Read Mousgoum Matewus 13 Bible Online

Matewus 13 - Mousgoum bible

Matewus 13

¹War mefeŋ ni dama Yesu a niya anene warni dalam par a sumna ɵimani yem-ra-n’abai.

²Firiɗi ɗai viya a tapasi sini, haa a niya warni hulum n’abai a sumna warni. Firiɗi ɗai e simni amai wulani daŋ par.

³A miɗiɗi wazagai viya war seŋ zi siŋka maini a muɗa: Tili ɗif zi sûûɗi seyem a hala edi aŋ suuɗaŋ azumai.

⁴Won hlai n’a na suuɗaŋ seyem zamai a yaka ɵiimaɗi futi, wala zi ɗifli a halasi a sumaŋ.

⁵Zamai a yaka midini hlai zi kriyit, hlai n’a nava afti abai kai, a diya witaw, buri aftini a hulum kai.

⁶Amma won hlai na futi te diyasi amai te yaŋ edi, buri sirdaini aŋ kai, a siita edi.

⁷Zamai a yaka arbani hedek, hedek a wula amai a rozoŋ.

⁸Zamai a yaka arni afti na pɗem, a wa ali, zamai a za miya, zamai a za doogo doogo ɵaara, zamai a za doogo doogo hu lai.

⁹Ni na ɵimani zi ɵini a na, aga a ɵina.

¹⁰Ɗai zi hitri e hili sini e miɗini, ku muɗa siɗi war seŋ zi siŋka maini buri ma ɗa?

¹¹A waya seŋ a miɗiɗi, buri a sa siki tiki aŋ siɗa wazagai zi ŋoiyai na wiiɗi paini fuŋ-n’Alaw, amma a sa siɗi nagai kai.

¹²Buri ni na wiini a na, aga a sa sini pra, aga a va abai gara lai, amma ni na wiini aŋ kai, walani n’a na, hanɗa aga a yima edi sini par lai.

¹³Buri nɵa mu ɓaka seŋ siɗi war seŋ si siŋka maini, buri e tili paŋ ktai e tili kai, buri e ɵini paŋ ktai e ɵini kai, e ɵini ezini edi kai.

¹⁴Buriɗi nagai, seŋ na wuze na wiini Esaya a vali, n’a muɗa: Aŋ ɵini aga ki ɵini, amma aga ki ɵini ezini edikai, aŋ tili aga ki tili, amma aga ki siɗiŋ kai zaŋ.

¹⁵Buri agulɗi ɗai hanɗa a siita gadaŋ, ɵimaɗi a ɵina yim-yim, e dûgi ardi duk, kapai e tili gaini arɗi kai, e ɵini gaini ɵimaɗi kaalai, e siɗiŋ edi gaglai gaini agulɗi kaalai, e siɗi aŋ himi kai, kapai mu sida aŋ zuuliɗi kaalai.

¹⁶Amma ɵeɗ midini arki, buri arki a tala, buri ɵimaki lai, ɵimaki a ɵina.

¹⁷Buri jre, mu miɗiki, ɗai na min Alaw gaiɗi na jre-ɗikat viya e piyi aŋ tili wazagai na ki tiliŋ, amma nagai e tiliŋ kai, aŋ ɵini wazagai na ki ɵiniŋ, amma e ɵiniŋ

¹⁸Seŋ zi siŋka maini burini ɗif zi sûûɗi seyem te siŋka edi maini nɵa.

¹⁹Won hlai na ɗif a ɵina seŋ midiɗi pai, amma a ɵina ezini edi kai, na meefeŋ a halasi a mula wazagai n’a suuɗa warɗi agulni par, hanɗa a ni n’a nava sûûɗini seyem ɵimaɗi futi.

²⁰Amma ni n’a nava sûûɗini seyem war hlai zi kriyit, a ni n’a ɵina seŋ, tizaw tar a yimaŋ gaini firiyi.

²¹Amma sirdai warni kai, a safa burini hlai n’agwi kadai, gir gaini ɓarai a fakasi li burini seŋ ɗa, a wa sini edi tar.

²²Ni n’a nava sûûɗini seyem arbani hedek, hanɗa a ni n’a ɵina seŋ, amma hiini na wiiɗi yai hanɗa gaini tanai na wiini farai a roso seŋ ɗa warni, a wa ali kai.

²³Amma ni n’a nava sûûɗini seyem arni afti na pɗem ɗa, a ni n’a ɵina seŋ, a ɵina ezini edi lai, a wa ali, zamai a sa azi miya, zamai azi doogo doogo ɵaara, zamai doogo doogo hu lai.

²⁴Seŋ zi siŋka maini na zamai a muɗaŋ edi siɗi a muɗa: paini fuŋ -n’Alaw te na maini ɗif n’a suuɗa seyem na pɗem war vowaini.

²⁵Amma won hlai na ɗai e kili weseŋ, gawni halasi a suuɗa evek na meefeŋ arbani algama, a hala wiini

²⁶Amma won hlai na seyem a diya amai, a wa ali, evek na meefeŋ a siŋka sini edi lai.

²⁷Nɵa ɗai zi sida na wiini epin-dalam e hilisi e midini, api, ko suuɗa war vuwaiku a seyem na pɗem kai ɗi? Evek na meefeŋ a halasi arbani wata par ɗa?

²⁸A miɗiɗi, gaw ktai a za hanɗa. Ɗai si sida e midini, ku dara ɓa mi hili mi rɗiŋ edi ɗi?

²⁹Amma a muɗa, zaw kai, kapai ki rɗi algama amai, won hlai na ki tipi evek amai ɗa kai.

