Read Mousgoum Matewus 18 Bible Online

Matewus 18 - Mousgoum bible

Matewus 18

¹Won hlai ni ɗai zi hitri e hilisi sin Yesu e miɗi, n’abai na warɗi paini fuŋ n’Alaw asiya ɗa?

²A yikasi arwagwi ktai, a ɗiyaŋ arbaɗi,

³a muɗa, jre, mu miɗiki, ki himi kai, ki bindi maiɗi aliyagoi n’agogoi nɵa kai, aga ki niyi warɗi paini fuŋ-n’Alaw kai zaŋ.

⁴Buri nɵa, asiya ɗi paŋ n’a hosa sini azumai maini arogwi hanɗa nɵa, ni a n’abai warɗi paini fuŋ-n’Alaw.

⁵Asiya ɗi paŋ n’a yima arogwi n’agwi mai hanɗa ɵa sini war yikiŋa, a yimaŋa mu ta.

⁶Amma asiya ɗi paŋ n’a tana edi ktai arbaɗi n’agogoi hanɗa n’e yimi, a pɗem burini ɓa funi na guma te nagga wulani, a bula azumai warni hulumni yem-ra n’abai.

⁷Haw midiɗi ɗai ɗi yai buri e tiniɗi ɗai edi, gaini dewele tini-n’edi aga a halasi, amma haw midini ɗif na tini-n’edi a halasi sini par.

⁸Amma ɓa tuku zaw azuku a tanuku, ɗuklaŋ edi, ku bulaŋ edi suku par, pɗem a suwa buriku aŋ niya warni suŋfa daŋelaŋ zaw geɓerem, a suwa ɵiŋki n’arni afu n’a vada kai gaini tiy na sulu zaw azi na sulu.

⁹Na ɓa arku te tunuku, ku hurɗiti edi, ku biliti edi suku par, pɗem a suwa buriku ku niya warni suŋfa hoɵoŋ, a suwa ɵiŋki na warɗi avai-z'afu gaini arai na sulu.

¹⁰Ki giɗimi siki kapai ki miisi ktai arbaɗi n’agogoi hanɗa kai, buri mu miɗiki, ɗai ɗi zi ɵeŋ na war fuŋ-n’Alaw e ɗa wuzani arni Apa war fuŋ-n’Alaw kûreɗ-kûreɗ

¹¹Buri Ahini-ɗif a halasi buri a kora wala n’a ba edi.

¹²Ki hiini maɵa ɗa? Na ɓa ɗif ktai n’adumaini a na miya, ɓa ktai arbani te wula li, a hina na doogo doogo ɵeeŋe pi ɵeeŋe midiɗi huwuŋ, a hala aŋ piyiti na te wula ɗa kai ɗi?

¹³Nɵa na ɓa a niviti li, jre, mu miɗiki, a firiya buriɗi a suwa burini na doogo doogo ɵeeŋe pi ɵeeŋe n’a wula edi kai.

¹⁴Maini nɵa, Epiki na war fuŋ-n’Alaw a firya ɓa ktai n’arbaɗi n’agogoi hanɗa aga a ba edi kai.

¹⁵Amma ɓa tawalku a za tuwur suku, ku hala ku gadaŋ tuku gaini ni kiiki. Na ɓa a ɵina muku, nɵa ku nava tawalku.

¹⁶Amma ɓa a dara a ɵina muku kai, ku tika ɗif ktai zaw ɗai sulu gaiku, kapai seŋ paŋ a ɗopa pin miɗiɗi zaidakai sulu zaw hu.

¹⁷Amma ɓa a dara a ɵina piɗi kai, ku muɗa sin tipi, amma ɓa a dara a ɵina pin tipi kaalai nɵa aga ku hinaŋ a bunda buriku maini ɗif na kadai gaini ɗif zi tiri kosku nɵa.

¹⁸Jre, mu miɗiki, wazagai paŋ na ki niggiŋ midiɗi yai, aŋ gaini niggi war fuŋ-n’Alaw, wazagai paŋ na ki piliŋ edi midiɗi yai, aŋ gaini pili edi war fuŋ-n’Alaw lai.

¹⁹Mu miɗiki pra, wazagai paŋ na ɗai sulu n’arbaki midiɗi yai e tipi miɗi buri e siiwi midini, hanɗa Apa war fuŋ-n’Alaw aga a siŋɗi.

²⁰Buri won hlai na sulu zaw hu e tipi war yikiŋa, won hlai niˆ mu na arbaɗi.

²¹Won hlai ni Peter a hala sini a muɗa, Epiɗ-ɗai, tawala aga a za tuwur sa azi gama ɗa na kapai mu sini ni midini ɗa? Haa azi muguzak ɗi?

²²Yesu a miɗini, mu muɗuku, azi muguzak kai, amma haa doogo doogo muguzak azi muguzak.

²³Buri nɵa paini fuŋ-n’Alaw te na maini pai ktai n’a dara a zilba tumuŋni tiɗi ɗaini zi sda.

²⁴Won hlai n’a tika pini aŋ zilba, e kisi ktai wuzani, na tumuŋni aŋ midini talent doogo.

²⁵Amma buri walani n’a vurgaŋ gaini aŋ kai, epin-gezani a muɗa buri a wura edi, ni gaiɗi munini gaiɗi alini gaini wazagai n’a na paŋ, kapai tumuŋni aga a vurga.

²⁶Won hlai ni ɗif zi sda a hurga azumai wuzani a siiwaŋ a muɗa, ku zaŋa sabur, aga mu vurguŋku paŋ.

²⁷Amma ɗif zi sda hanɗa a bunda arni epin-gezani haw gara, a ɵaŋ, a hinini tumuŋni:

²⁸Amma won hlai na ɗif zi sda hanɗa a niya anene, a nava gaini maini zi sda na tumuŋni aŋ midini dinar miya ɗaw, a yimaŋ, a furɗa wulani a muɗa, ku vurgaŋa tumuŋŋa ɗa.

²⁹Maini zi sda a hurga azumai wuzani a siiwaŋ a muɗa, ku zaŋa sabur, aga mu vurguŋku paŋ.

³⁰Amma a dara kai, a hala a ɵaŋ warɗi daŋgai haa a vurgini tumuŋni.

³¹Won hlai na marni zi sda e tili wala n’a za ɗa, e hiini meefeŋ, e hilisi e miɗi wiini epin-gezaɗi wala paŋ n’a za li.

³²Won hlai ni epini-gezani a yikaŋsi wuzani a miɗini, tuku ɗif zi sda na meefeŋ tumuŋŋa paŋ mu hinuŋku, buri ku siiwaŋa.

³³Nɵa tuku lai ku kiɗa aŋ hiina haw burini maiku zi sda maini na ta mu hiina haw buriku ɵa kai buri ma ɗa?

³⁴Epin-gezani a za hiy, a saŋ tiɗi ɗai n’e ziɗi gir wiiɗi ɗai, haa a virgini tumuŋni paŋ.

³⁵Apa na war fuŋ-n’Alaw aga a za siki nɵa lai, na ɓa ɗif dara a sa ni wiini maini gaiɗi agulni paŋ kai.