Read Mousgoum Malakiyas 3 Bible Online

Malakiyas 3 - Mousgoum bible

Malakiyas 3

¹Epiɗ-ɗai Alaw zi Spak paŋ a na waya seŋ maini nɵa: Aga mu ɵinaɗi ɵeŋ na wiya, aga a ziziniti futi wuza. Aga a cosi, a niya amlai warni tempelni, habar tiki kai, EPIƊ-ƊAI na ki ɗa biyiŋ ɗa, ɵeŋ na wiini bonuŋa na ki firyiŋ ɗa, a na gobi.

²Won hlai n’a halasi li ɗa, ɗif n’a kiɗa a ɗiya mini ɗa asiya ɗa? Won hlai n’a siŋkasi sini li edi ɗa, ɗif n’aga a ɗiya amai war wûlini zaw a na ɗi? Buri ni a na maini afu n’a ho sini kawai edi nɵa, maini zabul n’a ma sapa nɵa lai.

³Aga a sumna azumai maini ɗif n’a hiliya arzaŋ gaini afu kapai a yima haya-hayani gaini selte n’arni edi nɵa, aga a ziɗi pinzibani Levi edi sɗik, aga a ziɗi edi hilu maini n’e zi or gaini arzaŋ ɗa nɵa, kapai e kisi ɓakaɗi wuzani EPIƊ-ƊAI maini na gadai a ɗiyaŋ ɗa nɵa.

⁴EPIƊ-ƊAI aga a yima ɓakaɗi ɗai na Yuda gaiɗi na Yeruzalem gaini firiyi maini na ɗipar ɗa nɵa.

⁵EPIƊ-ƊAI zi Spak paŋ a na muɗa maini nɵa: Aga mu halaɗi siki aŋ ziki sariya, aga mu faka amai siɗi nagai n’e zilbi evek, gaiɗi nagai n’e zi maɵara, gaiɗi nagai n’e hi wala miɗi war jre kai, nagai n’e virgiɗi ɗai ɗi zi sda ɗa kai, n’e ziɗi gir wiiɗi falakai na war greŋ, gaiɗi aliyagoi na huyokai, nagai n’e zi meefeŋ siɗi morkokoi gaiɗi nagai n’e siŋa hormo kai ɗa lai.

⁶Buri ɓa, Ta EPIƊ-ƊAI, mu bunda kai, buri nɵa tiki, pinzibani Yakob, mu vidiki edi gamai kai.

⁷Haa sin mefeŋ na wiiɗi tiyakaiki par tiki ki zi pini gadai na wiya kai, ki yimiŋ kaalai. Wiyisi sa, Ta aga mu waisi miki lai. Amma ki miɗi ɓa: mi wiyisi ɗa war a ma ɗa?

⁸Mu wiyiki seŋ ɓa: Ɗif nɵa a kiɗa a duula Alaw ɗi? Paŋ ktai tiki ki ɗa dûûliŋa koo! Ki miɗi ɓa: Mi duuluku war a ma ɗa? Ki dûûliŋa war sini doogoni wazagai gaini like ɗa.

⁹Haw gara buriki, tiyana tuusa aŋ miɗiki, tiki gaini hlaiki paŋ, buri ki ɗa dûûliŋa.

¹⁰Kisi doogoni wazagai amlai war tempel na wiya war jre, kapai wala zi simi a ɗukla amlai war tempel na wiya kai, Mu siiwiki, titimiŋa haw le, na ɓa mu mala mini hlai n’amai edi buriki kai ɗa, zaw na ɓa mu ɵinaɗi ɓiki miɗiki abai haa a suwa kai ɗa. A miɗi na sini EPIƊ-ƊAI zi Spak paŋ par.

¹¹Aga mu caka ayuwi buri a tuura seyemki n’arni afti ɗa par kai, kapai luwuŋ zi vin na wiiki n’edi war vowaiki a wa ali, a miɗi na sini EPIƊ-ƊAI zi Spak paŋ par.

