Read Mousgoum Mika 4 Bible Online

Mika 4 - Mousgoum bible

Mika 4

¹War mefeŋ na wuzamu, huwuŋ na wiini dalamni EPIƊ-ƊAI aga te diya amai merfeŋni huwaŋai. Aga te suwa huwaŋai amai. Ɗai aga e hilisi midiɗi lai.

²Pinzibaɗi ɗai viya aga e hili woni, aga e miɗi hilisi, niyumu amai midiɗi huwuŋ na wiini EPIƊ-ƊAI amai won dalamni Alaw na wiini Yakob, kapai a hitirumu futini, tumu aga mu piyumu warɗi futi na ɓisiti. Buri seŋ zi gadai aga a niyasi war Siyon par, seŋ na wiini EPIƊ-ƊAI war Yeruzalem par lai.

³Ni aga a ɗûkliti sariya na wiiɗi ɗai viya. A kata seŋ arbaɗi yai zamai na zi spak, na edi gaigai. Gaini kaɵkar na wiini aga e zizini hidik, gaini yala na wiiɗi lai aga e zizini mahram. Pinziba n’aga a rɗa kaɵkar edi sin pinziba na zamai aŋ kai, ɗif aga a hitima kir kaalai.

⁴Aga e simni, ɗif paŋ azumai pin luwuŋ zi vin gaini luvuŋ olive na wiini, ktai n’aga a turliɗi aŋ kai. Buri EPIƊ-ƊAI zi Spak paŋ a muɗa hanɗa ya.

⁵Buri ɓa ɗai paŋ aga e hili war yikini alau na wiiɗi, amma tumu aga mu hulumu war yikini Epiɗ-ɗai Alaw na wiimu haa hlai na vada kai.

⁶War mefeŋ hanɗa, aga mu tipiɗi, nagai na dilakai, aga mi diŋgiɗisi amai, nagai n’e miliɗi edi midini afti zamai, nagai na mu ziɗi gir gara, a muɗaŋ a EPIƊ-ƊAI.

⁷Piɗi ɗai na dilakai n’a hina, aga mu ziɗi aŋ ɗai n aga e hini, nagai n’e miliɗi edi aŋ bege, aga mu bindiɗi aŋ pinziba zi spak. EPIƊ-ƊAI aga a sumna midiɗi aŋ pai amai midiɗi huwuŋ Siyon par, tiyana par, haa hlai na vada kai.

⁸Tuku ɵagai zi fara, na wiiɗi ahiɗi Siyon, paiku n’avut aga te waisi suku, pai aga te waisi tiɗi ahiɗi Yeruzalem pra.

⁹Tuku ku ɗuula tiyana buri maɗa? Pai a na ahaku kir kai ɗi? Ɗif na suku gadai a ba edi ta ɗi? Kapai ŋiba a yimuku, maiɗi muni na pûki a ziti nɵa ɗa?

¹⁰Ahidi Siyon nuuma, maiɗi muni na te poka nɵa, buri ɓa tiyana tuku aga ku yima edi warni fuŋ n’abai ɗa par, aga ku sumna edi war vuwai, aga ku hala haa war Babilon. Woni, aga ku nava pli n’edi, woni, EPIƊ-ƊAI aga a bundukusi tiɗi gawku par.

¹¹Tiyana ɗai viya e tipisi muduku, E miɗi: te bunda hi-hir wiiɗi, e miɗi: tulumu ɓilki-n’edi na wiiɗi Siyon.

¹²Amma nagai e siɗi hiini na wiini EPIƊ-ƊAI kai, e siɗi wala n’a hiinaŋ warni kaalai: a tipiɗi amai maini hahai na war vuwai nɵa.

¹³Ahiɗi Siyon, faka amai, giɵa wai ɗa azumai pini azuku, aga mu siki miyok zi kawai, Mu zuku tetrek n’azuku gaini kawai zi kiya. Aga ku siriɗi ɗai viya edi, aga ku sa wazagaiɗi na ku mulaŋsi tiɗi par wiini EPIƊ-ƊAI faraiɗi wiini ni na ŋiti duniya gaini hlaiɗi paŋ lai.

¹⁴Tiyana ahi zi gaw ɓasa wala suku su su, ɗai e gunumu amlai gun. Gaini amaraŋa, e ɵiɓi pai zi sariya na wiiɗi Izrayel sin galaini.