Read Mousgoum Mika 6 Bible Online

Mika 6 - Mousgoum bible

Mika 6

¹Ziɓiri wala n’EPIƊ-ƊAI a muɗaŋ ɗa haw: faka amai, tika seŋŋa wuzani huwaŋai, kapai huwaŋai a ɵina wulaku.

²Tiki huwaŋai, ziɓiriti sariya na wiini EPIƊ-ƊAI: Tiki eziɗi yai zi tûûri na muguza kai, tiliti sariya na wiini EPIƊ-ƊAI gaiɗi ɗaini, a na muɗa seŋ gaiɗi Izrayel.

³Ɗaiŋa, mu ziki ɗa a maɗa? Mu kiyiki war a maɗa? Wiyiŋa seŋ haw?

⁴Buri mu milikisi edi midini afti Egipte par ɗi? Zaw buri mu bindikisi edi war bege par ɗi? Zaw buri mu ɵina Musus gaini Aaron gaiɗi Miryam buri e ɵi wuzaki ɗi?

⁵Ɗaiŋa, hini miɗiki a kɵa, gaini seŋ na Balak pai na Mowab a firiya a ziŋki ɗa, seŋ na Balaam ahini Beyor a wiyiŋni, war Sittim par haa war Gilgal ta, kapai tiki ki siɗi, sda na jre n’EPIƊ-ƊAI a zaŋ.

⁶Aga mu hala wuzani EPIƊ-ƊAI gaini a maɗa? Aga mu hurga azumai wuzani Alaw n’amai gaini a maɗa? Aga mu ɗiya wuzani gaini ɓaka zi yi ɗi? Zaw gaini alini garakai na buza ɗaw ɗaw ɗi?

⁷EPIƊ-ƊAI a firiya ɗa a adumai na gamalakai na dubu-dubu ɗi? Zaw a emel zi ki n’a vada kai ɗi? Aga mu sa ahiya n’avut buri hiŋa n’amai midini gadai ɗa ɗi? Burini tuwur na wiya mal, aga mu sini ahi na wara par ɗi?

⁸Tuku ɗif, EPIƊ-ƊAI a siŋkuku sda na pɗem ya, sda n’EPIƊ-ƊAI a firyaŋ suku par a hanɗa: a wala zamai kai, a jre-ɗikat ɗa, ku za wala na ɗikat, ku fuɗa was aŋ paya maini n’Alaw a dara nɵa.

⁹EPIƊ-ƊAI a na muɗa sin fuŋ n’abai ɗa ɓa: aga a kûrɗiɗi nagai n’e hûniŋ, ziɓiri, pinzibaɗi Izrayel, tiki na ki diŋgi war Izrayel.

¹⁰War dalamni ɗif na tuwur, mu nuvumu ɗa a farai n’a navaŋ war kaarai gaini hill, Efa zi ŋi wala ɗa gai futini kai.

¹¹Ɗif zamai n’a kaara ɗai war kilo, e mula wazagai na maafanai warni sak kapai gumani a riya amai.

¹²Fuŋ n’abakai na ɗai ɗi zi farai e vi gaini kaarai, na ɗai ɗi zi fuŋ e miɗi ɗa a eles, war miɗi par a eles sal.

¹³Buri nɵa, mu bindiki veglek gaini ɵiɓi, aga mu vidiki edi burini tuwurki lai.

¹⁴Tiki aga ki simi, amma ki vi kai. Wiyamai aga te zizina siɗi war fuŋki. Wala n’aga ki tikiŋ amai buri dawai aga a giɗima kai. Wala na ku giɗimaŋ aga mu tuuraŋ edi gaini kaɵkar.

¹⁵Tiki, aga ki bili, amma aga ki hiɗi kai. Aga ki cipiɗi alini luwuŋ olive, amma aga ki zi sda gaini emel kai. Aga ki sipiɗi alini luwuŋ zi vin, amma aga ki ci vinni kaalai.

¹⁶Tiki, ki tiki ezini Omri, gaini sda n’a za war dalamni Akab paŋ. Tiki ki piyi na maiɗi nagai e piyi nɵa, buri nɵa, aga mu vidiki edi, ɗaiki aga e bindi aŋ wala zi yewere, aga ki libi siyer na wiiɗi ɗaiŋa.