Read Mousgoum Sakariyas 12 Bible Online

Sakariyas 12 - Mousgoum bible

Sakariyas 12

¹Zaida na wiini EPIƊ-ƊAI. Seŋ na wiini EPIƊ-ƊAI midiɗi Yeruzalem. A miɗi na sini EPIƊ-ƊAI par, ni n’a za hlai n’amai a ziti yai lai; n’a sa suŋfa wiini ɗif amlai warni lai:

²Aga mu binditi Yeruzalem maiɗi wa zi ci n’a turla ɗai, buriɗi nagai na ɵimaɗi aŋ. Yuda nɵa lai, won hlai na ɗai aga e cikiti Yeruzalem ɗa.

³War mefeŋ ni ɗa, aga mu binditi Yeruzalem aŋ ahi-fuŋ, na ɗai aga e piyi aŋ tikiŋ amai. Asiya ɗi paŋ n’a paya futi li aŋ tikaŋ amai ɗa, aga a siɗa girni sini. Nɵa pinzibaɗi ɗai na midiɗi yai paŋ aga e diŋgisi midiɗi.

⁴War mefeŋ hanɗa, a miɗi na sini EPIƊ-ƊAI par, aga mu turla plasaiɗi zi gaw ɗa paŋ, nagai n’e simni duɓani aga e miɗi vulum vulum lai. Amma ɗai na Yuda ɗa, aga mu mula ara miɗiŋ, plasai na wiiɗi pinziba na zamai ɗa paŋ aga mu ŋilva arni ɗa.

⁵N'abakai na war Yuda aga e yimi ɓa gdaŋ na wiiɗi ɗai na Yeruzalem ɗa, a na sin EPIƊ-ƊAI zi Spak, Alaw na wiiɗi par.

⁶War mefeŋ ni ɗa aga mu bindiɗi n’abakai na war Yuda kal kal maini afu n’a tika pini jur n’abai nɵa, maini afu zi dû n’e piŋ pini broko nɵa. Nagai aga e vidiɗi pinziba na ɵimaɗi paŋ edi, war gal na sek lai, na sek lai. Amma Yeruzalem aga te hina war balamɗi n’avut ɗa ɵa, wala a titimiti kai.

⁷Avut, EPIƊ-ƊAI aga a kurɗa fuŋ zamai na war Yuda edi, kapai kol na wiini pinzibani David gaini kol na wiiɗi ɗai na Yeruzalem a suwa na wiiɗi ɗai na Yuda gai hlaiɗi paŋ kai.

⁸War mefeŋ hanɗa, EPIƊ-ƊAI aga a wa tini edi midiɗi ɗai na Yeruzalem paŋ, aŋ giɗimiɗi, na hurofai arbaɗi aga e bindi gdaŋai maini David nɵa. Pinzibani David lai aga a bunda arɗi maini Alaw nɵa. A bunda wuzani arɗi ɵeŋ na wiini EPIƊ-ƊAI na wuzaɗi su nɵa.

⁹War mefeŋ hanɗa aga mu faka amai aŋ vidiɗi ɗai paŋ n’e hilisi aŋ cikiti Yeruzalem ɗa edi.

¹⁰Nɵa aga mu ma seze zi yum gaini zi siiwa lai midini pinzibani David gaiɗi ɗai na Yeruzalem. Nagai aga e bindisi arɗi sa ta, n’e ɓiliŋa. Aga e tûwiŋa maini n’e tuwi ahi n’aŋ tini epini ktai nɵa. Aga e tuwi haa viya maini n’e tuwi ahi n’a wa avut ɗa nɵa.

¹¹War mefeŋ ni tuwi n’aga a za war Yeruzalem ɗa, aga a za abai kal-kal maini tuwi na ɗai e tuwi Hadad-Rimmon war hlai na plas na Megido ɗa nɵa.

¹²Midini afti na Yuda, piɗi humuni paŋ aga a tuwa kiini kiini. Piɗi humuni na wiini David edi kiiɗi maɵagai kiiɗi falakai kiiɗi lai, piɗi humuni na wiini Natan edi kiiɗi maɵagai kiiɗi, falakai kiiɗi lai,

¹³piɗi humuni na wiini Levi edi kiiɗi maɵagai kiiɗi, falakai kiiɗi lai, piɗi humuni na wiini Simeiedi kiiɗi maɵagai kiiɗi, falakai kiiɗi lai,

¹⁴Na zamai paŋ e ziŋ ɵa lai, piɗi humuni paŋ edi kiiɗi, kiiɗi, maɵagai kiiɗi, falakai kiiɗi lai.