Read Mousgoum Nahum 1 Bible Online

Nahum 1 - Mousgoum bible

Nahum 1

¹Miɗi na siɗi Ninive. Maktuɓ na wiini wala zi siŋki na wiini Nahum, na Elkosite.

²EPIƊ-ƊAI a Alaw na mesile, a vurga meefeŋ. EPIƊ-ƊAI a waya vrakni meefeŋ, hiyni abai gara. EPIƊ-ƊAI a waya vrakni meefeŋ siɗi gawni, a bunda gaini hiy n’abai gara siɗi gawni lai.

³Gazi, EPIƊ-ƊAI a sabur war hiy, abaini dibiɗi aŋ kai, a vurga tuwur paŋ. EPIƊ-ƊAI a vuga arbani barawai, won hlai n’a na hala arbani, ɗugul a logodo n’ezini.

⁴A ɓara yem-ra n’abai, a hulaŋ amai. A hiɗika yem na warni ra paŋ, nɵa kuzum na war Basan gaini Karmel a siita, fler na Liban a siita lai.

⁵Huwaŋai a ziriya wuzani, huwaŋai n’agogoi a hiliya. Wuzani arni afti a ziriya, afti gaiɗi ɗai na midini paŋ.

⁶N'aga a gada gaini hiy na wiini asiya ɗa? N'aga a ɗiya wuzani hiy n’abai na wiini asiya ɗa? Hiy na wiini a daza maini afu nɵa. Huwoŋai a haɗa wuzani arni.

⁷EPIƊ-ƊAI a pɗem, ni a hlai zi ŋoyai war mefeŋ zi gir, a tikiɗi hangal wiiɗi nagai n’e ŋûyi sini.

⁸Won hlai na gir viya a gizi, a vidiɗi gawni edi, Aga a tika futi piɗi gawni haa war hlai zi mri.

⁹Ki hiini warki burini EPIƊ-ƊAI maɵa ɗa? A bindiɗi gawki edi aŋ wala kadai, Gir aga a za siki kir kai.

¹⁰Nagai e ɗa maini hedek na ɵawa sini marni, nagai n’e si suul haa e siini, aga e yiɗi edi kriiɗ maini evek na huleŋ nɵa.

¹¹Suku par a niyasi edi, ni na hiina meefeŋ midini EPIƊ-ƊAI, a ɗif na hiina wala n’a kiɗa kai.

¹²EPIƊ-ƊAI a muɗa maini nɵa: ɓa gawki e ɗa viya, gdaŋai lai, aga e vidi edi, piɗi a hina kai sam aga mu tika gir miɗiki. Aga mu tukuku siyer zamai pra kir kai.

¹³Aga mu tika edi muduku par gir n’a tukuŋku muduku ɗa, aga mu pla jaɓ n’e rguku gaini edi lai.

¹⁴Tala wala n’a muɗa edi buriku EPIƊ-ƊAI a muɗa maini nɵa: Aga ki nivi pinziba n’aga e hili wuzaɗi gaini yikiku kai. Aga mu mulasi edi war dalamni alaw na wiiku par, wazagai zi rgi, n’a rga gaini kawakai na hiliya. Aga mu zizina waŋku, buri tuku ku nafa wala kai.