Read Mousgoum Matewus 17 Bible Online

Matewus 17 - Mousgoum bible

Matewus 17

¹Mefeŋ ɵaara asakal hanɗa Yesu a yima Peter gaini Yakob gaini Yohana na tawalni pini, a kiɗi gaini amai midiɗi huwuŋ na mugwi edi war baŋa.

²Sini a bunda wuzaɗi, arni a ŋala maiɗi futi nɵa, sapani a bunda muɗukwi tal maini gaglai nɵa.

³Tili, Musus gaini Eliyas e siŋki siɗi arɗi e ɗa hiɗi kalaŋ gaini.

⁴Peter a tika seŋ a muɗa sin Yesu, Epin-geza simni won na pɗem burimu, ɓa ku dara aga mu zizina dugo hu, na ktai buriku, ktai burini Musus, ktai burini Eliyas.

⁵Won hlai n’a na muɗa hai, tili, ɗugul na gaglai a halasi a dugiɗi, wule a halasi edi warni ɗugul par a muɗa: Hanɗa a Ahiya zi diri gara, ni a n’ara pɗem, ɵini pini.

⁶Won hlai na ɗai zi hitri e ɵini hanɗa, e yiki azumai e pi midiɗi azumai e hûni gara.

⁷Yesu a halasi a tetemiɗi a muɗa, fiki amai, ki hûni kai.

⁸Won hlai n’e yimi arɗi amai e tili ɗif zamai kai, sai a Yesu kiini.

⁹Won hlai n’e niyisi azumai midiɗi huwuŋ par, Yesu a gidiɗi a muɗa, ki midini wiini ɗif midini wala zi siŋki hanɗa kai, haa Ahini-ɗif a ɵiyasi amai war mri par.

¹⁰Ɗai zi hitri e zilbiŋ e miɗi, buri ma ɗa ɗai zi ɗû wazagai e miɗi ɓa Eliyas aga a halasi avut?

¹¹A waya seŋ a muɗa, jre, Eliyas aga a zizina wazagai paŋ woɗi futini.

¹²Amma mu miɗiki buri a halasi ya, e siɗiŋ kai, amma e zi sini paŋ maini e diri nɵa. Ahini-ɗif aga a siɗa gir tiɗi maini nɵa lai.

¹³Won hlai ni, ɗai zi hitri e siɗi ya, buri a miɗiɗi midini Yohana zi Baptisme.

¹⁴Won hlai n’e gizi sin firiɗi ɗai, ɗif ktai a halasi sini, a hurga azumai wuzani a muɗa,

¹⁵Epiɗ-ɗai, hiina haw burini ahiya, na duli n’a bunda pin tile a zaŋ, a sɗa gir gara, buri azi viya, a kɵa arni afu, azi viya arni yem lai.

¹⁶Mu kaŋsi siɗi ɗaiku zi hitri, amma e kiɗi aŋ bindiŋ pɗem kai.

¹⁷Yesu a waya seŋ a muɗa, tiki pinziba na gaini yimi-kai na hraŋai, aga mu sumna gaiki ɵa haa kaswata ɗa? Aga mu libiki ɵa haa kaswata ɗa? Kiŋsi sa na.

¹⁸Yesu a ɓaraŋ, ksalai a niyasi edi sini par, ahiyogwi a bunda pɗem war ler ni dama.

¹⁹Won hlai ni ɗai zi hitri e hilisi sin Yesu war ŋoyai e miɗi, tiyi mi kiɗi aŋ birgiŋ edi kai buri ma ɗa?

²⁰Yesu a miɗiɗi, buri yimi-kai na wiiki, buri jre mu miɗiki, ɓa yimiki a nafu maini alini seneve nɵa, aga ki miɗi siɗi huwuŋ hanɗa, buri te zogoɗi won na par edi na, aga te zogo lai. Wala n’aga ki kiɗi aŋ ziŋ kai aŋ kai.

²¹Amma ksalai na maini hanɗa nɵa a niyasi edi ɗa, sai gaini siiwi, gaiɗi sai lai.

²²Won hlai n’e ɗa piyi war Galileya Yesu a miɗiɗi, Ahini-ɗif aga a sa edi tiɗi ɗai,

²³aga e fiɗiŋ edi, war mefeŋ n’ag'aŋ hu aga a ɵiya amai. Nagai e kwimi gara.

²⁴Won hlai n’e gisi a Kapernahum, nagai n’e yimi tar na wiini tempel e hilisi sin Peter e miɗi, Api-zi-hitri na wiiki a sa tar na wiini tempel kai ɗi?

²⁵A muɗa, a sa. Won hlai n’a niya aha warni dalam, Yesu a rafaŋ a miɗini, ku hiina maɵa ɗa, Simon? Paakai na midiɗi yai e yimi tar tin asiya ɗa? Tiɗi aliɗi dama zaw tiɗi ɗai n’edi par ɗi?

²⁶A muɗa, tiɗi n’edi par ɗa. Yesu a miɗini, nɵa aliɗi e si tar kai kai ɗi.

²⁷Amma kapai mu bundumu arɗi aŋ wala zi dibi azi kai ɗa, hala war yem-ra-n’abai, ku ɵa zuwti agoɗom, ku yimasi hilif na ku yimaŋ avut ɗa amai. Ku mala amai, a aga ku nava stater ktai mini, ku tikaŋsi ku siŋɗi buriya ta, gaiku tuku lai.