Read Mousgoum Matewus 10 Bible Online

Matewus 10 - Mousgoum bible

Matewus 10

¹Asakal par a yikiɗi ɗaini zi hitri na doogo pi sulu sini, a siɗi spak aŋ birga ksalai na haharai edi, aŋ zûûla pinzibani veglek paŋ gaini huruf paŋ lai.

²Yikiɗi apostelai na doogo pi sulu a na maini nɵa: n’avut ɗa a Simun na zinani ɓa: Peter, gaini Andreya na tawalni, Yakob n’ahini Sebedewus gaini Yohana na tawalni.

³Filip gaini Bartelemawus, Tomas gaini Matewus ɗif zi tiri lambu, Yakob n’ahini Alfewus gaini Tadewus,

⁴Simun na Kanane gaini Yudas Iskariyot, ni n’a saŋ edi.

⁵Hanɗa e ɗi na doogo pi sulu na Yesu a ɵiniɗi edi, a gidiɗi, maini nɵa: ki hili warɗi futi na wiiɗi ɗai n’e ɗi pinzibaɗi Yudeyakai kai ɗa kai, ki niyi aha warni fuŋ n’abai na wiiɗi Samariyakai kaalai.

⁶A pɗem ɓa ki hili sini adumai na war pinzibaɗi Izrayel n’a ɓa edi.

⁷Won hlai na ki ɗa hili ɗa, ki ɓiki labar hanɗa edi ki miɗi: paini fuŋ-n’Alaw te ŋasi gobi.

⁸Ki zûûliɗi zi veglek, ki ɵiyiɗi ɗai zi mri amai, ki bindiɗi zi dugumai hilu, ki birgi ksalai edi lai. Tiki ki niviŋ kadai, aga ki ɵiyiɗi edi kadai lai.

⁹Ki mili or zaw arzaŋ, zaw sulai zi kiya warni guɓaki kai,

¹⁰sak burini morkoiki kai, gumazi sulu kai, harabak kai, amaraŋa kai, buri ɗif zi sda a kiɗa aŋ nava simini.

¹¹War fuŋ n’abai zaw n’agwi paŋ na ki niyi li warni ɗa ki yimi labar pɗem, na ɓa ɗif n’a kiɗa a yimiki sini a na ɗa, ki simni ahani haa sini hiliki na warni par ta.

¹²Ki niyifu aha war dalam paŋ ɗa ki ɵiɓi wuti.

¹³Na ɓa dalam hanɗa a kiɗa aŋ nava ɵeɗ hanɗa, ɵeɗ na wiiki aga a halasi midini, amma na ɓa, a kiɗa aŋ nava kai ɗa, ɵeɗ na wiiki a wayasi siki lai.

¹⁴Won hlai n’e yimiki siɗi kai, na e ɵini seŋki kaalai ɗa, ki hili edi warni dalam hanɗa par, zaw war fuŋ n’abai hanɗa par ɗa ki ɵiɓi alogodo n’eziki edi.

¹⁵Jre, mu miɗiki war mefeŋ zi sariya, afti na Sodoma gaini na Gomora aga a siɗa gir maini fuŋ n’abai hanɗa nɵa kai.

¹⁶Ta mu ɵiniki maini adumai n’arbani belemke nɵa, buri nɵa ki bindi yalakai maini wala meefeŋ nɵa, hilu maini dere nɵa lai.

¹⁷Ki giɗimi siki pɗem buriɗi ɗai, buri aga e siki edi miɗi sariya, aga e ɵûɗi siki edi gaini daɓala warni sinagogne na wiiki.

¹⁸Aga e kiki wuzaɗi Lawanai gaiɗi paakai buriya ta, aga a za aŋ zaida buriɗi gaiɗi pinziba na Yudeyakai kai ɗa lai.

¹⁹Amma won hlai n’e siki li edi ɗa, aga ki giriŋi burini miɗi n’aga ki miɗiŋ ɗa kai, buri seŋ n’aga ki miɗiŋ ɗa kaalai. Seŋ n’aga ki miɗiŋ ɗa aga a sa siki war hlai ni tizaw,

²⁰buri aga ki miɗi ki ɗi tiki kai, amma seze na wiini Epiki n’a na warki ɗa aga a muɗa ɗa a ni.