¹²Pinzibaɗi ɗai paŋ aga e miɗi ɓa ki ɗi pinziba zi barka, buri aftiki aga a bunda aŋ afti zi der, a miɗi na sini EPIƊ-ƊAI zi Spak paŋ par.

¹³EPIƊ-ƊAI a muɗa ɓa: Ki miɗi seŋ na ɗewek sa. Tiki ki miɗi ɓa: Seŋ na meefeŋ na mi miɗiŋ suku ɗa a na wata ɗa?

¹⁴Tiki ki miɗi ɓa: Ɗai e zi ɵeŋni Alaw na ɗa, a wala kadai, tiyi mi zi ɵeŋni haa ɗa, mi nivi ɗa a ma ɗa? Mi zi groho wuzani arni EPIƊ-ƊAI zi Spak paŋ haa, mi nivi wala kai,

¹⁵Tiyana, mi tiliŋ ɓa nagai na kûlini-si warɗi ɗa, pɗamai e ɗi nagai, nkam e riyi wuzaɗi ɗa e ɗi nagai na maafanai lai, ɓa koo e piyini mini Alaw tekeɗeɗi ɗa, a na ziɗi wala na meefeŋ kai bas.

¹⁶Nɵa nagai n’e sini hormo wiini EPIƊ-ƊAI ɗa, e miɗi arbaɗi marɗi; EPIƊ-ƊAI a tika hangalni siɗi, a ziɓira seŋɗi. Nagai n’e hûni EPIƊ-ƊAI, n’e sini hormo lai ɗa, yikiɗi a ɗo war maktuɓ zi ɵi humok wuzani.

¹⁷EPIƊ-ƊAI zi Spak paŋ a muɗa: Nagai e ɗi wiya, e ɗi wiya kiiya, war mefeŋ n’aga mu siŋka spakŋa edi ɗa, aga mu ziɗi meefeŋ kai, maini api n’a kota ahini n’a zina pini min seŋ par nɵa

¹⁸War mefeŋ hanɗa, aga ki siɗi ɓraw n’arbani ɗif na jre gaini na meefeŋ ɗa, arbani ɗif n’a za ɵeŋni Alaw gaini ni n’a za ɵeŋni kai ɗa.

¹⁹A na gizi, mefeŋ ɗa, a yuvuga maini waŋ z'afu nɵa. Nagai n’e kûli siɗi gaiɗi n’e zi meefeŋ ɗa paŋ, aga e bindi maini evek nɵa; mefeŋ n’a na halasi ɗa aga a yiɗi edi. A miɗi na sini EPIƊ-ƊAI zi Spak paŋ par. Sirdaiɗi ktai maa aga a hina kaalai, tiɗi ktai maa a hina kaalai.

²⁰Amma buriki tiki na ki si hormo wiini yikiŋa ɗa, Futi na jre-ɗikat aga te diyasi amai, zûûli aga a za war hlai n’a wa graŋni midini ɗa, aga ki niyi anene, wala ktai maa a huwyiki kai, ki pri amai gaini firiyi lai, maini ali ɵaakai n’a ca fiyaw pɗem nɵa.

²¹EPIƊ-ƊAI zi Spak paŋ a muɗa maini nɵa: War mefeŋ n’aga mu siŋka spakŋa edi ɗa, aga ki kirpiɗi ɗai na maafanai azumai pin eziki, maini zilgit nɵa.

²²Hini miɗiki a kɵa gaini gadai zi ɗû na wiini Musus na ɗifŋa Mu sini gadai zi ɗiyi gaini gadai zamai zamai lai amai midiɗi huwuŋ Horeb, kapai a siŋɗi wiiɗi ɗai na Izrayel paŋ.

²³Wuzani hlai na mefeŋ na wiini EPIƊ-ƊAI a cosi, mefeŋ n’abai, zi gir hanɗa, aga mu ɵinikiɗi ɗif na min Alaw Eliyas su haw.

²⁴Aga a kasi ɵeɗ arbaɗi tamai gaiɗi ali, arbaɗi ali gaiɗi tamai lai. Sla kai ɗa aga mu halaɗi mu vada aftiki paŋ edi.