Read Mousgoum Matewus 21 Bible Online

Matewus 21 - Mousgoum bible

Matewus 21

¹Won hlai n’e ŋi gobi aha siɗi Yeruzalem, e cûsi a Betfage gobi siɗi huwuŋ zi luwuŋ olive ɗa, a ɵiniɗi ɗaini zi hitri sulu

²a miɗiɗi: hili war fuŋ n’aŋ wuzaki na ɗa, aga ki niviti ka ablehoi gaini niggi, ahiɗi gaiɗi lai, ki piliŋsi, ki kiŋŋasi.

³Na ɓa ɗif a miɗiki seŋ li ɗa, ki wiyini seŋ ɓa: Epiɗ-ɗai a firyaŋ, aga a hiniŋkisi lai.

⁴Hanɗa a za kapai wala n’a muɗa mini ɗif na mini Alaw aga a va amai, won hlai n’a muɗa ɓa:

⁵Miɗiɗi wiiɗi ɗai na Siyon ɓa: Paiku a na halasi suku, a hangal gara, a sumna miɗiɗi ablehoi, midini ahini ablehö.

⁶Ɗai zi hitri e hili, e zi maini na Yesu a miɗiŋɗi nɵa.

⁷E kitinisi ablehoi gaini ahini ablehö ɗa, e biri sapaɗi duɓani, a sumna midini.

⁸Abaini firiɗi ɗai ɗa e biri sapaɗi azumai warɗi futi, zamai e ɗûkli ɵimani luwoŋai e biriŋ azumai warɗi futi.

⁹Firiɗi ɗai zamai e hili edi wuzani, na zamai e hinisi askalni par lai, e ɗûûli e miɗi: Hozana sini Ahini David, Kol sini Ni n’a halasi war yikini Epiɗ-ɗai, Hozana war hlai na haa amai.

¹⁰Won hlai n’a niya aha warɗi Yeruzalem ɗa, fuŋ n’abai paŋ a muguza, ɗai e zilbi ɓa: hanɗa asiya ɗa?

¹¹Firiɗi ɗai e miɗi: hanɗa a Yesu, ɗif na mini Alaw na Nazaret na Galileya par.

¹²Yesu a niya amlai warni tempel, a birgiɗisi nagai n’e cikili wazagai edi woni par gaiɗi nagai n’e wûri wazagai ɗa lai. Tabelɗi ɗai zi bindi farai gaini tubla na wiiɗi ɗai n’e cikili edi paŋ a pokoŋ azumai.

¹³A miɗiɗi: ɗû a ɗosi nɵa: Dalamŋa aga a yika ɓa: Dalam zi siiwi, amma tiki ki bindi aŋ waŋ na wiiɗi gorɓolokai.

¹⁴Ɗai na malvanai gaiɗi na daŋalaŋai e hilisi sini war tempel a zûûliɗi lai.

¹⁵Amma paakai n’abakai zi ɓaka gaiɗi ɗai zi ɗû wazagai, won hlai n’e tili wazagai n’abakai n’a zaŋ ɗa, gaiɗi aliyagoi n’e ɗûûli amlai warni tempel ɓa: hozana, sini ahini David ɗa lai ɗa, e zi hiy,

¹⁶e miɗini: ku ɵina seŋ na nagai e ɗa miɗiŋ ɗa tiɓ ɗi? Yesu a waya seŋ a muɗa: Nkam, ki tili ka seŋ hanɗa war ɗû duk kai ɗi, n’a muɗa ɓa: War miɗi aliyagoi na agogoi gaiɗi akoɗokokai par lai, ku zizina yama zi kol buriku.

¹⁷A hiniɗi, a hala edi war fuŋ n’abai ɗa par, a hala a Betaniya a fana woni.

¹⁸Dawai par, won hlai n’a na niya aha war fuŋ n’abai ɗa sek ɗa, wiyamai te yimaŋ.

¹⁹A tala luwuŋ Fige ɵimaɗi futi, a hala sini amma a nava ali tini kai, sai a sugoini kadai. A muɗa sini maini nɵa: Aga ku wa ali kir kai gamai. Tizaw tar, luwuŋ Fige ɗa a siita.

²⁰Won hlai na ɗai zi hitri e tili hanɗa, e bindi hiyak e miɗi: Luwuŋ Fige hanɗa a siita tizaw nɵa maɵa maɵa ɗa?

²¹Yesu a miɗiɗi, jre miɗiki, ɓa yimiki a na, na ɓa ki giriŋi kaalai ɗa, aga ki zi ɗa a wala n’a za sini luwuŋ Fige hanɗa kiini kai, koo ɓa ki miɗi siɗi huwuŋ hanɗa, rɗa amai, ɵiŋka suku war yem-ra n’abai aga a za nɵa lai.

²²Wazagai paŋ na ki siiwiŋ gaini yimi ɗa, aga a sa siki.

²³A hala amlai warni tempel, won hlai n’a na hitra, paakai n’abakai zi ɓaka gaiɗi n’abakai n’arbaɗi ɗai, e hili sini e zilbiŋ e miɗi: ku za na ɗa gaini spak na maɵa maɵa ɗa? N'a suku spak hanɗa asiya ɗa?

²⁴Yesu a waya seŋ a miɗiɗi: Ta lai mu zilbiki zilbi ktai, ktai bas, na ɓa ki wiyiŋa seŋ li ɗa, aga mu siŋkiki spak na mu za gaini ɗa.