²¹Tawal aga a sa tawalni edi mini mri, api aga a sa ahini edi lai, ali aga e fiki amai siɗi tamaiɗi, e siɗi mini mri,

²²ɗai paŋ aga e bili gaw siki burini yikiŋa, amma ni n’a siika pini yimi haa hlai zi dibi, ni aga a kora.

²³Na ɓa e ɗa ziki gir war fuŋ n’abai ktai ɗa, ki liwi warni na zamai, jre mu miɗiki aga ki gûni fuŋ n’abakai na Izrayel ɗa wuzani gizini ahini ɗif paŋ kai.

²⁴Ɗif zi hitri a suwa api n’a hitraŋ ɗa kai, bege a suwa Epin-gezani kaalai.

²⁵Ɗif zi hitri ɗa, a bunda maini api n’a hitraŋ ɗa ɵa, bege maini Epin-gezani ɵa lai. Na ɓa e yiki Epini dalam ɗa ɓa: Belzebul, aga e yikiɗi nagai n’aha war dalamni ɵa azi gama ɗa?

²⁶Buri nɵa ki hûniɗi kai, buri wala na gaini ŋûyi cok n’aga a siŋka edi kai aŋ kai, wala n’a za war kuɗuhai n’aga a sɗa edi kai aŋ kaalai.

²⁷Buri wala na mu miɗiŋki war gegeŋ ɗa, ki miɗiŋ edi war gaglai, wala n’a muɗa ɵimaki war helek ɗa, ki miɗiŋ edi amai midini daba zi mili.

²⁸Ki hûniɗi nagai n’e fiɗi si, amma e kiɗi aŋ fiɗi suŋfaɗi agul ɗa kai ɗa kai, amma ki hûni n’a siɗa aŋ ɓa suŋfaɗi agul gaini si paŋ arni afu n’a vada kai.

²⁹Zezek sulu a suma karanga ktai ɗi? Paŋ ktai, ktai n’arbani n’a kɵa azumai midini afti aŋ kai, sai pini dirini Epiki.

³⁰Amma tiki ɗa, koo ayir na miɗiki kaw aŋ gaini pɵi ta.

³¹Buri nɵa ki hûni kai, tiki ki siiwi zezek viya.

³²Buri nɵa, asiya ɗi paŋ n’a muɗa edi wuzani arɗi ɗai ɓa: ni a wiya, Ta lai, aga mu muɗa edi midini wuzani Apa na war fuŋ-n’Alaw lai.

³³Amma na ɓa ɗif a ɓuɓura mini buriya wuzani arɗi ɗai, Ta aga mu ɓuɓura ma burini wuzani Apa na war fuŋ-n’Alaw.

³⁴Ki hiini kai ɓa mu halasi aŋ kasi ɵeɗ midiɗi yai ɗi ɗa, a na ɵa kai, mu kasi ɗa a ɵeɗ kai, amma kaɵkar.

³⁵Buri mu kasi ɗa a braw arbani ɗif gaini epini, arbaɗi ahiyagoi gaiɗi emiɗi, arbaɗi munini ahi gaiɗi suwulɗi.

³⁶Gawni ɗif paŋ e ɗi ɗai n’ahani dama.

³⁷Ɗif n’a dara epini zaw emini a suwaŋa ta ɗa a kiɗa buriya kai, ni n’a dara ahini na wus zaw na muni a suwaŋa ta ɗa a kiɗa buriya kaalai.

³⁸Ni n’a tika dagrani amai aŋ tapa pa kai, a kiɗa buriya kai.

³⁹Ni n’a godo suŋfani li ɗa aga a baŋ, ni n’a ɓa suŋfani li buriya ɗa aga a navaŋ.

⁴⁰Ni n’a yimiki li sini ɗa a yimaŋa muta, ni n’a yimaŋa ta li sini ɗa a yima na ɗa a ni n’a ɵinaŋasi ɗa.

⁴¹Ni n’a yima ɗif na mini Alaw sini, buri ɓa a ɗif na mini Alaw, aga a nava vrak na wiini ɗif na mini Alaw. Ni n’a yima ɗif na jre ɗikat sini buri ɓa a ɗif na jre ɗikat ɗa, aga a nava vrak na wiini ɗif na jre ɗikat.

⁴²Asiya ɗi paŋ n’a sa yem zi ci na ɗarak wiini ktai n’arbaɗi n’agogoi hanɗa buri ɓa a ɗif zi hitri ɗa, jre mu miɗiki vrakni aga a ɓa edi kai zaŋ.