Read Mousgoum Malakiyas 1 Bible Online

Malakiyas 1 - Mousgoum bible

Malakiyas 1

¹Hanɗa a miɗi n’EPIƊ-ƊAI a miɗiŋni wiini Malakiyas buri a miɗiŋɗi wiiɗi aliɗi Izrayel

²EPIƊ-ƊAI a muɗa: Mu diriki gara, amma tuku ki miɗiŋa ɓa: ku diriyi gara ɗa war a maɗa? Ta EPIƊ-ƊAI mu zilbiki ɗa ɓa: Ezaw ɗa a tawalni Yakob kai ɗi? Gai hanɗa paŋ ɗa mu dara Yakob,

³mu bula gaw sini Ezaw, mu tuura hlai zi huwuŋ na wiini Ezaw ɗa edi, pra mu sa afti na wiini edi wiini barka ceŋ-ceŋ n’edi war basga na kaɗataŋ.

⁴Na ɓa Edomitekai, pinziba na wiini Ezaw, e miɗi li ɓa: ɗai e kirpiyi, amma aga mi rgi fuŋyi n’abakai n’a tuura edi ɗa amai ɗa, EPIƊ-ƊAI zi Spak paŋ a na muɗa maini nɵa: e rgiŋ wiiɗi, aga mu hoŋ azumai pra, ɗai aga e ɵiɗi yiki ɓa: "Afti na wiini meefeŋ", pinziba n’EPIƊ-ƊAI aŋ gaini, gaini hiy n’abai, ɵa haa kureɗ.

⁵Arki aga a talaŋ, aga ki miɗi gaini miki lai ɓa: EPIƊ-ƊAI ɗa a abai, haa edi par duɓani afti na wiiɗi Izrayel.

⁶EPIƊ-ƊAI zi spak paŋ a muɗa siɗi paakai zi ɓaka maini nɵa: Ahi paŋ a sa hormo wiini epini, ɗif zi sda paŋ wiini epin-gezani lai, nɵa na ɓa ta m’Api, hormoŋa ɗa aŋ wata ɗa? Na ɓa m’Epin-gezaki, ki ɗa hûniŋa ɗi? Tiki paakai zi ɓaka, na ki miisi yikiŋa, amma ki miɗi: mi miisuku maɵa maɵa ɗa ɗa?

⁷Ki kisi wazagai zi simi na haharai midini gûwiŋ zi ɓaka na wiya, ki miɗi pra ɓa: mi zi zi hi-hir suku ɗa war a maɗa? A na ɗa gaini miɗi na ki miɗi ɓa: gûwiŋ zi ɓaka na wiini EPIƊ-ƊAI a nafa kai.

⁸EPIƊ-ƊAI zi Spak paŋ a na muɗa maini nɵa: Won hlai na ki zi ɓaka gaini farai na malvanai, ki zi ɗa a meefeŋ kai ɗi? Zaw ɓa ki kisi na daŋalaŋai, zaw zi veglek, ki hiini ɓa a meefeŋ kai ɗi? Ka wala na mai hanɗa ɵa wiini Lawan haw le aga a yimaŋ tuku ɗi? Aga a yumuku sini pɗem ɗi?

⁹Tiyana ɗa, mu siiwiki, siiwiŋa Ta Alaw na wiiki kapai mu hiina haw buriki, wala hanɗa a halasi siki par, aga mu yimiki gaini firiyi ɗi? Zaw kai. A miɗi na sini EPIƊ-ƊAI zi Spak paŋ par.

¹⁰EPIƊ-ƊAI zi Spak paŋ a muɗa: Arbaki par ɗa ɗif n’aga a ɵa mini hlai ka, kapai ki yi afu kadai meere warni gûwiŋ zi ɓaka na wiya kai ɗa asiya ɗa? Firyiŋa miɗiki kaalai, ɓakaki na ki ziŋ ɗa ɗe a saŋa firiyi kaalai.

¹¹A muɗa pra: Piɗi futi na dawai par par haa piɗi futi na koskoi ta, pinzibaɗi ɗai paŋ, e siɗiti abaiŋa. War hlai paŋ ɗai e yi wazagai zi ɗûgûdi zi lûgûzi buriya, e kisi ɗa a ɓaka na hilu, buri ɓa pinziba paŋ a siɗiti abaiŋa ya, a miɗi na sini EPIƊ-ƊAI zi spak paŋ par.

¹²Amma tiki ki ziŋa aŋ meefeŋ kiɗi tiki gaini miɗi na ɓa: Gûwiŋ zi ɓaka na wiini EPIƊ-ƊAI a nafa kai, simi na woni ɗe a na hi-hir lai.

¹³A muɗa: Ki ɗa miɗi pra ɓa: a kayai na maɵa ɗa? Jaaki gaiɗi abaiŋa kai, ki kisi aŋ ɓaka ɗa a farai zi hill, na daŋalaŋai, na veglekkai lai, like na maini hanɗa nɵa ɗa mu yimaŋ tiki par ɗi?

¹⁴Haw midini ni zi mihill n’aŋ gaini farai na pɗamai war farani, amma a saŋa aŋ like ɗa a wala na veglek blaŋ, haw burini, buri Ta mu pai n’abai, pinzibaɗi ɗai paŋ e hûniŋa.