Read Mousgoum Sakariyas 10 Bible Online

Sakariyas 10 - Mousgoum bible

Sakariyas 10

¹Ki zilbi EPIƊ-ƊAI buri a hina faŋ a ɵa, kapai a siki faŋ na mugubur war sartini. A wa ɗugul zi faŋ ɗa a EPIƊ-ƊAI, a sa faŋ n’abai ɗa a ni lai, a hina evek a goɗo edi war basga buriɗi ɗai paŋ.

²Seŋ n’alawai zi rgi e miɗiŋki ɗa, a seŋ n’a nafa kai nagai n’e siɗi wuti, wala n’a siŋka arɗi ɗa a wala na jre kai, weseŋ na piɵiɗi ɗa, a na ɗapni kai arai zi pi na wiiɗi, a nafa wala kaalai. Hanɗa a wala na hiniɗi ɗai yaw aŋ giliŋi, maini adumai nɵa, e siɗi gir maini fara na ɗifni zi giɗimi aŋ kai nɵa.

³Mu za hiy abai na ɗa siɗi ɗai zi giɗimi na maafanai, aga mu zilbini mini afkasai na maɵagai. Nkam EPIƊ-ƊAI zi Spak paŋ, a fakasi ami ya aŋ tala fara na wiini, na ɗai na Yuda. A ziɗi aŋ pilisni na gdaŋ gara nɵa na war hatam.

⁴War Yuda par ahi-fuŋ na koŋni dalam aga a niyasi edi, luwuŋ n’e ɓili gumu azumai gaini, aga a niyasi woni par lai gadaŋni maini taŋ zi hatam, paakai gai hlaiɗi paŋ aga e niyisi edi warni par.

⁵aga e bindi kal-kal maiɗi gaŋgalaŋai n’edi min hatam nɵa, aga e hitimi, e kirpiɗi gawɗi azumai maini alogodo na warɗi futi nɵa. buri EPIƊ-ƊAI a na gaiɗi, gawɗi n’e diɓiri plasaiŋa aga e dûgi gaini siyer.

⁶Aga mu siɗi gdaŋ wiiɗi ɗai na Yuda, aga mu kurɗa pinzibani Yosef. Aga mu wiyiɗisi war eziɗi n’avut buri ɓa e tili ara haw gara, e bindi kal-kal mai na ɓa mu hiniɗi ka edi duk kai ɵa, Ta m’EPIƊ-ƊAI, Alaw na wiiɗi, aga mu ɵina siiwaɗi lai.

⁷Ɗai na war Efrayim aga e bindi gdaŋai maiɗi ɗai n’e siɗi hatam gara nɵa, aga e vi gaini firiyi kal-kal maini ɗif na ciina gaini suul nɵa. Won hlai n’aliɗi e tili hanɗa li, aga e firiyi gara, aga e vi gaini firiyi n’abai burini EPIƊ-ƊAI.

⁸Aga mu yikiɗisi ɗaiŋa ɗa, kapai e tipisi amai buri ɓ'aga mu pliɗisi edi, aga e sisiɗi kal-kal maini na ɗipar ɗa nɵa.

⁹Mu ɵiriɗi edi arbaɗi pinziba na zamai maini seyem n’e sûûɗiŋ nɵa, amma edi gaigai par tekeɗeɗi, midiɗi aga kɵa gaya, aga e wiisi ali woni, asakal par aga e wiyisi aha.

¹⁰War Egipte par aga mu wiyiɗisi aha, war Asiriya par aga mu diŋgiɗisi aha. Aga mu kiɗi midini afti na Galaad gaini Liban, hlai maa aga a kiɗiɗi kai.

¹¹Aga e vigi yem-ra n’abai n’Egipte ɗa, ta EPIƊ-ƊAI aga mu tika mayaw n’abakai azumai. hlai na hulamai na war ra Nil ɗa aga a hiɗika amai. Kûlini-si na wiiɗi Asiriya paŋ aga a vada edi, spak na wiiɗi Egipte paŋ aga a vada edi.

¹²Aga e pɵi midini EPIƊ-ƊAI, aga e zi wala paŋ war yikini, a miɗi na sini EPIƊ-ƊAI par.