Read Mousgoum Matewus 15 Bible Online

Matewus 15 - Mousgoum bible

Matewus 15

¹Won hlai ni Farisekai gaiɗi ɗai zi ɗû wazagai na war Yeruzalem par e hilisi sin Yesu e miɗi,

²ɗaiku zi hitri e hini dedi tamaiɗi edi buri ma ɗa? E mi tiɗi kai won hlai n’e simi ɗa.

³Amma a waya seŋ a miɗiɗi, tiki ki hini seŋ zi gai na wiini Alaw edi burini seŋni deki buri ma ɗa?

⁴Buri Alaw a gada maini nɵa: Apuku gaiɗi amuku ku kûliɗi amai, ɗif n’a tusa epini zaw emini, aga a mra jre.

⁵Amma tiki ki miɗi ɓa, ni n’a muɗa sin epini zaw siɗi emini ɓa, wala na hiina ɓa mu zina puku gaini ɗa, mu saŋ wiini tempel ta ɗa, ɗif ni tumuŋ midini sini epini gaiɗi emini kai.

⁶Nɵa ki bindi, seŋ zi gadai na wiini Alaw aŋ wala kadai burini deki.

⁷Tiki zi rhai, Esaya a muɗa seŋ na woɗi futini buriki, won hlai n’a muɗa ɓa:

⁸Ɗai hanɗa e kûliŋa gaini miɗi,

⁹amma agulɗi aŋ gaigai gaya. E hûrgi azumai wusa aŋ firiyaŋa gaini miɗi kadai, e hitri edi a seŋ zi gadai na wiiɗi ɗai.

¹⁰A yika firiɗi ɗai sini a miɗiɗi, ki ɵini hanɗa, ki ɵini ezini edi lai.

¹¹Wala n’a niya warni miy a bunda ɗif hi-hir kai, amma wala n’a niyasi edi war miy par, hanɗa a bunda ɗif hi-hir.

¹²Won hlai ni ɗaini zi hitri e hilisi sini e miɗini, ku siɗa ɓa seŋ na ku muɗaŋ hanɗa a bunda aŋ wala zi dibi azi buriɗi Farisekai ku sɗa ɵa ya ɗi?

¹³Amma a waiya a muɗa, wala zi pi na ma ɗi paŋ n’Apa na war fuŋ-n’Alaw a paŋ kai ɗa, aga a rɗa amai gaini sirdaini.

¹⁴Hiniɗi mak, e ɗi ɗai malvanai n’e ɵi wuzaɗi na malvanai, amma na ɓa ɗif na melveŋ a ɵa wuzani maini na melveŋ lai ɗa, gai suliɗi paŋ aga e kɵi warni waŋ.

¹⁵Peter a waya seŋ a miɗini, miɗiyi seŋ zi siŋka maini hanɗa edi gaglai haw ɗa.

¹⁶A wiyiɗi seŋ: tiki lai ki ɗa gaini yel kai ɗi?

¹⁷Ki ɵini kai ɗi, buri wala paŋ n’a niya warni miy, a hala warni aru, asakal par a niyasi edi war si par a na ɵa kai ɗi?

¹⁸Amma wala n’a niya edi warni miy par, a halasi warɗi agul par, hanɗa a ni n’a bunda ɗif hi-hir.

¹⁹Buri warɗi agul par a halasi a hiini na meefeŋ fiɗini humok, maɵara, wala na hi-hir, hill, zaida z'eles

²⁰Hanɗa a wala n’a bunda ɗif hi-hir ɗa, amma simi na gaini tiy na gai mi kai ɗa, a bunda ɗif hi-hir kai.

²¹Yesu a halaɗi edi woni par, a hala edi midini afti ɵimani Tirus gaiɗi Sidon.

²²Tili, muni na Kanane ktai te halasi war afti ni par, te ɗuula, Epiɗ-ɗai, Ahini David, ku hiina haw buriya, buri ahiya te sɗa ŋiba gara tin ksalai.

²³Amma a waya seŋ ktai siɗi kai. Ɗaini zi hitri e hilisi sini e siiwiŋ e miɗi, ku ɵimiti edi, buri te na ɗuula pumu.

²⁴Amma a waya seŋ a muɗa, e ɵiniŋasi ɗa siɗi na zamai kai, sai burini adumai na war pinzibaɗi Izrayel n’a wula edi.

²⁵Amma te halasi te hurga azumai wuzani aŋ firiyaŋ, te muɗa, Epiɗ-ɗai, zina pa ta.

²⁶Amma a waya seŋ a muɗa, ɓukɗi aliyagoi e pûkiŋ edi wiini hirgakai ɗa, a siɗa aŋ za kai.

²⁷Amma te muɗa, hanɗa a jre, Epiɗ-ɗai, amma hirgakai a suma ɗa kolkoɗai n’a yakasi sin tabelni epin-gezani par kai ɗi.

²⁸Yesu a waya seŋ a miɗiɗi, muni, yimiku abai, aga a za suku maini na ku daraŋ ɵa. Ahiɗi te bunda pɗemi war ler ni dama.

²⁹Yesu a haladi edi woni par, a halasi gobi sin yem-ra n’abai na Galileya, a niya amai midiɗi huwuŋ, a sumna woni.

³⁰Firiɗi ɗai n’abai e hilisi sini, e kiɗisi na daŋelaŋai piɗi, na malvanai, na burtum, na höyekkai, gaiɗi na zamai viya, e miliɗi azumai wuzani, a zûûliɗi lai.

³¹Firiɗi ɗai e bindi hiyak won hlai n’e siɗi na burtum a muɗa, na höyekkai e bindi pɗem, na daŋelaŋai e hili, na malvanai e tili lai, e kûli Alaw na wiiɗi Izrayel.

³²Amma Yesu a yikiɗi ɗaini zi hitri sini a muɗa, hiinini haw a yimaŋa gara burini firiɗi ɗai, buri nagai e ɗa gaya irna mefeŋ hu, walaɗi zi simi aŋ kai, mu dara mu tikiɗi piɗi gaini wiyamai kai, kapai gdaŋɗi a vada warɗi futi kai.

³³Ɗaini zi hitri e miɗini: tiyi mi nivi ɓuk war baŋa hanɗa n’a kiɗa aŋ viɗi ɗai viya nɵa wata ɗa?

³⁴Yesu a miɗiɗi, peŋ aŋ tiki gama ɗa? E miɗi, muguzak, gaini hilif n’agogoi agwi lai.

³⁵A muɗa sin firiɗi ɗai buri e simni azumai midini afti.

³⁶A mula peŋ na muguzak gaini hilif, a sa tese sin Alaw, a ɓurwaŋ a siŋɗi wiiɗi ɗai zi hitri, ɗai zi hitri e siŋɗi wiiɗi ɗai.

³⁷E simi paŋ, e vi lai, e mili pini n’a hina amai, a va dologo muguzak.

³⁸Nagai n’e simi e ɗa maɵagai dubu puɗu, falakai gaiɗi aliyagoi e piɵiɗi kai.

³⁹Won hlai n’a tikiɗi piɗi ɗai li, a niya warni hulum n’abai a halasi midini afti na Magadan.