Read Mousgoum Matewus 14 Bible Online

Matewus 14 - Mousgoum bible

Matewus 14

¹Won hlai na Herod, n’a sumna aŋ pai midini galni afti n’ag'aŋ puɗu, a ɵina labarni Yesu,

²a miɗiɗi wiiɗi ɗaini zi ɵeŋ, hanɗa a Yohana zi Baptisme n’a ɵiyasi amai war mri par, buri nɵa gadaŋ hanɗa a za warni.

³Buri Herod a yima Yohana, a naggaŋ, a ɵaŋ warɗi daŋgai lai, burini seŋɗi Herodiade munini Filip, na tawalni.

⁴Buri Yohana a miɗini ɓa, seŋ zi gadai a hinuku aŋ tikiti kai.

⁵A dara aŋ fuɗaŋ edi, amma a huna firiɗi ɗai, buri e tiliŋ maini ɗif na min Alaw nɵa

⁶Amma war mefeŋ n’a wa warni ɗa, Herod, ahiɗi Herodiade te didema wuzaɗi ɗai n’e yikisi, Herod arni a yimiti gara.

⁷Buri nɵa a ha wala mini, buri a dara a siɗi wala paŋ na te zilbaŋ midini.

⁸Na, pin seŋ na wiiɗi emiɗi, te muɗa, ku saŋa homokni Yohana zi Baptisme warni tasa.

⁹Pai sini a kwima, amma burini wala n’a haŋ mini, buriɗi ɗai n’e ɗa gaini lai, a muɗa buri a sa siɗi.

¹⁰A ɵina ɗif buri a ɗuklasi homokni Yohana warɗi daŋgai par.

¹¹E kisi homokni warni tasa, e siŋɗi wiiɗi ahiyogoi, na te kaŋ siɗi emiɗi.

¹²Ɗaini zi hitri, e hilisi e tiki sini e piŋ, e hili e miɗi hanɗa wiini Yesu.

¹³Won hlai na Yesu a ɵina hanɗa, a zogo edi woni par gaini hulum, a yima sini edi war hlai zi baŋa. Won hlai na ɗai e ɵini hanɗa, e hili pini gaini eziɗi war fuŋ-fuŋ.

¹⁴Won hlai n’a niyasi amai gdaŋ, a tala firi n’abai, a hiina haw gara buriɗi, a zuuliɗi ɗai zi veglek n’e kiɗisi sini ɗa.

¹⁵Amma won hlai na futi-koskoi te zali, ɗaini zi hitri e hilisi sini e miɗi, hlai hanɗa a baŋa, futi te hala li lai, nɵa ku miɗiɗi e hili war fuŋ-fuŋ kapai e wuri wala zi simi miɗi ɗi kaalai.

¹⁶Amma Yesu a miɗiɗi, e hili buri ma ɗa? Tiki dama ki siɗi simi kai ɗi.

¹⁷E miɗini, aŋ tiyi na ɗa a peŋ ɵim gaini hilif sulu lai bas.

¹⁸A miɗiɗi: Kiŋasi.

¹⁹A muɗa wiini firiɗi ɗai buri e simni azumai arni evek ɗa, a mula peŋ na ɵim gaini hilif na sulu, a bunda arni amai war fuŋ-n’Alaw, a sa tese sin Alaw, asakal par, a ɗukla peŋ a siŋɗi wiiɗi ɗai zi hitri, ɗai zi hitri e siŋɗi wiiɗi firiɗi ɗai.

²⁰Nagai paŋ e simi, e vi lai, e mili n’a hina warni dologo, a va dologo doogo pi sulu.

²¹Nagai n’e simi e ɗa maɵagai dubu ɵim, falakai gaiɗi aliyagoi e piɵidi kai.

²²Tizaw tar, a saiya piɗi ɗaini zi hitri buri e niyi warni hulum, e hili wuzani anene kat. Won hlai ni a tika pin firiɗi ɗai buri e hili.

²³Won hlai n’a tikɗi piɗi ɗai edi li, a hala amai midiɗi huwuŋ, edi war baŋa aŋ siiwa. Won hlai na futi-koskoi te za li, ni a hina kiini woni.

²⁴Hulum n’abai a ɵiɓa edi arbani yem-ra-n’abai ɗa ka, maiyaw a ɵiɓa sini gdaŋ gara, buri ɓa smer a pasi arɗi tiɓ.

²⁵Amma gorof n’abai sek ɗa, Yesu halasi siɗi, a hala amai midini yem blaŋ.

²⁶Won hlai na ɗai zi hitri e tiliŋ a hala midini yern, hunai te yimiɗi, e miɗi, hanɗa a ksalai, e ɗûûli gaiɗi hunai.

²⁷Amma Yesu a miɗiɗi seŋ war hlai ni tar, a muɗa, ki hûni kai, mu ta, yimiti agulki.

²⁸Teena Peter a waya seŋ a muɗa, Epiɗ-ɗai, na ɓa ku tuku mal, hinaŋa buri mu halaɗi suku midini yem lai.

²⁹A miɗini: halasi. Peter a niyasi edi warni hulum par, a ɵa amai midini yem buri a hala sin Yesu sek.

³⁰Amma won hlai n’a tala smer na gdaŋ a huna, a tika pini aŋ buɗeha azumai a ɗuula a muɗa, Epiɗ-ɗai, koraŋa.

³¹Tizaw tar, Yesu a wa tini edi, a yimaŋ a miɗini: tuku na gaini yimi n’agwi, ku giriŋa buri ma ɗa?

³²Won hlai n’e niyi warni hulum, smer a tika azumai.

³³Amma nagai n’e ɗa warni hulum e hilisi e hûrgi azumai wuzani aŋ firyiŋ e miɗi, jre, tuku k’Ahini Alaw.

³⁴Won hlai n’e gi anene kata e hilisi midini afti na Genezaret.

³⁵Won hlai na ɗai na woni e siɗiŋ, e ɵini ɵeŋ midini afti na ɵimaɗi paŋ, e kiɗisi ɗai zi veglek paŋ sini.

³⁶Nagai e siiwiŋ buri a siɗi futi aŋ titimi koo ɓa a merfeŋni sapani tekeɗeɗi, nagai paŋ n’e titimiŋ, e bindi pɗem.