Read Mousgoum Mika 3 Bible Online

Mika 3 - Mousgoum bible

Mika 3

¹Mu muɗa, ziɓiri haw tiki n’abakai n’alini Yakob, tiki yerimakai na war Izrayel, kadai tiɓ sdaki a na buri ki siŋki jre-ɗikat edi kai ɗi?

²Tiki ki na diri pɗem kai, amma ki firiyi ɗa a meefeŋ, ki ɗûkli amur siɗi ɗai edi, haa a hina ɗa a keɵke.

³Nagai n’e limi neŋɗi ɗaiŋa ɗa, e kûɵi amur siɗi edi, e hiɗi keɵkeɗi, e ɗûkliɗi daf daf maini neŋ n’e miliŋ avu war burma nɵa.

⁴Won hlai n’aga e ɗûûli amai sini EPIƊ-ƊAI aga a wiyiɗi seŋ kai. Ni aga a bunda arni edi siɗi par, burini fel n’e min edi.

⁵EPIƊ-ƊAI a na muɗa maini nɵa: siɗi ɗai na min Alaw na jrekai kai, won hlai n’e siɗi goroli miɗi e miɗi ɓa: ɵeɗ a na, pɗemi te na lai. Amma ni na siɗi wala kai e miɗini ɓa mafuni te na bayaŋ.

⁶Buri hanɗa, duvuk aga a za, amma wazagai zi siŋki warni kai. Buriki a gegeŋ, miɗi na wuze aŋ kai. Futi aga te nawa midiɗi ɗai na min Alaw hanɗa, Girvudi aga te bunda gegeŋ buriɗi lai.

⁷Nagai n’e miɗi seŋ na wuze, nagai n’e siɗi wuti aga e vidi edi kadai, aga e tiki siyer, buri ɓa Alaw aga a wiyiɗi seŋ kai.

⁸Amma ta ɗa, Seze na wiini EPIƊ-ƊAI a vaŋa ta, mu va gaini, gaini gdaŋ, gaini jre-ɗikat gaini gdaŋ, kapai mu siŋkiɗi wiiɗi pinzibani Yakob hi-n’amai midini gadai na wiiɗi gaini tuwur na wiiɗi Izrayel.

⁹Slini seŋ hanɗa pɗem: tiki n’abakai na war pinzibani Yakob, gaiki tiki yerimakai, na war pinzibaɗi Izrayel, tiki na ki tili jre-ɗikat maini wala na hi-hir nɵa, tiki na ki bindi wala na jre-ɗikat paŋ edi aŋ meefeŋ,

¹⁰na ki rgiti Siyon gaini fel, Yeruzalem lai gaini ɵiɓini belet lai.

¹¹N'abakaiɗi, e ziti sariya burini farai, paakaiɗi zi ɓaka e hitri burini vrak, ɗai ɗi na min Alaw e miɗi wala na wuze burini farai. Amma paŋ ktai e miɗi ɓa: EPIƊ-ƊAI a na arbaɗi, gir aga a gizi siɗi kai.

¹²Pin wala na ki ziŋ, Siyon aga te goro amai maini vuwai nɵa, Yeruzalem aga te bunda aŋ greŋ, huwuŋ na wiini tempel aga te bunda aŋ basga.