³⁰Hiniŋ sulu paŋ a wula ktai, haa hlai zi hiɗi, won hlai na hlai zi hiɗi a cosi li, aga mu miɗiɗi wiiɗi ɗai zi hiɗi, tipi evek na meefeŋ avut ki rgiŋ buri ki yiŋ edi, amma ki mili algama warni vreŋa.

³¹A muɗa seŋ zi siŋka maini na zamai siɗi pra, a muɗa: Paini fuŋ-n’Alaw te na maini seyemni Seneve na ɗif ktai a suuɗaŋ warni vuwaini.

³²Ni, n’agwiyeŋe kadai arbani seyem paŋ, amma won hlai n’a wula amai li, ni a abai a suwa sugoi paŋ, a bunda aŋ luwuŋ haa wala zi ɗifli n’arbani hlai n’amai a halasi a yima gutni amai sin graŋni.

³³A miɗiɗi seŋ si siŋka maini na zamai a muɗa: Paini fuŋ-n’Alaw te maini is na muni te tikaŋ, te koŋ arni daramni avudi hu, haa is a niya arni paŋ.

³⁴Wazaagai hanɗa paŋ Yesu a muɗaŋ wiini firiɗi ɗai war seŋ zi siŋka maini, a miɗiɗi: A miɗiɗi seŋ kai sai war seŋ zi siŋka maini.

³⁵Kapai wala na ɗif na mini Alaw aga a muɗa, a va amai.

³⁶Mu dara mu mala ma amai war seŋ zi siŋka maini, mu dara mu muɗa edi wazagai n’a na war ŋoyai war piɗi yai zi tiki par.

³⁷Asakal hanɗa a hiniɗi ɗai e hili, a niya warni dalam. Ɗaini zi hitri e hilisi sini e miɗi, siŋkiyi seŋ zi siŋki maini midini evek na war vuwai ɗa. A waya seŋ a muɗa: Ni n’a suuɗa seyem na pɗem hanɗa a Ahini-ɗif.

³⁸Vuwai te yai, seyem na pɗem hanɗa e ɗi aliɗi pai, amma evek e ɗi alini na meefeŋ.

³⁹Gaw n’a suuɗa hanɗa a Mat, hlai zi hiɗi a dibiɗi yai. Ɗai zi hiɗi e ɗi ɗai zi ɵeŋ na war fuŋ-n’Alaw.

⁴⁰Maini evek a tapa a ya arni afu, nɵa lai aga a za war dibiɗi yai.

⁴¹Ahini-ɗif aga a ɵiniɗisi edi ɗaini zi ɵeŋ na war fuŋ-n’Alaw, nagai aga e tipi edi warɗi paini par wazagai zi tanai paŋ gaiɗi nagai n’e zi woɗi futini ɗikat kai.

⁴²Aga e ɵiŋkiɗi warni waŋ z'afu, woni a tuwi gaini hirɗini sisiyeŋ.

⁴³Nagai na jre ɗa aga e ŋili maiɗi futi nɵa warɗi pai na wiini Epiɗi. Ni na ɵimani a na aga a ɵina.

⁴⁴Paini fuŋ-n’Alaw te na maini godai n’a ŋûyi cok warni vuwaiˆ na ɗif ktai a navaŋ a ŋoyaŋ. War firyini a hala a wurasi wazaagaini paŋ edi a wura vuwai ni ɗa.

⁴⁵Paini fuŋ-n’Alaw te na pra maini ɗif zi cakala, n’a paya aidaw na pɗamai.

⁴⁶Won hlai n’a niviti aiduwi na wiriɗi abai, a hala edi a wura wazagaini paŋ edi, a wiriti.

⁴⁷Paini fuŋ-n’Alaw pra te na maini ava n’a ɵiŋka a agoɗom n’a diŋga pin zibani hilif paŋ.

⁴⁸Won hlai n’a va li, e sipiŋ amai gadaŋ, e simni azumai e mili na pɗamai warni magaza, amma na maafanai e pûkiiŋ edi.

⁴⁹Maini nɵa aga a za war dibiɗi yai. Ɗai zi ɵeŋ na war fuŋ-n’Alaw aga e hili edi e ɓirwiɗi na maafanai edi siɗi na jrekai par.

⁵⁰E ɵiŋkiɗi warni waŋ z'afu, woni a tuwi gaini hirɗini sesiyeŋ.

⁵¹Ki ɵini ezini seŋ hanɗa edi paŋ ɗi E miɗini, nkam.

⁵²A miɗiɗi, buri nɵa, ɗif zi ɗû wazagai na ɗa asiya asiya paŋ ɗa a bunda aŋ ɗif zi hitri na wiiɗi pai n’Alaw, a na maini epin-da-lam n’a ka edi warni godaini par wazagai na hahakai gaini wazagai na walakai.

⁵³Won hlai na Yesu a faada seŋ zi siŋka maini hanɗa, a hina hlai ni, a hala edi woni par.

⁵⁴A halasi midini aftini, a hitriɗi warni sinagogneɗi, haa e bindi hiyak, e miɗi, ɗif hanɗa a nava yel nɵa gaini sda na zi sipak na nɵa wata par ɗa?

⁵⁵Handa a ahini ɗif zi kilɗi luwuŋ kai ɗi? Emini yikiɗi mariya kai ɗi? Tawalakainiˆ a Yakob gaini Yosef gaini Simon gaini Yudas kai.

⁵⁶Tawalakaini na falakai, nagai parj e ɗa gaiyi won na paŋ kai ɗi? Ɗif hanɗa a nava wazagai nɵa paŋ wata par ɗa?

⁵⁷A bunda aŋ wala zi dibi buriɗi. Amma Yesu a midɗiɗi: Ɗif na mini Alaw e miisiŋ war hlai zamai kai, sai midini aftini warni dalamni lai.

⁵⁸A za sda zi spak woni viya kai burini yimi-kai na wiiɗi.