Read Mousgoum Piɵi 8 Bible Online

Piɵi 8 - Mousgoum bible

Piɵi 8

¹EPIƊ-ƊAI a miɗini wiini Musus:

²Ku miɗini wiini Aaron ɗa ɓa: Won hlai na ku tika afu li war lampa ɗa, lampa na muguzak hanɗa a za gaglai ɗa edi wuzani wala n’e higiŋ sini ɗa.

³Aaron a za maini hanɗa nɵa, a tika afu warni lampa, a zizinaŋ edi wuzani wala n’e higiŋ sini sek kapai a za gaglai wuzani wala n’e higi lampa sini sek maini n’EPIƊ-ƊAI a miɗiŋni wiini Musus ɗa nɵa.

⁴Wala n’e higi lampa sini ɗa, e ziŋ gaini or zi giɵi, e giɵiŋsi sini pini n’azumai ɗa par haa amai merfeŋni ta. E ziŋ ɗa maini n’EPIƊ-ƊAI a siŋkiŋni arni Musus ɗa nɵa.

⁵EPIƊ-ƊAI a miɗini wiini Musus:

⁶Ku tikiɗi arɗi Levitekai edi arbaɗi aliɗi Izrayel ɗa par ɗawwa, ku ziɗi edi hilu lai.

⁷Aga ku ziɗi edi hilu ɗa maini nɵa: Ku yama yem na wiini ɓaka na burini tuwur ɗa siɗi e fiɗiɗi ayir na siɗi paŋ edi, e mi sapa na siɗi paŋ edi lai, kapai e zi edi hilu.

⁸E kisi gari ktai gaini avudi zi ɓaka na gaini zilni gaini emel na midini ɗa, ku paya gari n’ag'aŋ sulu ta, ku za ɓaka na burini hinini tuwur na wiiɗi gaini.

⁹Ku tpiɗisi vokɗi aliɗi Izrayel ɗa paŋ, ku yikiɗisi Levitekai lai wuzani ara, wuzani gumu na e nivi gaini EPIƊ-ƊAI woni ɗa, aliɗi Izrayel paŋ e mili tiɗi midiɗi.

¹¹Asakal par Aaron a siɗiŋa Levitekai maini ɓaka n’aliɗi Izrayel e ziŋ wiini EPIƊ-ƊAI nɵa.

¹²Levitekai e mili tiɗi humokɗi, garakai na sulu ɗa, gari na ktai ɗa, Aaron a za ɓaka na burini hinini tuwur gaini, na ktai ɗa a za ɓaka zi yi gaini lai. Asakal par a za de na wiini hinini tuwur midiɗi Levitekai.

¹³Asakal par tuku Musus ku miliɗi Levitekai wuzani Aaron gaiɗi alini, ku siɗiŋa aŋ wiya maini ɓaka n’e siŋni wiini EPIƊ-ƊAI nɵa.

¹⁴Gaini hanɗa aga ku tikiɗi arɗi levitekai edi arbaɗi aliɗi Izrayel par ɗawwa, e bindi aŋ wiya.

¹⁵Asakal hanɗa Levitekai e kiɗi e hilisi e zi sda amlai war gumu na e nivi gaini EPIƊ-ƊAI woni ɗa, ku ziɗi edi sɗik, ku siɗiŋa maini ɓaka n’e siŋ sini EPIƊ-ƊAI nɵa.

¹⁶Buri ɓa nagai e si edi ta aŋ wiya, aŋ wiya jre jre arbaɗi aliɗi Izrayel par. Mu yimiɗi aŋ wiya war balamɗi ali n’e wi avut na wiiɗi aliɗi Izrayel paŋ.

¹⁷Buri ɓa ahi n’a wa avut paŋ aha warɗi Izrayel ɗa a wiya. Koo na wiini ɗif, koo na wiini farai, mefeŋ na mu hinasi gir midiɗi ɗai n’Egipte ɗa, mu ziɗi aŋ wiya.

¹⁸Amma mu miliɗi Levitekai war balamɗi aliɗi Izrayel n’e wi avut ɗa paŋ.

¹⁹Mu miliɗi wuzani Aaron gaiɗi alini, aga e zi ɵeŋ na wiiɗi aliɗi Izrayel amlai warni gumu n’e nivi gaini EPIƊ-ƊAI woni ɗa, e zi de na wiini hinini tuwur midiɗi lai. Nɵa aga mu hinasi gir midiɗi aliɗi Izrayel, buri ɓa e tuurisi sini hlai na sɗik kir kai.

²⁰Hanɗa a wala na Musus gaini Aaron, gaiɗi aliɗi Izrayel na doogo paŋ e ziŋ siɗi Levitekai ɗa. Aliɗi Izrayel e zi siɗi Levitekai kal kal maini n’EPIƊ-ƊAI a miɗiŋni wiini Musus buriɗi Levitekai ɗa nɵa.

²¹Levitekai e zi siɗi edi hilu, e mi sapa na siɗi edi lai, Aaron a siɗini wiini EPIƊ-ƊAI maini ɓaka n’a sa sini EPIƊ-ƊAI nɵa, a za de na wiini hinini tuwur midiɗi lai kapai a ziɗi edi hilu.

²²Asakal hanɗa par Levitekai e hili e tiki sda amlai warni gumu na e nivi gaini EPIƊ-ƊAI woni ɗa wuzani Aaron gaiɗi alini. Ɗai e zi siɗi Levitekai maini n’EPIƊ-ƊAI a miɗini wiini Musus buri e zi siɗi nɵa ɗa ɵa.

²³EPIƊ-ƊAI a miɗini wiini Musus:

²⁴Aga ku za gaiɗi Levitekai maini nɵa: Levit n’a za li buza caɓa pi ɵim ɗa, a kiɗa a tika sda amlai war gumu, na e nivi gaini EPIƊ-ƊAI woni ɗa.

²⁵Won hlai n’a za li buza doogo doogo ɵim ɗa, a za sda hanɗa kir kai, dewele midini aŋ za sda kai.

²⁶Amma a kiɗa a zina piɗi mani war sda zamai zamai n’agogoi n’amlai woni gumu na e nivi gaini EPIƊ-ƊAI woni, amma a za sda gaini midini kir kai. Sda na tiɗi Levitekai aga ku kataŋ ɗa maini hanɗa nɵa.