Read Mousgoum Sakariyas 8 Bible Online

Sakariyas 8 - Mousgoum bible

Sakariyas 8

¹Seŋ na wiini EPIƊ-ƊAI zi Spak paŋ, a muɗa sa maini nɵa:

²EPIƊ-ƊAI zi Spak paŋ: Mu firiyiti Siyon gara diri na mu diriti gaini a diri na kadai kai.

³EPIƊ-ƊAI a na muɗa maini nɵa: aga mu waisi siɗi Siyon mu sumna a ha war Yeruzalem. Aga a yikiti Yeruzalem ɓa fuŋ n’abai na jre gaiɗi huwuŋ na wiini EPIƊ-ƊAI zi Spak paŋ, huwuŋ na sɗik.

⁴EPIƊ-ƊAI zi Spak paŋ a na muɗa maini nɵa: Ɗai na walakai, falakai gaiɗi maɵagai, n’e tipli gaini amaraŋa buri buzaɗi a za abai ta ɗa, aga e wiyisi e simni warni faada na wiiɗi Yeruzalem.

⁵Aliyagoi na maɵagai gaiɗi na falakai, aga e hilisi zamai viya pra, aga e ɵi dawaŋ war fuŋ n’abai ɗa.

⁶EPIƊ-ƊAI zi Spak paŋ a na muɗa maini nɵa: Na ɓa piɗi ɗai n’a hina e tili ɓa hanɗa a za kai, war yivai hanɗa Ta aga mu yima ɓa a za kai lai ɗi? Seŋ hanɗa a muɗaŋ ɗa a EPIƊ-ƊAI zi Spak paŋ.

⁷EPIƊ-ƊAI zi Spak paŋ a na muɗa maini nɵa: Nkam, aga mu piliɗi ɗaiŋa edi tiɗi ɗai na midini afti na piɗi dawai gaiɗi na koskoi par.

⁸Aga mu wiyiɗisi, aga e simni a ha war Yeruzalem. aga e bindi aŋ ɗaiŋa, ta m’Alaw na wiiɗi, war ɗikat, war jre.

⁹EPIƊ-ƊAI zi Spak paŋ a na muɗa maini nɵa: ki pi arki, tiki na ki ɵini seŋ hanɗa na ɗai na min Alaw e miɗiŋ warni yikiŋa won hlai n’e tûri ezini dalam, buri e rgi tempel na wiya.

¹⁰Buri wuzani mefeŋ hanɗa, ɗai e nivi wala kai farai a kasi riba kaalai. Nagai paŋ n’e piyi, e hili e wiyisi, e hini na war tiɗi gawɗi, buri mu bigiɗi amai siɗi marɗi bak.

¹¹Amma tiyana ɗa, piɗi ɗai na hina, aga mu za siɗi maini n’avut par nɵa kai, seŋ hanɗa a muɗaŋ ɗa a EPIƊ-ƊAI zi Spak paŋ.

¹²Aga mu kasi ɵeɗ, luwuŋ zi vin aga a wa ali, afti aga a wa seyem, maɗai n’amai par aga a ɵa, wazagai hanɗa paŋ aga mu saŋ wiiɗi piɗi ɗai na hina.

¹³Tiki ɗai na Yuda gaiki tiki ɗai na Izrayel, tiki ki ɗika arbaɗi ɗai na kadai, maiɗi ɗai na ki tûûsi tuwus, tiyana ta na aga mi kûrɗiki, aga mu ɓikiki, ki hûni kir kai, ki pi arki.

¹⁴Tiyana seŋ n’EPIƊ-ƊAI zi Spak paŋ a muɗaŋ a na maini nɵa: maini mu rga wara buri mu ziki gir, buri tamaiki e tûûriŋa wara gara, seŋ hanɗa mu hinaŋ kai.

¹⁵Nɵa tiyana mu pla maa li, mu rga wara tiyana buri mu za pɗem war Yeruzalem, war Yuda. Ki hûni kai.

¹⁶Tili gadai n’aga ki zi pini a hanɗa: ki miɗi jre arbaɗi marki, war zini sariya ki ziŋ war jre kapai a kasi ɵeɗ.

¹⁷Ki rgi warki aŋ zi meefeŋ wiiɗi marki kai, ki hi wala miki kadai kai, buri wazagai hanɗa paŋ mu firiyaŋ kai, a muɗaŋ a EPIƊ-ƊAI.

¹⁸Seŋ na wiini EPIƊ-ƊAI zi Spak paŋ, a muɗa sa maini nɵa:

¹⁹EPIƊ-ƊAI zi Spak paŋ a na muɗa maini nɵa: sai na wiini tile n’ag'aŋ puɗu, n’ag'aŋ ɵim, n’ag'aŋ muguzak gaini n’ag'aŋ, aga a bunda buriɗi ɗai na Yuda aŋ mefeŋ zi firiyi, na firiyi abai warni. Amma a suwa paŋ ki piyi jre gaini ɵeɗ.

²⁰EPIƊ-ƊAI zi Spak paŋ a na muɗa maini nɵa: nkam ɗai aga e hilisi, ɗai na war fuŋ n’abai n’abakai par.

²¹Ɗai na war fuŋ n’abai ktai par aga e hilisi siɗi na war fuŋ n’abai zamai, e miɗi: hulumu, tukumu hiy na wiini EPIƊ-ƊAI azumai, puyumu EPIƊ-ƊAI zi Spak paŋ, ta mu halɗi gaiki lai.

²²Ɗai viya gaini aftiɗi ɗai na kadai na zi spak, aga e hilisi aŋ piyi EPIƊ-ƊAI zi Spak paŋ a ha Yeruzalem, aga e tiki hiy na wiini EPIƊ-ƊAI azumai.

²³EPIƊ-ƊAI zi Spak paŋ a na muɗa maini nɵa: war mefeŋ ni, ɗai n’e miɗi seŋ kiidi-kiiɗi, a e yimi sapa pini ɗif na Yudia, aga e miɗini, tiyi mi diri mi hili gaiki, buri tiyi mi ɵini ɓa Alaw a na gaiki.