Read Mousgoum Matewus 12 Bible Online

Matewus 12 - Mousgoum bible

Matewus 12

¹War mefeŋ ni ɗa Yesu a vuga arbani vuwai na wiini algama, war mefeŋ na wiini Sabbat. Wiyamai te yimiɗi ɗaini zi hitri, e tiki piɗi aŋ hiɗi midini seyem buri e limiŋ.

²Won hlai na Farisekai e tili hanɗa, e miɗini: tala, ɗaiku zi hitri e zi wala n’aŋ gaini ɗili buri a za war mefeŋni Sabbat kai.

³Amma a miɗiɗi: ki tili wala na David a zaŋ won hlai na wiyamai te zaŋ gaiɗi nagai n’e ɗa gaini war ɗû kai ɗi?

⁴Maɵa ɗa a niya amlai warni dalamni Alaw, maɵa ɗa e limi peŋ n’a sa sini Alaw, paŋ ktai pini seŋ zi gadai ɗa a wala zi ɗili burini ni gaiɗi nagai na pini lai, e limiŋ ɗa e ɗi paakai zi ɓaka kiɗi!

⁵Zaw ki tili warni ɗû ɓa, paakai zi ɓaka war mefeŋni Sabbat ɗa e ɓilki Sabbat amlai warni tempel paŋ ktai seŋ midiɗi kai ɗa, ki tiliŋ ɵa kai ɗi?

⁶Amma wala n’a suwa tempel aŋ won na.

⁷Na ɓa ki siɗi fu ezini seŋ n’a muɗa ɓa mu dara yim, amma ɓaka kai, nɵa ki kûti sariya midiɗi nagai na seŋ na meefeŋ midiɗi kai.

⁸Buri Ahi a Pai midini Sabbat lai.

⁹A haladi edi woni par a niya warni sinagogneɗi.

¹⁰Ɗif ktai a na woni na tini gaini mri. E zilbi Yesu: Seŋ zi gadai a hina ɗif aŋ zuula ɗif zi veglek war Sabbat ɗi?: Handa ɓa kapai e siɗi aŋ pi seŋ midini.

¹¹Amma wiyiɗi seŋ a muɗa: asiya n’arbaki n’adumini te na ktai, ɓa te kɵa warni war mefeŋni Sabbat, aga a yimiti buri a tikiti amai kai ɗi?

¹²Amma ɗif ɗa a sûwiti adumi kai ɗi? Buri nɵa seŋ zi gadai a hina ɗif aŋ za pɗem war Sabbat.

¹³Won hlai ni a muɗa sin ɗif, maɗati tuku edi. A miɗiti edi, te bunda pɗemi, maiɗi na ktai nɵa.

¹⁴Farisekai e niyi anene, e kiti seŋ midini maɵa ɗa aga e biŋ.

¹⁵Amma Yesu a ɵina seŋ hanɗa, a yima sini edi woni par, faraɗi ɗai viya a tapa pini, a zûûliɗi paŋ lai.

¹⁶A gidiɗi gaini gdaŋ buri e miɗiɗi wiiɗi ɗai gaini kai.

¹⁷Kapai wala na ɗif sna mini Alaw Esaya a muɗaŋ ɗa aga a va amai, won hlai n’a muɗa:

¹⁸Hanɗa a ɵeŋ na wiya na mu varaŋ edi ɗa, ahi na mu daraŋ gara, na suŋfaɗi agula a firyaŋ gara lai, aga mu hinasi Sezeŋa midini, aga a muɗa edi midini jre-ɗikat wiiɗi

¹⁹Aga a paya sispai kai, a ɗuula kaalai, ɗif aga a ɵina wula warni futi n’abakai kaalai.

²⁰Vayai na gaini gûmzi ɗa aga a haɗaŋ edi kai, kalu z'afu n’a z'agiyiŋ ɗa aga a fuɗaŋ kai, haa a ka jre ɗikat aŋ rɗa amai.

²¹Pinziba na zamai aga e biyi pini ɵeɗ war yikini.

²²Nɵa ɗai e kinisi ɗif na ksalai aŋ midini, na melveŋ na numul sini. A zuulaŋ haa ɗif na numul a muɗa a tala lai.

²³Firiɗi ɗai paŋ e miliŋi pin ziɓiri e miɗi, ni hanɗa a Ahini David kai ɗi?

²⁴Amma won hlai na Farisekai e ɵini hanɗa, miɗi, ɗif hanɗa a birga ksalai edi gaini wala zamai kai, sai gaini Beelzebul, paiɗi ksalai.

²⁵Amma won hlai na Yesu a sɗa hiiniɗi a miɗiɗi, pai paŋ na te za gaw sin siɗi dama, aga te ɓilka, fuŋ paŋ gaini dalam paŋ n’a za gaw sin sini dama a kiɗa aŋ ɗiya kai.

²⁶"Ba Satan a birga Satan edi, nɵa a za gaw sin sini dama, paini aga te ɗiya maɵa ɗa?

²⁷'Ba muta mu birga ksalai edi gaini Beelzebul, aliki e birgiɗi edi gaini a ma ɗa? Buri nɵa, aga e zi aŋ paakai n’e ɗûkliti sariya miɗiki.

