Read Mousgoum Matewus 2 Bible Online

Matewus 2 - Mousgoum bible

Matewus 2

¹Yesu a wa a Betlehem war Yuda war sarti na Herod aŋ warɗi pai, won hlai n’a wa li, ɗai zi hiila na piɗi futi na dawai par e cûsi a Yeruzalem,

²e zilbi e miɗi: paiɗi Yudeyakai n’a wa tiyana aŋ wata ɗa? Buri mi tilitisi maɵikini midini afti na piɗi futi na dawai par, mi hilisi buri mi hurgi azumai wuzani.

³Hlai na pai Herod a ɵina labar hanɗa, a turla marwai, ni gaiɗi ɗai na Yeruzalem ɗa paŋ.

⁴A tipiɗisi paakai n’abakai zi ɓaka paŋ gaiɗi ɗai n’e ɗû wazagai n’arbaɗi ɗai buri a zilbiɗi midini hlai na Kristu aga a wa woni ɗa.

⁵E miɗini, a Betlehem na war Yuda, buri ɗif na mini Alaw ktai a ɗosi nɵa:

⁶Tuku Betlehem na war aftini Yuda, tuku ku na agwi arbani fuŋ n’abakai na war Yuda kai zaŋ, buri warku par Lawan ktai aga a wa, aga a za aŋ ɗif zi giɗimi na wiiɗi ɗaiŋa Izrayel,

⁷Asakal hanɗa Herod a yikiɗi ɗai zi hiila war ŋoyai, a zilbiɗi midini hlai na maaɵiki te siŋka arɗi ɗa.

⁸Asakal par a ɵiniɗi a Betlehem, a muɗa: Hili ki zilbi gaini hangal burini arwagwi ɗa, hlai na ki niviŋsi li ɗa; ki hilisi ki miɗiŋa, kapai ta lai mu hala mu hurga azumai wuzani lai.

⁹Won hlai n’e ɵini seŋni pai e hili wiiɗi, nɵa maaɵiki n’e tilitisi midini afti na piɗi futi na dawai par te ɵa wuzaɗi haa te cosi te ɗiya midini hlai n’arwagwi aŋ woni ɗa.

¹⁰Won hlai n’e tiliti maaɵiki, firiyi n’abai a yimiɗi.

¹¹E niyi amlai warni dalam e tili arwagwi gaiɗi Maria n’emini, e hûrgi azumai wuzani. E mili godaiɗi edi, e sini or, gaini wala zi ɗûgûdi zi lûgûzi, gaini mir lai aŋ like.

¹²Asakal par Alaw a gidiɗi war weseŋ si pɵi buri e wiyi sini Herode kai, e wiyi aha midini aftiɗi ɗa warɗi futi zamai.

¹³Won hlai n’e hili li, ɗif zi ɵeŋ na wiini Epiɗ-ɗai a siŋka sini arni Yosef war weseŋ zi pɵi a muɗa: Faka amai, ku tika arwagwi gaiɗi emini, lawa war Egipte, ku sumna woni haa mu muɗuku ɗi haw, buri Herod aga a paya aŋ fuɗa arwagwi ɗa edi.

¹⁴Yosef a faka amai duvuk, a tika arwagwi gaiɗi emini a hala gaiɗi war Egipte.

¹⁵A sumna woni haa sini mrini Herod, a za nɵa kapai wala n’EPIƊ-ƊAI a muɗaŋ mini ɗif na mini Alaw aga a va amai, won hlai n’a muɗa ɓa: war Egipte par mu yikasi ahiya.

¹⁶Won hlai na Herod a tala ɓa ɗai zi hiila e zi rhai sini li, a bunda gaini hi n’abai. A ɵiniɗi ɗai edi aŋ fiɗiɗi aliyagoi na maɵagai na war Betlehem gaini afti na ɵimaɗi paŋ edi, aliyagoi n’e zi buza sulu gaiɗi n’e zi buza sulu kai hai lai, sini mefeŋ n’a nava labar miɗi ɗai zi hiila warni ɗa.

¹⁷Won hlai ni seŋ na Yeremiyas, ɗif na mini Alaw a muɗaŋ a va amai, won hlai n’a muɗa ɓa:

¹⁸Wule a wa war Rama, tuwi gaini hama n’abai, te tûwiɗi aliɗi na ɗa te Rakel, te dara te yima arai zi pi kai, buri nagai e ɗa kir kai.

¹⁹Asakal mrini Herod par, ɗif zi ɵeŋ na wiini Epiɗ-ɗai a siŋka sini arni Yosef war weseŋ zi pɵi war Egipte,

²⁰a muɗa: Faka amai, tika arwagwi gaiɗi emini, hala midini aftiɗi Izrayel, buri nagai n’e piyi sumfani arwagwi ɗa e mri ya.

²¹Yosef a faka amai a tika arwagwi gaiɗi emini a wayasi aha midini aftiɗi Izrayel.

²²Amma won hlai n’a ɵina ɓa Arkelawus a na aŋ pai war Yudia war balamni Herod n’epini ɗa, a huna buri a hala woni. Amma Alaw a miɗini gaini war weseŋ zi pɵi buri a hala a sumna war Galeliya.

²³Asakal par a hala a za dalamni war fuŋ n’abai ktai yikini Nazaret, kapai wala na ɗai na mini Alaw e miɗiŋ ɗa a va amai, kapai aga a yika ɓa ɗif na Nazaret.