Read Mousgoum Sakariyas 1 Bible Online

Sakariyas 1 - Mousgoum bible

Sakariyas 1

¹War tile n’ag'aŋ mitwis na wiini buza n’ag'aŋ sulu na Dariyus aŋ warɗi pai, seŋ na wiini EPIƊ-ƊAI a muɗa sin ɗif na min Alaw Sakariyas ahini Barakiya, n’ahini Iddo maini nɵa:

²EPIƊ-ƊAI a za hiy abai gara siɗi tamaiki.

³Ku miɗiɗi ɓa: EPIƊ-ƊAI zi Spak paŋ a na muɗa maini nɵa: ki wiyisi sa, ta aga mu waisi siki lai, a miɗi na sini EPIƊ-ƊAI zi Spak paŋ par.

⁴Ki tiki eziɗi tamaiki kai. Nagai na ɗai na min Alaw na marai e miɗi siɗi ɓa: EPIƊ-ƊAI zi Spak paŋ a na muɗa maini nɵa: Wiyisi sa, hini payaiki na meefeŋ edi gaini sdaki na meefeŋ lai. Amma e ɵini piɗi kaalai, e tiki hangalɗi sa kaalai, a miɗi na sini EPIƊ-ƊAI par.

⁵Tamaiki, nagai tiyana e ɗi wata ɗa? Ɗai na min Alaw ɗa, e ɗa karɗi ɗaai ɗi?

⁶Paŋ ktai seŋŋa na mu muɗaŋ edi, gaini seŋŋa na mu rgaŋ wara na mu saŋ war tiɗi ɵeŋŋa ɗai na min Alaw, a yima midiɗi tamaiki, e bindi hiiniɗi. Nɵa nagai e wiyisi, e miɗi edi gaini miɗi lai ɓa: EPIƊ-ƊAI zi Spak paŋ a rga warni buri a za sumu pini payaimu gaini sdamu. A za na ɗa a ni ɗa.

⁷War mefeŋ na caaɓa pi puɗu na wiini tile n’ag'aŋ doogo pi ktai, war tile n’e yikiŋ ɓa Sebat, war buza n’ag'aŋ sulu na Dariyus aŋ warɗi pai, seŋ na wiini EPIƊ-ƊAI a muɗa sini Sakariyas ahini Berekiya n’ahini Iddo maini nɵa:

⁸War duvuk hanɗa wala ktai a siŋka ara: mu tala ɗif ktai midini pilis na mekele dam, a ɗiya war huduk zaw, arbani huwaŋai. Duɓani par ɗa, plasai zamai na makalakai, na bogrokai, gaini na muɗukokai a nafu lai.

⁹Ta mu zilbaŋ: Plasai hanɗa a siŋka midini a ma ɗa? Ɗif zi ɵeŋ n’a na muɗa gaya a wayaŋa seŋ a muɗa: Aga mu suŋkuŋku wala n’a siŋka midini ɗa.

¹⁰Ɗif n’azumai war huduk par a tika seŋ a muɗa: Hanɗa e ɗi nagai n’EPIƊ-ƊAI a ɵiniɗi edi midini afti paŋ buri e tiliŋsi.

¹¹Nagai zi diɓiri plasai e kisi seŋɗi sini ɗif zi ɵeŋ na wiini EPIƊ-ƊAI n’a ɗiya azumai war huduk ɗa, e miɗi: Tiyi mi gûnisi midini afti paŋ, amma mi nivi dûrgûzi agwi kai zaŋ, hlai paŋ ɵeɗ.

¹²Nɵa ɗif zi ɵeŋ na wiini EPIƊ-ƊAI a tika seŋ a muɗa: EPIƊ-ƊAI zi Spak paŋ, ku za hiy siɗi Yeruzalem buza tiyana doogo doogo muguzak, gaini fuŋ zamai n’abakai na war Yuda, suku pini hiyku ɵa haa kaswata ɗa?

¹³Nɵa, sini ɗif zi ɵeŋ n’a na muɗa gaya EPIƊ-ƊAI a wiyini seŋ na pɗem n’a sa arai zi pi viya.

¹⁴Ɗif zi ɵeŋ n’a na muɗa gaya a muɗaŋa: Ku za zaida edi ɓa EPIƊ-ƊAI zi Spak paŋ a na muɗa maini nɵa: Suŋfaɗi agula a diriti Yeruzalem gaiɗi huwuŋ na Siyon, gaini diri na caŋ gara.

¹⁵Amma mu va gaini suwar siɗi pinziba n’e tili ɓa e kiɗi ta, avut ɗa wara a tuura siɗi ɗaiŋa agwi kadai, amma nagai e riyi girɗi amai ta.

¹⁶Buri nɵa, EPIƊ-ƊAI a na muɗa maini nɵa: Mu dara mu waisi hiiniŋa siɗi Yeruzalem, tempel na wiya aga a rga amai warɗi pra, a miɗi na sin EPIƊ-ƊAI zi Spak paŋ par Yeruzalem aga te rga amai pra.

¹⁷Ku za zaida hanɗa edi pra, EPIƊ-ƊAI zi Spak paŋ a na muɗa maini nɵa: Fuŋ n’abakai na wiya aga a va gaini wazagai na pɗamai a suwa pra, aga mu piɗi arɗi Siyon pra, mu viriti Yeruzalem pra lai.