²⁸Amma na ɓa mu birga ksalai edi gaini Sezeni Alaw, nɵa pai n’Alaw te cosi siki.

²⁹"Ba ɗif a nagga ɗif na gdaŋ avut kai, a sɗa aŋ niya warni dalamni ɗif na gdaŋ aŋ vurma wazagaini maɵa ɗa? A naggaŋ ɓak, a sɗa aŋ vurma dalamni.

³⁰Ni na warni aŋ gaigai gaya, a za gaw sa, ɗif n’a tapa wazagai gaya kai, a ɵara edi.

³¹Buri nɵa mu miɗiki, ɗai aga e nivi ni burini tuwur gaini tirki paŋ, amma burini tirki na sin Seze-sɗik, ɗif a nava ni kai zaŋ.

³²Na ɓa ɗif a muɗa seŋ na meefeŋ burini Ahini-ɗif, hanɗa aga a hiniŋni, amma ɓa ɗif a muɗa seŋ na meefeŋ burini Seze-sɗik, hanɗa aga a hiniŋni warɗi yai hanɗa kai, warɗi n’aga te halasi ɗa kaalai.

³³Na ɓa luwuŋ na pɗem, alini pɗamai lai; amma na ɓa luwuŋ a meefeŋ, alini maafanai lai. Buri ɗif a sɗa luwuŋ sin alini par.

³⁴Pinzibani hibe, tiki na maafanai, ki siɗi aŋ miɗi wazagai na pɗamai maɵa ɗa? Buri wazagai n’a vasi warɗi agul pulmuɗuk, miy a muɗaŋ edi.

³⁵Buri ɗif na pɗem a kasi wazagai na pɗamai edi warni daini na pɗem par, ɗif na meefeŋ a kasi wazagai na maafanai warni godaini na meefeŋ par.

³⁶Amma mu miɗiki, seŋ zi kadai paŋ na ɗai e miɗiŋ, hanɗa aga a zilba tiɗi war mefeŋ sariya.

³⁷Buri pin seŋku aga ku sɗa edi aŋ jre-ɗikat, pin seŋku sariya aga te ko muduku lai.

³⁸Buri nɵa zamai n’arbaɗi ɗai zi ɗû wazagai gaiɗi Farisekai e wiyi seŋ e miɗini, Api-si-hitri mi diri mi tili wala zi siŋki tuku par.

³⁹Amma a waya seŋ a miɗiɗi, pinziba na meefeŋ, zi rhai, a paiya wala zi siŋki. Wala zi siŋki aga a sa siɗi kai, sai siŋki na wiini ɗif na min Alaw Yonas.

⁴⁰Buri maini Yonas a sumna mefeŋ hu, girvudi gaini duvuk, warni hilif n’abai, nɵa lai, Ahini-ɗif aga a sumna mefeŋ h, girvudi gaini duvuk, arni afti.

⁴¹Maɵagai na Ninive aga e fiki amai war mefeŋ zi sariya gaini pinziba hanɗa, aŋ kûti sariya midiɗi, buri nagai e himi pin ɓikini seŋ na wiini Yonas, tili, n’abai a suwa Yonas aŋ won na.

⁴²Muni zi pai na midini afti n’amai par, aga te faka amai war mefeŋ zi sariya gaini pinziba hanɗa, aŋ kûti sariya midiɗi, buri na te halasi war min afti zi dibi par aŋ ɵina yel na wiini Salmun, tili, n’abai a suwa Salmun a na won na.

⁴³Won hlai na ksalai na hi-hir a niyasi edi warni ɗif par, a hala arbani hlai s'alak aŋ paiya si n’amla, amma a navaŋ kai.

⁴⁴A muɗa: aga mu waya wardilimiŋa na mu halasi warɗi par ɗa; a waya warɗi lai. A niviti warɗi kadai su, gai dûgi edi silak, gai zizini gai futini lai.

⁴⁵A hala a payasi marni zamai muguzak, na meefeŋɗi a suwa na wiini, e niyi amlai, e zizini siɗi warni. Ɗif hanɗa a bunda meefeŋ a suwa n’avut ɗa. Pinziba na meefeŋ na tiyana, aga a za siki nɵa lai.

⁴⁶Yesu a nafu aŋ muɗa gaini firiɗi ɗai hai, hlai n’emini gaiɗi tawalakaini e cûsi. E ɗiyi anene par, e firyi e hiɗi kalaŋ gaini.

⁴⁷Ɗif ktai a halasi a miɗini wiini Yesu, Tala, amuku gaiɗi tawalakaiku e ɗa anene, e firyi e nivi gaiku.

⁴⁸Amma a wiyini wiini ɗif n’a na miɗini seŋ ɗa: Ama te siya ɗa? Tawalakaya e ɗi miɗi siya ɗa?

⁴⁹Asakal par, a maɗa tini di midiɗi ɗaini zi hitri a muɗa, ama gaiɗi tawalakiya e ɗi na.

⁵⁰Buri ɓa asiya ɗi paŋ n’a za dirini Apa na war fuŋ-n’Alaw, ni a tawala na wus gaiɗi na muni gaiɗi ama lai.