɗi Izrayel, ku miɗiɗi ɓa: Won hlai na ɗif na wus zaw muni a firiya a za ɵinini-ha n’a zaŋ wiini EPIƊ-ƊAI buri a sa sini edi wiini EPIƊ-ƊAI ɗa,

³ɗif ni ɗa a ca vin kai, a ca sul kaalai, a sa vinegre n’e ziŋ gaini vin ɗa kai, n’e ziŋ gaini sul ɗa kaalai. A ca sul n’e ziŋ gaini luwuŋ zi vin ɗa kai, a lima alini luwuŋ zi vin na hirnaŋ kai, na hûleŋ kaalai.

⁴Mefeŋ n’a ha wala mini ɓa aga a sa sini edi wiini EPIƊ-ƊAI ɗa warni ɗa, a suma wala ktai na sini luwuŋ zi vin par kai, amurni seyem kaalai, ali n’amlai warni kaalai.

⁵A fuɗa ayir na midini edi kai, muɗgi na mini kaalai; lazuwar a guna midini kai haa mefeŋ n’a kataŋ ta ɓa a safu sini edi aŋ wiini EPIƊ-ƊAI a vada. Ni a na sɗik, a hina ayir na midini ɗa a wula wuzani sek.

⁶War mefeŋ hanɗa, a guna sini kopoŋni ɗif kai.

⁷Koo kopoŋ na wiini epini, na wiiɗi emini na wiini tawalni na wus, zaw na muni, aga a za sini hi-hir gaini hanɗa kai, buri ɓa aŋ gaini viri edi ɗaw aŋ za ɵeŋ na wiini Epiɗ-ɗai Alaw na wiini.

⁸Haa sini vidini mefeŋ n’a kataŋ ta ɓa a safu sini edi aŋ wiini EPIƊ-ƊAI ɗa, ni a na sɗik burini EPIƊ-ƊAI.

⁹Na ɓa ɗif a mra li tizaw ɵimani ɗa, mefeŋ n’a sa sini edi aŋ wiini EPIƊ-ƊAI warni ɗa, aga a ɗukla daf, ayir n’a tikaŋ midini ɗa a bunda hi-hir lai. A za li kosku ɗaw ɗa, hi-hirni a vada edi, nɵa a faɗa ayir n’a hinaŋ midini ɗa edi.

¹⁰Mefeŋ n’ag'aŋ mitwis ɗa a kasi migɵuwi sulu zaw dere sulu ɗi wiini pai zi ɓaka ɗa.

¹¹Pai zi ɓaka a za ɓa na burini tuwur gaini na ktai ɗa, na ktai ɗe a za ɓaka zi yi gaini lai. Asakal par a za de na wiini hinini-tuwur midini, tuwur na wiini kopoŋni ɗif n’a tika sini ɗa. Mefeŋ ni ɗa, pai zi ɓaka a waya a sa ɗif hanɗa edi aŋ wiini EPIƊ-ƊAI pra.

¹²A tika pini katawai a kata mefeŋ n’a firiya a sa sini edi wiini EPIƊ-ƊAI warni pra. A kasi ahini adime na buza ɗaw aŋ ɓaka na wiini zizinini seŋ, mefeŋ n’avut ɗa a pɵa kai, buri ɓa sda n’a tikaŋ mini ɗa a tuura kok.

¹³Gadai na burini ɗif n’a sa sini edi aŋ wiini EPIƊ-ƊAI ɗa a na maini nɵa: Won hlai na mefeŋ ni n’a kataŋ ta ɗa a vada li ɗa, e kiŋsi mini gumu n’e nivi gaini EPIƊ-ƊAI woni.

¹⁴A za ɓaka wiini EPIƊ-ƊAI gaini wazag ai n’ezini puɗu puɗu hu: Ahini adime na buza ɗaw na tirki sini kai aŋ ɓaka zi yi, ahiɗi adumi na buza ɗaw na tirki siɗi kai aŋ ɓaka na burini tuwur, gaini adime ktai na tirki sini kaalai aŋ ɓaka zi ɵeɗ lai.

¹⁵A kasi dologo na wiini peŋ na gaini is arni kai ktai, gato n’e ziŋ gaini avudi na gaini siri kriiɗ, n’e hiɗiŋ gaini emel, gaini gamla na is arni kai, n’e yiimi emel sini gaini avudi gaini vin n’e zi ɓaka gaini na midini ɗa lai.

¹⁶Pai zi ɓaka a ka ɓaka hanɗa paŋ wuzani EPIƊ-ƊAI, a za ɓaka na burini hinini tuwur gaini ɓaba zi yi ɗa lai.

¹⁷Adime ɗa a za ɓaka zi ɵeɗ wiini EPIƊ-ƊAI gaini, gaini dologo na wiini peŋ na gaini is arni kai ɗa lai, asakal par a za ɓaka na gaini avudi, na gaini vin ɗa lai.

¹⁸Asakal hanɗa, ɗif n’a sa sini edi aŋ wiini EPIƊ-ƊAI ɗa, a fuɗa ayir n’a tikaŋ midini ɗa edi mini gumu n’e nivi gaini EPIƊ-ƊAI woni ɗa, a mula ayir na faɗaŋsi midini par ɗa a waŋ arni afu na pini ɓaka zi ɵeɗ ɗa.

¹⁹Pai zi ɓaka a tikiti kirpiɵini adime na gaiɗi ɗa, a tikasi gato na gaini is arni kai war dologo par ktai, a tikasi gamla ɗaw lai. Asakal na ɗif n’a sa sini edi aŋ wiini EPIƊ-ƊAI ɗa a fuɗasi midini edi li ɗa, pai zi ɓaka a siŋni tini ca.

²⁰Pai zi ɓaka a za de a wiini si na sini EPIƊ-ƊAI gaini ɓaka hanɗa, ɓaka hanɗa a n sɗik, a sa sini pai zi ɓaka gaini didikni wala zi ɓaka gaiɗi ɓulni lai aŋ gaini mili edi ca aŋ wiini ɗa. Asakal hanɗa paŋ ɗa ɗif a kiɗa a tika pini aŋ ca vin.

²¹Hanɗa a gadai na burini ɗif n’a za ha buri a sa sini edi aŋ wiini EPIƊ-ƊAI burini sda hanɗa lai, na ɓa gdaŋni a kiɗa ɗa, a kiɗa a sa a suwa hanɗa lai, a suwa paŋ ɗa, a ɗiya midini ɵinini-ha n’a zaŋ gaini gadai na wiini sini si n’edi aŋ wiini EPIƊ-ƊAI ɗa, maini na mini a muɗaŋ ɗa nɵa.

²²EPIƊ-ƊAI a miɗini wiini Musus:

²³Aaron gaiɗi alini aga e ɓikiɗi aliɗi Izrayel ɗa maini nɵa:

²⁴EPIƊ-ƊAI a ɓikiki, a giɗimiki!

²⁵EPIƊ-ƊAI a hina arni a ŋala miɗiki, a za yum siki!

²⁶EPIƊ-ƊAI a mula arni miɗiki, a siki ɵeɗ!

²⁷Won hlai na paakai zi ɓaka e yiki yikiŋa li aŋ ɓikiɗi aliɗi Izrayel ɗa maini hanɗa nɵa ɗa, Ta lai aga mu ɓikiɗi.