Read Mousgoum Mika 7 Bible Online

Mika 7 - Mousgoum bible

Mika 7

¹Haw gara buriya buri mu tala maini ɗif na rawa ali luwuŋ war hlaini zi hiɗi nɵa, a hala buri a rawa alini, amma a nava wala tini buri a sumaŋ kai. Ali luwuŋ Fige n’a naya avut ɗa mu nava ktai maa kai.

²Ɗif na jre-ɗikat a hina midini afti kai, ɗif na jre-ɗikat a hina arbaɗi ɗai kir kai. Paŋ e ɗa riɓti buri emi fel edi, ɗif paŋ ag'aŋa azaw wuzani maini.

³Tiɗi a hitra zini meefeŋ ta. Kapai e zi pɗem ɗa, Yerima gaini pai zi sariya e piyi vrak haw, Ɗif n’abai a siŋka meelewni edi, hiiniɗi paŋ a tapa ktai.

⁴Ɗif na pɗem arbaɗi a tala maini sari nɵa, Ɗif na jre-ɗikat, maria ɗa a hedek. Mefeŋku zi gir a ŋasi gobi, aga ki tiki siyer tiyana par.

⁵Ki yimi pin marmai kai, ki sitini agulku wiini marmaiku kai. Wuzaɗi na, na te fana amlai didikku, ku giɗima muku.

⁶Buri ahi a tirka api ɓa tatala, Ahi na muni te faka amai siɗi emiɗi, Drai te faka amai siɗi suwulɗi. Ɗif paŋ, gawni e ɗi ɗai n’ahani dama.

⁷Buriya ta, aga mu mula ara sin EPIƊ-ƊAI aga mu tika hiini na wiya midini Alaw zi kûri, Alawŋa aga a ɵina wula.

⁸Tuku gauŋa, ku riya pa kai, na ɓa mu kɵa azumai tekeɗeɗi, aga mu faka amai, na ɓa mu sumna war gegeŋ, EPIƊ-ƊAI a gaglai na wiya.

⁹Aga mu liba hiy na wiini EPIƊ-ƊAI buri mu za tuwur sini ta, haa ni dama a muɗa edi mada. Aga a kana war gaglai, aga mu tala sdani na jre-ɗikat.

¹⁰Gauna a arniɗa tala, aga te tika siyer, na na te muɗaŋa ɓa: Epiɗ-ɗai Alaw na wiiku aŋ wata ɗa? Aga mu firiya won hlai na mu talan. Tiyana na aga te kirpa azumai pini eziɗi ɗai, maini dodobo na warɗi futi nɵa.

¹¹Mefeŋ n’aga e rgi ɵagaku warni a cosi ya, war mefeŋ ni aga e zugi hakaku edi gaigai.

¹²War mefeŋ ni aga e hilisi suku war Asiriya gaini fuŋ n’Egipte par, war Egipte par haa sin ra Eufrate, Sin yem-ra n’abai ktai par haa sin na zamai ta, Siɗi huwuŋ ktai par haa siɗi na zamai lai.

¹³Afti aga a bunda edi aŋ basga buriɗi ɗai na woni, buri sdadi na meefeŋ.

¹⁴Sa simi wiiɗi ɗaiku gaiɗi caɓarku, Fara na war bulumku, n’a sumna edi kiini arbani huwoŋai, arbani vuwai zi luwuŋ, hinan a suma war Basan gaiɗi Galaad, maini war mefeŋ n’avut par nɵa.

¹⁵Aga mu sinkuku wazagai zi siŋki, maini war mefeŋ na ku niyasi a ha midini afti n’Egipte par nɵa.

¹⁶Pin ziba na zamai paŋ aga e tilin, aga e dûgi gaini siyer, gaini spaki paŋ tekeɗeɗi, aga e miɗi dugo, ɵimaɗi aga a kitiŋa.

¹⁷Nagai aga e hingi alogodo maini wala meefeŋ nɵa, maini wazagai zi hidili na midiɗi yai nɵa. Aga e niyisi edi won hlaiɗi zi ŋoyai par gaini hunai n’abai, aŋ hilisi sini Epiɗ-ɗai Alaw na wiimu, hunai n’amai aga te yimiɗi, aga e hûni wuzaku.

¹⁸Alaw, na maiku tuku nɵa asiya ɗa? N'a sa ni burini tuwur, na arni midini hi n’amai midini gadai, na wiiɗi nagai n’e hini arbaɗi ɗaiku? A za suwar haa kai, amma a firiya a za ɗa yim.

¹⁹Ni aga a hiina haw burimu pra, aga a mula meefenmu azumai pin ezini. Aga ku poka tuwurdi paŋ, war yem-ra n’abai na huduk.

²⁰Tuku aga ku za pɗem sin Yakob, gaini pɗemku na sin Abraham. Hanɗa a wala na ku han muku siɗi tamaii, war mefeŋ n’avut par.