Read Mousgoum Matewus 20 Bible Online

Matewus 20 - Mousgoum bible

Matewus 20

¹Tili, Paini fuŋ-n’Alaw te na maini nɵa: Epini dalam ktai a niya anene gorof aŋ mula ɗai warn zardeɗni zi luwuŋ zi vin,

²a kata mini gaiɗi ɗai zi sda burini vrak na war yuvai, a kiɗi edi war zardeŋ zi luwuŋ zi vin.

³Won hlai na futi te yimasi amai li dai dai ɗa, a niya anene pra a niviɗi ɗai zi sda zamai war hlai na ɗai e tipi warni ta ta ɗa kadai ca ca,

⁴a miɗiɗi: Hili warni zardeŋ zi luwuŋ zi vin na wiya lai, aga mu siki na midini arsukki ɗa.

⁵E hili woni, girvudi sek ɗa, a hala aŋ paya ɗai pra, futi te ɵa wulaɗi edi ɗa a hala aŋ paya ɗai zamai pra.

⁶Gobi futi te nawa sek ɗa, a hala pra, a niviɗi na zamai ɗuk ɗuk, a miɗiɗi: ki yivi woni na ca kadai, ki zi wala ktai kai ɗa buri maɗa?

⁷E wiyini seŋ e miɗi: buri ɗif n’a miliyi aŋ kai. A miɗiɗi, tiki lai hili war zardeŋ zi luwuŋ zi vin na wiya.

⁸Won hlai na futi te za li koskoi, epin-gezani zardeŋ zi luwuŋ zi vin ɗa, a miɗini wiini ɗif zi giɗimi wazagai na wiini: Yikiɗisi ɗai zi sda ɗa, virgiɗi faraiɗi ɗa, ku tikasi puku siɗi ɗai na asakal ɗa par, ku vada gaiɗi nagai n’e tiki piɗi avut ɗa.

⁹Nagai n’a miliɗi futi gobi te nawa sek ɗa, ɗif paŋ a nava vrak na burini sda na war yuvai ɗaw ta ta.

¹⁰Nagai n’e tiki piɗi gorof e hilisi, e hiini ɓa aga e nivi a suwa ɗi, amma nagai lai ɗif a nava a vrak na burini sda na war yuvai ɗaw ɵa lai.

¹¹Won hlai na e nivi hanɗa, e tiki piɗi e ŋûriyi sini epini dalam, e miɗi:

¹²Nagai n’e hilisi asakal ɗa e zi sda burini ler ɗaw kadai, amma ku kitiɗi gaiyi tiyi na mi yivi warni kayai, arni futi lai, kal kal maɵa maɵa ɗa?

¹³A waya seŋ wiini ktai arbaɗi, a muɗa: Marmaya, mu zuku meefeŋ kai koo, mu kutumu mumu ɓa: mu suku ɗa a vrak na burini sda na war yuvai ɗaw, a na ɵa kai ɗi? Yima vrakku.

¹⁴Hala walaku, mu firiya mu sini wiini n’asakal maini na wiiku ɵa lai.

¹⁵Mu kiɗa mu za gaini faraiŋa maini na mu firiya ɵa kai ɗi? Zaw mu za pɗem ɗa arku meefeŋ ɗi?

¹⁶Nɵa n’asakal aga e bindi aŋ n’avut, n’avut ɗa aŋ n’asakal lai.

¹⁷Hlai na Yesu a na war hilini n’amai a Yeruzalem sek, a yimiɗi ɗaini zi hitri na doogo pi sulu edi kiiɗi, a miɗiɗi:

¹⁸tili, mu ɗumu aŋ hulumu amai a Yeruzalem, Ahini-ɗif aga a sa edi tiɗi paakai n’abakai zi ɓaka gaiɗi ɗai zi ɗû wazagai, aga e kûti sariya zi mri midini lai.

¹⁹Aga e siŋ edi tiɗi pinziba na zamai, buri e zini yewere, e ɵiɓiŋ, e tûkûŋ sini luwuŋ zi dagra lai. Amma war mefeŋ n’ag'aŋ hu aga a ɵiya amai.

²⁰Won hlai ni emiɗi alini Sebedewus te halasi sini gaiɗi aliɗi, te hurga azumai wuzani aŋ zilbaŋ burini wala ktai.

²¹A miɗiɗi: ku firiya ɗa a maɗa? Te miɗini: ku sa futi ɓa, aliya na sulu na e ɗi na ɗa, ktai a sumna war graŋku na wus par, na ktai na graŋku na muni par lai, warɗi paiku ɗa.

²²Yesu a wiyiɗi seŋ a muɗa: Wala na ki zilbiŋ na ɗa, ki sɗiŋ tiɓ? Ki kiɗi aŋ citi kup zi gir n’aga mu citi ɗa ɗi? E miɗini mi kiɗi ya.

²³A miɗiɗi: A futini, kup na wiya zi gir ɗa, ki kiɗi ki citi, amma burini simni na war graŋŋa na wus par, zaw war na muni ɗi, mu saŋ ɗa mu ta kai, hanɗa a na buriɗi nagai n’Apa a zizinaŋ buriɗi ɗa.

²⁴Won hlai na nagai na doogo, e ɵini hanɗa, e tiki piɗi aŋ zi hiy siɗi tawalakai na sulu ɗa.

²⁵Amma Yesu a yikiɗi sini a muɗa: Ki siɗi ɓa paakai na midini afti ɗa, e ŋi spak midiɗi ɗai aŋ abakai, e ŋi gdaŋ miɗiɗi lai,

²⁶arbaki aga a za nza kai. Amma ni n’a bunda aŋ abai arbaki ɗa, aga a za ɵeŋ na wiiki.

²⁷Ni n’a dara a bunda aŋ n’avut arbaki aga a bunda aŋ ɵeŋ n’a zina piki.

²⁸Ahini-ɗif a halasi buri ɓa ɗif a za ɵeŋni kai, amma buri ni gaini midini dama aga a za aŋ ɵeŋ, buri a sa suŋfani edi aŋ vrak buri a bundasi ɗai viya.

²⁹Won hlai n’e niyisi edi warɗi Yeriko par fara n’abai a tapa pini.

³⁰Nɵa, war hlai ni, ɗai na malvanai sulu e simni ɵimaɗi futi, e ɵini ɓa Yesu a na vuga, e ɗûûli e miɗi: Epiɗ-ɗai, Ahini David, ku hiina haw buriyi.

³¹Firiɗi ɗai e ɓiriɗi kapai e bi, amma e ɗûûli a suwa pra, e miɗi: Epiɗ-ɗai Ahini David, hiina haw buriyi.

³²Yesu a ɗiya zaw, a yikiɗisi a muɗa: Ki diri mu za siki ɗa a maɗa?

³³Nagai e miɗini, Epiɗ-ɗai, mi diri ɓa aryi a mala edi.

³⁴Hiinini haw a yimaŋ, a tetema arɗi, tizaw tar arɗi a mala edi, e tipi pini lai.