Read Mousgoum Mika 1 Bible Online

Mika 1 - Mousgoum bible

Mika 1

¹Seŋ na wiini EPIƊ-ƊAI a muɗa sini Mika na Moreset par, war mefeŋ na Yotam, Akaz, Ezekiyas e ɗa aŋ paakai war Yuda. Wala a siŋki arni midiɗi Samariya gaiɗi Yeruzalem.

²Slini, tiki ɗai paŋ, zuɓura pɗem tuku afti gaini wazagai na warku paŋ. Epiɗ-ɗai Alaw aga a pa seŋ suku, amlai war tempelni na sɗik par.

³Buri tili, EPIƊ-ƊAI a na niyasi edi war hlaini par. a na niyasi azumai, a hala amai midini hlai zi bonor na warɗi yai.

⁴Huwoŋai a hiliya azumai pin ezini. Hudokai a mala edi maini a nalam n’a hiliya arni afu nɵa, maini yem n’a kasi amai par sin hlai na gaini zigi nɵa.

⁵Hanɗa paŋ a za buri hi n’amai midini gadai na wiini Yakob, burini tuwur na wiiɗi pinzibaɗi Izrayel. Hi n’amai midini gadai na wiini Yakob ɗa a maɗa? Te Samariya kai ɗi? Hlai zi ɓaka na wiiɗi alawai na kadai na wiini Yuda aŋ wata ɗa? Te Yeruzalem kai ɗi?

⁶Aga mu binditi Samariya aŋ greŋ, aŋ vuwai zi luwuŋ zi vin, aga mu haɗa deeɓer na wiiɗi azumai war huduk. Eziɗi zi tûûri aga a sɗasi amai,

⁷alawaiɗi zi kilɗi aga mu kirpaŋ edi paŋ, derɗi paŋ afu aga a yaŋ. Aga mu kukuɗa alawaiɗi zi rgi edi, buri e niviŋ gaini zini zawar, aga a zina war sda zi zawar pra.

⁸Buri hanɗa, aga mu tuwa, aga mu ɵa hama, aga mu paya ganala, harabak aza kaalai. Aga mu ɗuula maini barka ceŋ-ceŋ nɵa, mu tuwa maini aliket nɵa.

⁹Gazi, wuruk na wiiɗi Samariya a wuruk n’abai. a na hala haa siɗi Yuda ta, haa aga min magalaɗi ɗaiŋa ta, haa war Yeruzalem.

¹⁰Ki miɗi labar hanɗa war Gat kai, ki tûwi war Ako kaalai! bubula suku azumai arni alogodo war Bet-Leafra.

¹¹Ɗai na Safir, vigi war ganala gaini siyer, Ɗai na Saanan, kisi siki anene kai. Ɗai e ɵi hama war Bet-Esel, zinai siɗi kir kai.

¹²Ɗai n’e sumni war Marot, e ziriyi buri e piyi pli n’edi, buri gir a niyasi azumai amai sini EPIƊ-ƊAI par, haa min magalaɗi Yeruzalem ta.

¹³Tiki na ki sumni war Lakis, rgi plasai sini saret zi gaw, ki kiɗi aliɗi Siyon war tuwur avut dai ki ɗi tiki, buri siki tiki par aliɗi Izrayel e hitri hi n’amai midini gadai.

¹⁴Buri nɵa, ki ɓûrwi edi siɗi Moreset-Gat par, fuŋ na Akzib aga a bunda aŋ wala zi rhi ɗai, buriɗi paakai na war Izrayel.

¹⁵Tiki ɗai na Maresa, aga mu kasi ɗif na hehe, a tika aftiku, Kol na wiiɗi Izrayel aga a zogo, haa war Adullam.

¹⁶Ɗai na Izrayel, fiɗɗi miɗiki edi, ɗûkli ayir ma miɗiki edi lai, buriɗi aliki na ki diriɗi gara. Ki hini miɗiki klooti, maini beges nɵa, buri ɓa ɗai aga e kiɗi edi gaigai siki par.