Read Mousgoum Sofoniyas 1 Bible Online

Sofoniyas 1 - Mousgoum bible

Sofoniyas 1

¹Seŋ n’EPIƊ-ƊAI a miɗiŋni wiini Sofoniyas, ahini Kusi, Kusi ahini Gedaliya, Gedalyia ahini Amariya, Amariya ahini Ezekiyas war mefeŋ na wiini Yosiyas ahini Ammon pai na Yuda.

²Aga mu vada wazagai na midini afti edi paŋ: Hanɗa a miɗi na wiini EPIƊ-ƊAI.

³Aga mu vidiɗi ɗai gaini wazagai n’ezini puɗu puɗu, wala zi ɗufli n’arbani hlai n’amai gaini hilif na warni yem-ra edi, aga mu vada edi wala naka ɗif warni tuwur, aga mu vidiɗi ɗai edi warɗi yai par hanɗa a miɗi na wiini EPIƊ-ƊAI.

⁴Aga mu za hiy siɗi Yuda, siɗi ɗai na Yeruzalem paŋ, wala n’a hina pini Baal, yikiɗi nagai n’e zi ɓakani gaiɗi paakai zi ɓaka na wiini lai.

⁵Nagai n’e hûrgi azumai amai midini dalam, wuzani vok zi gaw n’arbani hlai n’amai, nagai n’e hûrgi azumai wuzani, EPIƊ-ƊAI, amma e hi wala miɗi war yikini Milkom n’alaw na wiiɗi lai.

⁶Nagai e sini dubaɗi wiini EPIƊ-ƊAI e piyiŋ kaalai, e zilbiŋ burini wala kaalai.

⁷Simni hiyak wuzani Epiɗ-ɗai Alaw buri mefeŋ na wiini EPIƊ-ƊAI a na gobi. EPIƊ-ƊAI a zizina ɓaka ya, nagai n’e yikisi e ziɗi edi aŋ hilu ya.

⁸War mefeŋ na wiini ɓaka na wiini EPIƊ-ƊAI aga mu za hiy siɗi ŋarakai gaiɗi yerimakai, siɗi nagai paŋ n’e wi sapa siɗi maiɗi morkokoi nɵa ɗa.

⁹War mefeŋ hanɗa aga mu za hiy, siɗi nagai n’e pri midini min hlai buri e vi dalam na wiini epiɗi, gaini wazagai zi karai gaini rhai zi yel.

¹⁰Slini pɗem war mefeŋ ni: A miɗi na wiini EPIƊ-ƊAI. Ɗuwal aga a wasi war min hlai n’e yikiŋ ɓa: Magala na wiini Hilif par, ciriyi aga a ɵinasi war kartiye na hehe par, bagawa n’abai amai midini huwoŋai n’agogoi.

¹¹Ɗûûli tiki ɗai na war Maktes, buri ɗai zi sakala paŋ aga e bi, ɗai zi farai paŋ aga e mri.

¹²Slini pɗem war sarti ni ɗa, aga mu fifikiti Yeruzalem gaini badri aga mu za gaw siɗi nagai n’e simni warni muluk n’e hiini ɓa: EPIƊ-ƊAI a za wala na pɗem kai, na meefeŋ kaalai.

¹³Slini pɗem, faraiɗi aga e virmiŋ, fuŋɗi aga a tuura edi. Aga e rgi dalam amma aga e simni warni kai, aga e pi luwuŋ zi vin amma aga e ci vinni kai.

¹⁴A na gobi, mefeŋ n’abai na wiini EPIƊ-ƊAI, a na gobi, a na purmasi. Ɗai aga e ɵi hama war mefeŋ na wiini EPIƊ-ƊAI ɗif na kurfuk tekeɗe kaw aga a paya zinai.

¹⁵Mefeŋ hanɗa a mefeŋ zi hiy n’abai, a mefeŋ zi gir, zi mili hunai, a mefeŋ zi ɓilki n’edi, a mefeŋ na gegeŋ, a mefeŋ zi ɗugul gaini hlai zi digi,

¹⁶a mefeŋ na faana aga a tuwa gaini ɗuuwal zi gaw sini fuŋ n’abai na gaini ɵaga, gaini fuŋ n’amai mogokai.

¹⁷Aga mu wiiɗi ɗai war gir n’abai, aga e titimi hlai maiɗi ɗai na malvanai nɵa, buri ɓa e zi tuwur sini EPIƊ-ƊAI. Felɗi aga a ka azumai maini yem nɵa, kopoŋɗi aga a hofa maini wala na nafani kai nɵa.

¹⁸Arzaŋ gaini or na wiiɗi aga a kûrɗiɗi kai, war mefeŋ zi hiy na wiini EPIƊ-ƊAI. Afu na wiini hiyni aga, a yiti duniya gaini hlaiɗi paŋ; aga a vidiɗi ɗai na midiɗi duniya paŋ, buri hanɗa a gir n’abai.