Read Mousgoum Habakuk 1 Bible Online

Habakuk 1 - Mousgoum bible

Habakuk 1

¹Hanɗa a miɗi na ɗif na min Alaw Habakuk a navaŋ warni wala zi siŋki.

²Haa kaswata ɗa, EPIƊ-ƊAI! aga mu yikuku buri ku lawaŋa ɗuwal, amma ku wayaŋa seŋ kai, aga mu ɗuula suku burini karai, amma ku lûwiyi ɗuuwal kai.

³Buri maɗa ku hinaŋa aŋ tala meefeŋ gaini ara, buri maɗa, ku tala gir n’e ziŋyi gaini arku kadai, vram, karai a na wuza, hlai paŋ sai sariya gaini hiy.

⁴Pini hanɗa, zi na pini gadai ɗa aŋ kir kai, sariya na jre t'aŋ kir kai, ɗif na tuwur a kirpa na jre-ɗikat ɗa, buri sariya a za war jre kir kai.

⁵Mili arki midini pinzibaɗi ɗai, tiliɗi; ki bindi hiyak gaini hunai, buri mu dara mu za wala war mefeŋ na wiiki tiyana, na ɓa e kikisi ɗa a labarni aga ki yimi hanɗa kai.

⁶Tili, mu na kiɗisi ɗai na Babilon miɗiki, pinziba na hiinini-haw warni kai, zi karai, n’a vugasi afti n’abakai viya, n’a tika aftiɗi marni.

⁷A na tuwur gara, a zi mili hunai, a za wala paŋ pini dirini, buriɗi abaini.

⁸Plasaini a ruva gara a suwa ahraw, kokolaini a suwa belemke na koskoi, ɗai zi plasai e priŋ gai pri, gaini firiyi e hilisi gaigai par. A ɗufla maini maini muka, n’a yorosi amai par midini wala zi simi nɵa.

⁹Piniziba hanɗa a halasi burini vram, arni gaini hiɗiki wuzani, a tipiɗi ɗai n’a yimiɗi mini hatam siɗi marɗi viya maini kai kai.

¹⁰A ni n’a za anya siɗi paakai, n’abakai n’e ŋi a bindiɗi aŋ walani zi dawaŋ, A ni n’a riya pini fuŋ zi ɵaga, a luba afti amai midini marni siɗi ɵagai, haa a tikiti lai.

¹¹Asakal par hiinini a bunda, a niya warni hiini na zamai, a bunda sini meefeŋ, a yima gdaŋni maini alawni nɵa.

¹²Haa war pi zi tiki par, EPIƊ-ƊAI ku tuku ɵa kai ɗi! Alawŋa na Sɗik, tiyi aga mi mri kai, EPIƊ-ƊAI, tuku ku hiniɗisi aŋ ɗûkliti sariya na wiiku midiyi, hlaiŋa zi ŋoyai, tuku ku sini gadai kapai a gidiyi.

¹³Arku a na hilu gara, a kiɗa a tala wala na meefeŋ kai, ku kiɗa aŋ tala n’e ziŋyi gaini arku kai, buri maɗa, ku tiliɗi nagai zi girbi seŋ gaini arku ɗa, ku muɗa kai won hlai na ɗif na tuwur a kirpa ni na ɗikat a suwaŋ buri maɗa?

¹⁴Tuku ku yimiɗi ɗai maini hilif n’agoɗom nɵa zaw, maini wazagai zi hidili na paini aŋ kai nɵa ɗi?

¹⁵A yimiɗi ɗai maini hilif n’e yimiŋ gaini juuti nɵa, a tiniɗisi warni ava na wiini, a tipiɗisi warni magaza n’abai, nɵa, a niya warni firiyi n’abai.

¹⁶Nɵa, a za ɓaka wiini avani, a ɗuguda magazani, buri ɓa gaini hanɗa, der na wiini a na abai. simini pɗamai gara lai.

¹⁷Nagai ɗa, kapai mefeŋ paŋ e guldi ava ɗa edi kûreɗ-kûreɗ aŋ hili wuzaɗi, aŋ fiɗiɗi ɗai gaini hiinini-haw kai ɗa, ɵa ɗaai ɗi?