Read Mousgoum Sakariyas 14 Bible Online

Sakariyas 14 - Mousgoum bible

Sakariyas 14

¹Mefeŋ na wiini EPIƊ-ƊAI a ŋasi gobi, tiki ɗai na Yeruzalem. A mefeŋ na ɗai aga e ɓûrwi wazagaiki arki sini ɵa ca.

²Aga mu diŋgiɗisi pinzibaɗi ɗai paŋ aha war Yeruzalem buri hatam; Aga e tiki fuŋ n’abai ɗa, aga e virmi dalamai ɗa, e fini gaiɗi falakai ɗa gaini gdaŋ. galɗi ɗai ɗa aga e kiɗi edi midini afti zamai, amma piɗi n’a hina ɗa, aga e vidi edi war fuŋ n’abai ɗa par kai.

³Buri nɵa, EPIƊ-ƊAI aga a niya war hatam gaiɗi ɗai hanɗa, aga a hitimiɗi war mefeŋ ni ɗa maini n’a na zaŋ kureɗ war mefeŋ zi hatam ɗa nɵa.

⁴War mefeŋ ni ɗa, aga a mula ezini midini huwuŋ zi luwuŋ olive, na te na wuzaɗi Yeruzalem par, piɗi futi na dawai par sek. Huwuŋ zi luwuŋ olive aga te ɓurwa sulu, arba kal kal, piɗi futi na dawai par haa piɗi futi na koskoi ta, huduk n’abai aga a ɓula war hlai ni ɗa. Galɗi huwuŋ na ktai aga a hala azumai sek, na ktai ɗa, war gal n’amai sek ɗa lai.

⁵Tiki aga ki pri edi war huduk hanɗa ɗaw, buri ɓa a na haa Atsal ta. Aga ki pri edi maini na ki pri edi wuzani jiriyini afti n’a za war sarti na na wiini Oziyas pai na Yuda ɗa nɵa. Asakal par, EPIƊ-ƊAI, Alaw na wiya aga a halasi, gaiɗi ɗai na sɗik na wiini n’e zi ɵeŋni pini.

⁶War mefeŋ ni ɗa, wazagai n’a sa gaglai aŋ kir kai, hlai aga a za maɵaɗi, maɗai zi glas aga a wa lai.

⁷Mefeŋ ni ɗa a na kiini ɗa pal, a siɗaŋ ɗa a EPIƊ-ƊAI ktai. Duvuk warni kaalai, girvudi kaalai; amma koskoi sek ɗa, gaglai aga a luɓasi.

⁸War mefeŋ ni ɗa, yem zi liiwi aga a niyasi aha war Yeruzalem par, a ka gal na ktai aga a ka war yem-ra n’abai zi manda, piɗi futi na dawai sek, galni na ktai, war yem-ra n’abai na Mediteraneya, piɗi futi na koskoi sek lai. A buza aŋ ka ɵa, afat maa kal, apiya maa kal.

⁹EPIƊ-ƊAI aga a ŋa aŋ pai midiɗi yai paŋ. War mefeŋ ni ɗa, EPIƊ-ƊAI ɗa a ni ktai, a hina a wa ɗa a yikini ktai lai.

¹⁰Afti na ɵimaɗi Yeruzalem ɗa paŋ aga a yima azumai kal-kal, siɗi Geba par haa a Rimmon ta, war gal n’amai par tiɗi Yeruzalem; Yeruzalem aga te liba amai war balamɗi dama, war min magala na wiini Benyamin par haa min magala na wel ɗa ta, haa min magala na koŋni hlai ta, sini poriyo na wiini Hananiyel haa sin hlai na wiini pai n’e cipiɗi emel gaini vin woni ɗa ta.

¹¹Ɗai aga e simni war fuŋ n’abai hanɗa, wala n’a glasi tusa arbaɗi aga a za kir kai, Yeruzalem aga te sumna ɵeɗ.

¹²Ɗai paŋ n’e kiɗisi askarai na wiiɗi aŋ hitimi gaiɗi Yeruzalem ɗa, gir n’EPIƊ-ƊAI aga a tikiŋɗi midiɗi a na maini nɵa: neŋ siɗi aga a hofa won hlai n’e ɗa midini eziɗi yaw hai, arɗi aga a hofa amlai war waŋni, alisiɗi te hofa amlai miɗi lai.

¹³War mefeŋ ni ɗa, EPIƊ-ƊAI ɗai aga a miliɗi hunai piɗi abai gara, ɗif paŋ aga a furɗa maini na gaini, buri e dibi was, ɗif paŋ a paya mini maini.

¹⁴Ɗai na Yuda aga e tipi gaiɗi ɗai na Yeruzalem war hatam. Nɵa aga e mili wazagai na wiiɗi pinziba na ɵimaɗi paŋ: maini or ɵa, arzaŋ ɵa, sapakai ɗa, a pɵa kai.

¹⁵Gir hanɗa aga a za sini plasai, sini plasai z'atoŋo, sini ɵigini, ablehökai gaini wazagai n’ezini puɗu puɗu n’a na war kaŋ na wiiɗi gawɗi ɗa lai paŋ; a gir na mai maini ɵa.

¹⁶Nɵa nagai paŋ n’e hini li piɗi pinzibaɗi n’e ɗika hitimiti Yeruzalem ɗa, aga e hilisi amai a Yeruzalem buza buza paŋ, aŋ hûrgi azumai wuzani pai, EPIƊ-ƊAI zi Spak paŋ, buri e ziti fet na wiini gumu.

¹⁷Amma pinziba na midiɗi yai n’e hili amai Yeruzalem buri e hûrgi azumai wuzani pai, EPIƊ-ƊAI zi Spak paŋ ɗa kai ɗa, faŋ aga a ɵa midini aftiɗi kai.

¹⁸Na ɓa ɗai n’Egipte e diri e hili amai a Yeruzalem kai, na ɓa e hili kai ɗa, faŋ aga a ɵa midiɗi kai. Hanɗa a gir n’EPIƊ-ƊAI aga a hinaŋsi midiɗi pinziba n’e diri e hili amai aŋ zi fet na wiini gumu kai ɗa.

¹⁹Hanɗa a gir n’e tikiŋɗi midiɗi Egipte, na wiiɗi pinziba paŋ n’a dara hala amai buri a ziti fet na wiini gumu kai ɗa, a za ɵa lai.

²⁰War mefeŋ ni ɗa, sini adeŋeleŋ na wulani plasai ɗa, aga e ɗû maini nɵa: "A wiini EPIƊ-ƊAI", dognokai n’amlai war dalam na wiini EPIƊ-ƊAI aga a bunda sɗik maini kup zi yimi fel gaini na war hlai zi ɓaka ɗa nɵa.

²¹Dognokai na war Yeruzalem gaiɗi Yuda paŋ aga a sa edi aŋ wiini EPIƊ-ƊAI zi Spak paŋ. Nagai paŋ n’aga e hilisi aŋ zi ɓaka ɗa, aga e diŋ ɗa warni. War mefeŋ ni ɗa, ɗif zi cakala a hina amlai war dalam na wiini EPIƊ-ƊAI zi Spak paŋ kir- kai.