Read Mousgoum Sakariyas 2 Bible Online

Sakariyas 2 - Mousgoum bible

Sakariyas 2

¹Mu yima ara amai, mu tala siŋki zamai ktai: Amiyok puɗu.

²Nɵa mu zilba ɗif zi ɵeŋ n’a na muɗa gaya ɓa: amiyok hanɗa a siŋka midini a maɗa? A wayaŋa seŋ a muɗa: hanɗa a amiyok n’aga a ɵiriti Yuda, Izrayel gaiɗi Yeruzalem lai edi ɗa.

³Asakal par EPIƊ-ƊAI a siŋkaŋa ɗai zi gɵi fai-fai puɗu.

⁴Nɵa mu zilba: Nagai hanɗa e zi won na ɗa a maɗa? A wayaŋa seŋ a muɗa: amiyok hanɗa e ɗi nagai n’aga e ɵiriti Yuda edi nɵa haa ɗif ktai n’a ɗiya miɗi zaw nɵa aŋ kai. Amma ɗai zi fai-fai hanɗa, e hilisi buri e miliɗi hunai piɗi, buri e hiɗi amiyokɗi pinziba hanɗa n’e fiki amai sini afti na Yuda aŋ ɵiriɗi ɗai edi.

⁵Mu yima ara amai: wala zamai a siŋka ara pra. Mu tala ɗif ktai gaini sogom zi kiti hlai tini yaw.

⁶Mu zilbaŋ: ku hala fu wata ɗa? Ni a waiyaŋa seŋ a muɗa: Mu hala fu aŋ kata aŋ kata mogoɗi gaini brukɗi Yeruzalem, kapai mu sɗa ɓa a na ɗa maɵa ta ɗa.

⁷Nɵa ɗif zi ɵeŋ n’a na muɗa gaya a hala wuzani sek agwi, maini zamai ktai a halasi arni sek

⁸Ni a miɗini wiini maini n’a halasi maini nɵa; lawa! ku miɗini wiini gawla n’a na edi gaini sogom tini yaw na ɗa ɓa: A pɗem ɓa ki rgi ɵaga siɗi Yeruzalem kai, buri vokɗi ɗai gaini farani farai n’aga a za woni viya ɗa.

⁹EPIƊ-ƊAI a muɗa: ta lai aga mu sumna woni, aga mu bunda buriɗi aŋ ɵaga z'afu, aga mu siŋkiti abai na wiya edi warɗi lai.

¹⁰Yalla! yalla! fikisi edi midini aftiɗi ɗai na Babilon ɗa par a miɗi na sini EPIƊ-ƊAI par. Tiki na mu ɵiriki edi war koŋɗi yai na puɗu paŋ, a miɗi na sini EPIƊ-ƊAI par.

¹¹Yalla, Siyon, ka suku tuku na ku za fuŋ aha warɗi Babilon.

¹²Buri EPIƊ-ƊAI zi Spak paŋ, ni n’a ɵinaŋasi gaini Spak, buriɗi pinzibaɗi ɗai n’e virmiki a na muɗa maini nɵa: nkam, ɗif n’a tika tini li siki, a wa tini na ɗa ara tar.

¹³Tiyana kam, ta aga mu siŋka spakŋa edi siɗi ɗai n’e virmiki ɗa lai, kapai e bindi aŋ wala zi der na pin hatam na wiiki, na wiiɗi bagakaiki, nɵa aga ki siɗi ɓa a ɵinaŋasi a EPIƊ-ƊAI zi Spak paŋ.

¹⁴Ciriyi gaini firiyi, siŋki firyiki edi, ɗai na Siyon, buri tili mu na halaɗi aŋ sumna arbaki, a miɗi na sin EPIƊ-ƊAI par.

¹⁵War mefeŋ ni ɗa, pinzibaɗi ɗai viya aga e tipi pini EPIƊ-ƊAI, nagai aga e bindi aŋ ɗaiŋa mal-mal, aga mu sumna arbaki, nɵa aga ki siɗi ɓa a ɵinaŋasi a EPIƊ-ƊAI zi Spak paŋ fakat.

¹⁶EPIƊ-ƊAI aga a binditi Yuda aŋ bulum na wiini midini afti na sɗik, aga a viriti Yeruzalem pra.

¹⁷Wazagai zi rgi paŋ, bi miki hiyak wuzani EPIƊ-ƊAI, buri a ɵiyasi amai ya, a na niyasi edi war hlaini na sɗik par.