Read Mousgoum Sakariyas 11 Bible Online

Sakariyas 11 - Mousgoum bible

Sakariyas 11

¹Huwuŋ na Liban, mala min magalaku edi, hina afu a ya luwuŋ Sedre na wiiku ɗa edi.

²Tuku luwuŋ Sipre, ɗuula, buri luwuŋ Sedre ɗa a kɵa su, buri ɓa luwoŋai na zuva gara ɗa a fuɗa azumai ca. Ɗûûli! Tiki luwoŋai, seŋ na war Basan buri jur na ɗif a naka a niya arbani kai ɗa, a fuɗa azumai ca paŋ.

³Ziɓiri tuwi na wiiɗi ɗai zi giɗimi, buri hlai na juf na wiiɗi ɗa a tuura edi kok. Ziɓiri nûûmi na wiini ali gurnai, buri luwoŋai na ŋoya pini ɵimani Yurdan ɗa a vada edi vat.

⁴EPIƊ-ƊAI, Alaw na wiya a na muɗa maini nɵa: Si simi wiini adumai n’a na baya fiɗi ɗa.

⁵Nagai n’e wûriŋ e fiɗiŋ gaini seŋ midiɗi kai, nagai n’e cikiliŋsi edi ɗa, e miɗi kol sini EPIƊ-ƊAI, mi zi farai li. Ɗai n’e giɗimiŋ ɗa, ktai na hiina haw buriɗi aŋ kai.

⁶Aga mu hiina haw buriɗi ɗai na midiɗi yai ɗa kir kai. A miɗi na sini EPIƊ-ƊAI par. Buri nɵa, aga mu siɗi ɗai war tiɗi marɗi, war tiɗi paakaiɗi lai; paakai aga e tûûri afti ɗa edi, aga mu pliɗi edi war tiɗi par kai.

⁷Nɵa mu bunda aŋ ɗif zi gɗam na wiini fara na wiini adumai na ɗai zi sakala e kiŋ aŋ fiɗi. Mu mula maraŋa zi giɗam ta sulu. Na ktai mu siɗi yiki ɓa: "Pɗemi", na ktai ɓa "Bonu" lai. Nɵa mu tika pa aŋ giɗima fara hanɗa lai.

⁸Ɗai zi giɗimi na hu mu birgiɗi, war tile ni ktai, asakal par, mu adumai ɗa a tikaŋa ma ta, ta ɗe, mu baza min bis lai.

⁹Nɵa, mu miɗini: aga mu giɗimuku kir ka, adumi na te firya te mra, te mra wiiɗi, na te firya te ɓa edi, te ɓa wiiɗi, n’a hina li ɗa ɗe, a luma marni wiini lai.

¹⁰Nɵa mu tikiti amaraŋaiŋa na yikiti ɓa "Pɗemi" mu hiɗiti edi, aŋ ɗukla bonu n’EPIƊ-ƊAI a zaŋ gaiɗi ɗai paŋ ɗa.

¹¹War yivai ni haa, bonu a ɗukla daf, nagai n’e cikili adumai n’e tiliŋa, a yima midiɗi ɓa a seŋ na wiini EPIƊ-ƊAI.

¹²Nɵa mu miɗiɗi: na ɓa a tala arki pɗem ɗa, siŋa vrakŋa ta, na ɓa ki diri kai ɗe, seŋ aŋ kaalai. E siŋa vrakŋa. A na sulai doogo doogo hu.

¹³EPIƊ-ƊAI a muɗaŋa: pokoŋ edi wiiɗi nagai n’e hiliyi kawakai ɗa, buri hanɗa a vrak na pɗem na nagai e kitiŋ buriya. Mu mula sulai na doogo doogo hu ɗa, mu siŋni wiini ɗif n’a hiliya kawakai amlai war tempel na wiini EPIƊ-ƊAI ɗa.

¹⁴Asakal par mu hiɗiti amaraŋaiŋa na yikiti ɓa "Bonu" edi, kapai zigel n’arbaɗi Yuda gaiɗi Izrayel ɗa a vada edi.

¹⁵EPIƊ-ƊAI a muɗaŋa: Za suku aŋ ɗif zi giɗimi na tatala nɵa.

¹⁶Buri nɵa, aga mu kasi ɗif zi giɗimi midiɗi yai hanɗa: adumi na te wula li edi, jaani kai, na te ɓa li edi, aga a piyiti kaalai, na te nava wuruk li ɗa, a zûûliti kai, na te na nga ɗa, a siɗi simi kai. Aga a luma farai na gaini liki, tetrek n’ezini a ɗuklaŋ edi kaalai.

¹⁷Haw gara burini ɗai zi giɗimi n’e nifi kai ɗa, n’e hini farai ɗa ɵar, a zuva ɓa kaɵkar a ɗukla tini edi a cûtini arni na wus ɗa, a zuva ɓa tini te mra wiiɗi, a zuva ɓa arni na wus te doogo lai.