Read Mousgoum Piɵi 9 Bible Online

Piɵi 9 - Mousgoum bible

Piɵi 9

¹War tile n’avut na wiini buza n’ag'aŋ sulu warni niyiɗi n’edi war Egipte par, EPIƊ-ƊAI a muɗa gaini Musus edi war basga na kaɗatan na Sinai, a miɗini maini nɵa:

²Aliɗi Izrayel aga e ziti fet na wiini Paska war mefeŋ n’aŋ gaini ɗiyi zaw ɗa;

³Aga ki ziti fet hanɗa war mefeŋ n’ag'aŋ doogo pi puɗu na wiini tile ni ɗama, koskoi na futi te nawa sek, aga ki ziti pini gadai zi ɗû gaini gadai zi ɗiyi na wiiɗi fet hanɗa.

⁴Nɵa Musus a miɗiɗi wiiɗi aliɗi Izrayel buri e ziti fet na wiini Paska ɗa.

⁵E ziti fet hanɗa edi war basga na kaɗatan na Sinai, war mefeŋ n’ag'aŋ doogo pi puɗu na wiini tile n’avut koskoi na futi te nawa sek. Aliɗi Izrayel e zi kal kal maini n’EPIƊ-ƊAI a miɗiŋni wiini Musus ɗa nɵa.

⁶Amma ɗai zamai kiɗi e zi fet war mefeŋ ni ɗa kai, buri ɓa e ɗifu haharai buri tiɗi a tika sini kopoŋ, e hili sini Musus gaini Aaron,

⁷e miɗini wiini Musus: tiyi mi bindi haharai buri ɓa tiyi a tika sini kopoŋ, ki ɗiliyi buri mi kisi ɓaka na wiyi war mefeŋ n’aŋ gaini ɗiyi zaw maiɗi aliɗi Izrayel na zamai ɗa nɵa kai ɗa buri maɗa? A mefeŋ ni ktai koo,

⁸Musus a wiyiɗi seŋ: Ki ɗiyi ka ca haw, mu zilbasi dirini EPIƊ-ƊAI na buriki ta haw, n’a muɗa maɵa ɗi ɗa?

⁹EPIƊ-ƊAI a miɗini wiini Musus:

¹⁰Aga ku miɗiɗi wiiɗi aliɗi Izrayel maini nɵa: War sarti n’e diri e ziti fet na wiini Paska buriya ɗa, ɗif n’a na hi-hir buri ɓa tini a tika sini kopoŋ ɗa, zaw naŋ warni morkoi na mogo ɗa, ɗif hanɗa aga a ziti fet na wiini Paska ɗa lai, gadai hanɗa a na buriki tiki, buriɗi aliki na dawai sek ɗa lai. E ziti fet hanɗa tile ɗaw asakalɗi marɗi par, a dara a muɗa mefeŋ n’ag'aŋ doogo pi puɗu na wiini tile n’ag'aŋ sulu koskoi na futi te nawa sek, e limi ahini adime na wiini Paska gaini peŋ na is arni kai, gaini sugoi na ɗewek lai.

¹²Wala n’e fiɗiŋ li ɗa e hini pini amai buri dawai kai, e bili keɵkeni kaalai, Won hlai n’aga e ziti fet hanɗa, e ɗiyi midini gadai na wiiɗi fet ɗa.

¹³Na ɓa ɗif a ziti fet hanɗa warni mefeŋ n’ag'aŋ gaini ɗiyi ɗa kai, a na hi-hir kaalai, a tikaŋ ɗa a morkoi na mogo kaalai ɗa, ɗif ni ɗa e birgiŋ edi arbaɗi aliɗi Izrayel ɗa par buri ɓa a sa ɓaka wiini EPIƊ-ƊAI war mefeŋ n’aŋ gaini ɗiyi ɗa kai. Meefeŋni ɗif hanɗa a pɵa midini.

¹⁴Na ɓa ɗif zi zak n’a na arbaki, a dara a ziti fet na wiini Paska na burini EPIƊ-ƊAI ɗa aga a za pini gadai zi ɗû gaini zi ɗiyi na wiiɗi fet hanɗa; a de ni ktai burini ɗif na Izrayel gaini ɗif zi zak.

¹⁵Mefeŋ n’e pi hlai na sɗik amai tiɓ ɗa, ɗugul a hlai na sɗik azumai duk, a dara a muɗa Gumu n’ali-fuŋ na ɓabɗamai na wiini bonu a na amlai warni ɗa. Koskoi ɗa, ɗugul hanɗa a za gaglai maini afu ɵa haa hlai a sɗasi edi.

¹⁶Sini mefeŋ hanɗa par, ɗugul ɗa a hina midini hlai na sɗik ɵa, duvuk ɗa a za gaglai maini afu ɵa.

¹⁷Ɗugul hanɗa, Won hlai n’a yima li warni amai ɗa aliɗi Izrayel e fiki e hili, hlai n’a ɗiya li warni zaw ɗa, aliɗi Izrayel e pi ɗa warni lai.

¹⁸Aliɗi Izrayel e rɗi ɗa pini miɗi na wiini EPIƊ-ƊAI, e simni ɗa pini miɗi na wiini EPIƊ-ƊAI lai, na ɓa ɗugul ɗa a faka aŋ hili kai ɗa, nagai e hili kaalai.

¹⁹Na ɓa ɗugul ɗa a fana li midini hlai na sɗik yaw ɗa, aliɗi Izrayel e zi sda na wiini EPIƊ-ƊAI, e hili wuzaɗi sek kai.

²⁰Won hlai zamai ɗa ɗugul ɗa a fana midini hlai na sɗik viya kai. Pini miɗi na wiini EPIƊ-ƊAI ɗa e kiɗi e simni, pini miɗi na wiini EPIƊ-ƊAI ɗa e kiɗi e rɗi.

²¹Hlai zamai ɗa, ɗugul ɗa a ɗiya koskoi par haa gorof par ta, a yima li warni amai aŋ hili ɗa, e fiki e hili, ɵa kai ɗa, a yiva dam a fana dam lai, a yima warni li amai aŋ hili ɗa e fiki e hili.

²²Na ɓa ɗugul ɗa a ɗiya li midini hlai na sɗik mefeŋ sulu zaw, tile ɗaw zaw, buza ɗaw ɗi ɗa, aliɗi Izrayel siɗi ca e hili kai, na ɓa a yima warni li amai ɗa, e fiki e hili.

²³E simni pini miɗi na wiini EPIƊ-ƊAI, e hili pini miɗi na wiini EPIƊ-ƊAI lai. E zi sda na wiini EPIƊ-ƊAI pini miɗi n’EPIƊ-ƊAI a miɗiŋɗi war mini Musus.