Read Mousgoum Sakariyas 5 Bible Online

Sakariyas 5 - Mousgoum bible

Sakariyas 5

¹Mu yima ara amai pra, nɵa wala a siŋka sini ara: a maktuɓ n’a na ɗufla amai arbani hlai ɗaw.

²Ɗif zi ɵeŋ na war fuŋ-n’Alaw a muɗa: Ku tala ɗa a maɗa? Mu wiyini seŋ ɓa mu tala maktuɓ ktai a na ɗufla, mogoni kil caaɓa, brukni kil doogo lai.

³Nɵa ni a muɗaŋa: Hanɗa a tusa n’aga a za midiɗi yai paŋ. War galni maktuɓ, ktai ɗa a ɗo ɓa: ɗif zi mihill paŋ a yima edi midini afti ɗa par, war galni na zamai, a ɗo ɓa, ɗif n’a ha wala mini war jre kai ɗa aga e ziŋ nɵa lai.

⁴EPIƊ-ƊAI zi Spak paŋ a na muɗa maini nɵa: Mu ɵinaɗi tusa ɗa ya, kapai a niya aha war dalamni ɗif zi mihill gaini ɗif n’a ha wala mini war jre kai war yikiŋa, kapai a sumna woni, a vada edi kai haa a tuura foɗok gaini ali-fuŋ ɗa edi paŋ haw.

⁵Ɗif zi ɵeŋ na war fuŋ-n’Alaw n’a na haɗa kalaŋ gaya a torosi sa, a muɗaŋa: Yima arku amai, tala wala n’a na halasi na ɗa.

⁶Mu zilba: hanɗa a maɗa? A wayaŋa seŋ: Hanɗa a hortokai, a na halasi gaini tuwurɗi ɗai na warɗi yai ɗa paŋ.

⁷War hlai ni tar wala na guma n’e tikiŋ midini min hortokai a mala amai, muni ktai azumai warni dam.

⁸Nɵa a muɗaŋa: Hanɗa a meefeŋ ɗa. Asakal par a hûgûti amlai warni hortokai, a tika wala na guma ɗa midini lai.

⁹Asakal par mu yima ara amai, wala a siŋka sini ara: mu tala falakai sulu e ɗa hilisi, smer a na finiɗisi lai, baada na graŋɗi a na maini na wiini sahaw nɵa. Nagai e tiki hortokai, e hili amai arbani smer gaini.

¹⁰Mu zilba ɗif zi ɵeŋ na war fuŋ-n’Alaw n’a na muɗa seŋ gaya: E ki hortokai na ɗa wata ɗa?

¹¹A wayaŋa seŋ ɓa: E kiŋ na war Mezopotamiya, aga e rgini tempel woni, won hlai n’e vidi li sda paŋ ɗa, aga e tikiŋ warni, a hina warni ɵa gamai.