Read Mousgoum Mika 2 Bible Online

Mika 2 - Mousgoum bible

Mika 2

¹Haw gara buriɗi nagai n’e hiini midini zini meefeŋ, n’e tiki ezini war duvuk, war hlaiɗi zi feŋ, gorof par e zi hanɗa buri spak aŋ war tiɗi.

²Na ɓa e zi suuna li sini vuwaini ɗif ɗa, e miliŋ tar, sini dalam ɗa e miliŋ lai. E yimi epiŋ-gezani dalam gaiɗi ɗai n’ahani paŋ, ɗif gaini wazagaini n’a na ɗa paŋ lai.

³Buri nɵa, EPIƊ-ƊAI a na muɗa maini nɵa: tili, mu na kasi gir ktai midiɗi ɗai n’e zi maini hanɗa ɵa ɗa, aga ki mili mini par kai, arki aga a yima amai kai, buri mefeŋ hanɗa a mefeŋ na wiini gir.

⁴War mefeŋ ni ɗa, ɗai aga e zi aniya siki, aga e zini yama zi tuwi miɗiki, aga e miɗi: tumu mu vudumu li edi marwai, a sa gal na wiiɗi ɗaiŋa siɗi ɗai na zamai, a tikaŋ edi ta par ɵa maɵaɗa? A sa vuwaiyi wiiɗi gawyi buri maɗa?

⁵Buri nɵa, ɗif ktai n’aga a siki hlai arbaɗi vok na wiini EPIƊ-ƊAI aŋ kai, won hlai n’aga e ɓûrwi afti ɗa.

⁶Zamai e midɗi ɓa: ku vulma gaini seŋ n’aŋ tuku na ɗa kai. E vilimi maini n’aŋ tuku na ɗa ɵa kai, tirki aga a vada edi kai.

⁷Seŋ hanɗa a muɗa ka duk ya ɗi? Pinzibani Yakob, EPIƊ-ƊAI a kaya tini seŋ zi libi su ɗi? A za sdani na ɗa ɵa ɵa ɗi? Seŋni a za pɗem sini ni n’a paya ɗikat kai ɗi?

⁸Aɗipar ɗaiŋa e fiki amai sai siɗi gawɗi, amma tiyana tiki ki fiki kaput na siɗi nagai n’e wiyisi edi mini gaw par aha sek gaini hangalɗi edi, ki hiniɗi gaini sapa n’amlai warni siɗi.

⁹Tiki ki birgiɗi falakaiɗi ɗaiŋa edi war dalamɗi n’e firiyiŋ par, kol a ɓa e ɗi ɗaiŋa ɗa, e tikiŋ edi midiɗi aliɗi par gamai.

¹⁰Fiki amai, hili, buri hlai hanɗa a hlai zi si- n’amla kir kai. Gaini hi-hir na wiiki ɗa, ki gilisi na ɗa a ɓilki n’edi, aga a wiiki miki kaɓa.

¹¹Na ɓa ɗif n’a lawa pini smer, n’a muɗa seŋ z'eles maini nɵa: a muɗa ɓa: Aga mu muɗa seŋ na wuze buriku, aga ki ci vin gaini sul na ɗewek lai, ɗif hanɗa a ɗif zi miɗi seŋ na wuze na ɗai e firiyiŋ ɗa.

¹²Aga mu dingiki war hlai ktai kafa, tiki pinzibani Yakob. Aga mu tipiɗi nagai n’e hini piɗi Izrayel ɗa woni hlai ktai. Aga mu tipiɗi war hlai ktai maini adumai na war ɵaɓ nɵa, maini fara n’edi warni hlaini zi kuzum nɵa Suura aga a za abai buri vok n’abai na wiiɗi ɗai.

¹³Ni n’a bla baŋa aga a ɵa wusaɗi. e ɓisi futi, e vigi war mini hlai ktai ɗaw, e niyi anene, paiɗi a ɵa wuzaɗi, EPIƊ-ƊAI edi wuzaɗi ta.