²⁵Baptisme na wiini Yohana ɗa, a na sini asiya par ɗa? A na amai par zaw, a na siɗi ɗai par ɗi? E hiini warɗi dama e miɗi: Mu muɗumu li ɓa: Amai par ɗa, aga a muɗumu: tiki ki yimi pini kai ɗa buri maɗa?

²⁶Na ɓa mu muɗumu li ɓa, a na siɗi ɗai par ɗa, mu zumu hangal gaiɗi ɗai lai, buri ɗai paŋ e yimi Yohana aŋ ɗif na mini Alaw jre jre.

²⁷Nagai e wiyi seŋ sini Yesu e miɗi: tiyi mi siɗi hanɗa kai. Ni lai a waya seŋ a miɗiɗi: Ta lai, spak na mu za gaini ɗa, mu sɗa futini kai, aga mu miɗiŋki kaalai.

²⁸Ki hiini maɵa ɗa? Ɗif ktai alini na maɵagai sulu, a miɗini wiini na ktai ɓa: Ahiya, girna ku hala ku za sda war vuwai zi luwuŋ zi vin ɗa.

²⁹Amma ahini a wiyini seŋ a muɗa: Mu dara kai. Asakal par agwi a hiina haa a faka a hala.

³⁰A hala sin na ktai ɗa, a miɗini ɵa lai, ahini ni ɗa a waya seŋ a muɗa: A na ɵa epin-geza, amma a hala woni kai.

³¹Arbaɗi na sulu ɗa, n’a za dirini epini a na wata ɗa? E miɗi: a na avut ɗa. Yesu a miɗiɗi: Jre mu miɗiki: Zi tiri kosko gaiɗi falakai zi zawar aga e niyi warɗi paini fuŋ-n’Alaw wuzaki.

³²Buri Yohana a halasi siki gaiɗi futi na jre-ɗikat, amma ki yimi pini kai, ɗai zi tiri kosko gaiɗi falakai zi zawar e yimi pini, amma tiki won hlai na ki tili hanɗa ki bindi hiiniki kaalai, ki yimi pini kaalai.

³³Slini seŋ zi siŋka maini na zamai hanɗa pra. Epin-dalam ktai a za zardeŋ zi luwuŋ zi vin, a tika ɵaɓ sini, a zizina hlai n’e cipiɗi alini luwuŋ zi vin warni ta, a rga poriyo na mogo warni lai. Asakal par a hina vuwaini tiɗi ɗai zi sda, a hala a morkoi midini afti zamai.

³⁴War sarti na rûwini ali luwuŋ zi vin ɗa a ŋasi gobi ɗa, a ɵiniɗi bagakaini siɗi ɗaini zi sda aŋ piyisi alini luwuŋ zi vin.

³⁵Amma ɗai zi sda e yimiɗi bagakaini, na ktai e ɵiɓiŋ, na ktai e fiɗiŋ, na ktai e ɵiŋkiŋ gaini kiryit lai.

³⁶A ɵina vok zamai na wiiɗi bagakaini, viya e sûwi n’avut ɗa, ɗai zi sda e ziɗi ɵa pra.

³⁷Asakal par a ɵina ahini siɗi gaini hiini na ɓa: Aga e sini hormo wiini ahiya ɗa.

³⁸Amma won hlai na ɗai zi sda na war zardeŋ zi luwuŋ zi vin e tili ahini ɗa, e miɗi arbaɗi marɗi: Hanɗa a ni n’aga a mula bulum ɗa, hulumu, fuɗuŋmu edi, kapai bulumni a hina tumu.

³⁹E yimiŋ e ɵiŋkiŋ anene warni zardeŋ zi luwuŋ zi vin ɗa par, e fiɗiŋ edi.

⁴⁰Won hlai na epini zardeŋ zi luwuŋ zi vin a halasi li ɗa, aga a ziɗi ɗai zi sda hanɗa maɵa maɵa ɗa?

⁴¹E miɗini: Ɗai na maafanai hanɗa, aga a vidiɗi edi war gir n’abai, aga a sa zardeŋ zi luwuŋ zi vin ɗa tiɗi ɗai zi sda na zamai, n’aga e sini ali luwuŋ zi vin war sartini sartini.

⁴²Yesu a miɗiɗi: Ki tili war ɗû duk kai ɗi? Ɗû a muɗa: Ahi fuŋ na ɗai zi rgi dalam e hiniŋ edi ɗa, a bunda aŋ ahi-fuŋ n’a tika ɗa war koŋni dalam. Hanɗa a na sini Epiɗ-ɗai par. Hanɗa a wala n’a tala aryi ɗa, a kiɗa a bunda ɗif hiyak.

⁴³Buri nɵa mu miɗiki, paini fuŋ Alaw aga te tika edi tiki par, te sa sini pinziba na zamai na aga a wa ali.

⁴⁴Asiya asiya paŋ n’a kɵa li midini ahi-fuŋ hanɗa, a haɗa, amma ni ahi-fuŋ a kɵa li midini ɗa, aga saraŋ edi.

⁴⁵Asakal n’e ɵini seŋ zi siŋka maini ya ɗa, paakai n’abakai zi ɓaka gaiɗi Farisekai e siɗi ɓa a muɗa na ɗa gaiɗi.

⁴⁶E piyi aŋ yimiŋ, amma e hûni wuzaɗi firiɗi ɗai ɗa, buri nagai e yimiŋ ɗa ɓa a ɗif na mini Alaw.