Read Mousgoum Matewus 22 Bible Online

Matewus 22 - Mousgoum bible

Matewus 22

¹Yesu a waya seŋ a miɗiɗi pra war seŋ si siŋka maini a muɗa:

²Paini fuŋ-n’Alaw te na maini pai n’a ziti fet na wiini tiki burini ahini.

³A ɵiniɗi zi ɵeŋ edi buri e yikiɗisi nagai n’e yikisi avut miɗi fet na wiini tiki ɗa, amma e diri e hilisi kai.

⁴A ɵiniɗi ɗaini na zamai edi pra, a muɗa, ki miɗiɗi wiiɗi n’e yikisi, mu zizina simiŋa ya, garakaiŋa garni mapatakaiŋa mu fuɗa wazagai ya lai, paŋ a zizina ya, hilisi miɗi fet na wiini tiki ɗa.

⁵Amma e hiini midini hanɗa kai, e hili wiiɗi, zamai war vowaini, na zamai war cakalani,

⁶na zamai e yimiɗi ɗaini zi ɵeŋ e zi anya siɗi e fiɗiɗi edi.

⁷Amma pai warni a lumaŋ, a ɵina vokɗi ɗaini zi gaw edi, e fiɗiɗi ɗai n’e fiɗi ɗai edi, e yi fuŋɗi edi lai.

⁸Asakal par a miɗiɗi wiiɗi ɗaini: Wazagai na miɗi fet ɗa zizina ya, amma n’e yikisi e jûvi miɗi fet ɗa kai.

⁹Buri nɵa ki hili min dagraɗi futi, ki yikiɗisi nagai na ki niviɗi paŋ miɗi fet ɗa.

¹⁰Ɗai zi ɵeŋ hanɗa e hili edi miɗi futi, e tipiɗisi ɗai n’e niviɗi paŋ, na maafanai lai na pɗamai lai, dalam zi fet ɗa a va gaiɗi ɗai.

¹¹Won hlai na pai a niya amlai buri a tiliɗi ɗai n’e yikisi ɗa, a tala ɗif ktai na sapa zi fet sini kai.

¹²A miɗini, marmaiya, ku niyasi amlai na gaini sapa zi fet suku kai maɵa maɵa ɗa? Amma a waya seŋ kai.

¹³Won hlai ni pai a miɗiɗi wiiɗi ɗaini si ɵeŋ, ki niggi tini gaini ezini, ki ɵiŋkiŋ anene war gegeŋ n’edi, woni a tuwi gaini hirɗini sesiyeŋ.

¹⁴Buri n’e yikisi e ɗa viya, amma zi viri e ɗa agwi.

¹⁵Won hlai ni Farisekai e hili edi e kiti seŋ maɵa ɗa aga e yimiŋ war seŋni.

¹⁶E ɵiniɗi ɗai ɗi zi hitri gaiɗi Herodiakai edi sini aŋ miɗi, Api-zi-hitri, tiyi mi siɗi ya tuku ku jre, ku hitiriti futini Alaw war jre lai, ku huna ɗif kai, ku ɓurwa arɗi ɗai kai.

¹⁷Buri nɵa miɗiyi haw ɗa, ku hiina maɵa ɗa? Pin seŋ zi gadai ɗa e si tar wiini Sesar, zaw e si kai ɗi?

¹⁸Amma Yesu a sɗa hiiniɗi na meefeŋ, a muɗa: ki tiniŋa buri ma ɗa, tiki zi rhai?

¹⁹Kisi farai na ki si tar gaini haw ɗa. E kinisi denariyus ktai.

²⁰A miɗiɗi, n’aŋ warni dam ɗa asiya ɗa, ɗû n’aŋ midini ɗa wiini asiya ɗa?

²¹E miɗini, a wiini Sesar. Nɵa a miɗiɗi, sini wazagaini Sezar wiini Sezar, wazagaini Alaw wiini Alaw lai.

²²Won hlai n’e ɵini hanɗa, e bindi hiyak, e hiniŋ, e hili wiiɗi.

²³War mefeŋ ni dama na zamai arbaɗi Sadusekai e hilisi sini, nagai n’e miɗi ɓa ɵiyi-n’amai aŋ kai ɗa, e zilbiŋ e miɗi,

²⁴Api-zi-hitri, Musus a muɗa, won hlai na ɗif a mra li na ɓa alini e ɗa kai, tawalni aga a tikiti munini kapai a zûgini yemni tawalni.

²⁵Tawalakai muguzak e ɗika arbayi, n’avut a tikiti muni a mra, a hina seyem kai, a hiniti ka munini wiini tawalni.

²⁶Nɵa n’ag'aŋ sulu lai, n’ag'aŋ hu lai, haa sini n’ag'aŋ muguzak ɗa ta.

²⁷Asakalɗi par muni te mra lai.

²⁸War ɵiyi-n’amai aga te za aŋ munini asiya ɗa arbaɗi na muguzak ɗa? Buri nagai paŋ e tikiti aŋ muni?

²⁹Amma Yesu a waya seŋ a miɗiɗi, ki wuli edi, buri tiki ki siɗi ɗû kaalai, spakni Alaw kaalai.

³⁰Buri war ɵiyi-n’amai ɗa, e tiki kai, e si aŋ tiki kaalai, amma nagai e ɗa maiɗi ɗai zi ɵeŋ na fuŋ-n’Alaw nɵa.

³¹Amma burini ɵiyi-n’amai na wiiɗi ɗai zi mri, ki tili war ɗû kai hai ɗi, wala n’Alaw a miɗiki midini won hlai n’a muɗa,

³²Ta m’Alaw na wiini Abraham, m’Alaw na wiini Isaak, m’Alaw na wiini Yakob lai ki tiliŋ kai ɗi? Ni a Alaw na wiiɗi ɗai zi mri kai, amma na wiiɗi na karɗi.

³³Won hlai na firiɗi ɗai e ɵini hanɗa, e simni hiyak burini hitirini.

³⁴Amma won hlai na Farisekai e ɵini ɓa a burtuma miɗi Sadusekai, e tipi siɗi.

³⁵Ktai arbaɗi, api-zi-gadai, a paya futi buri a tanaŋ, a muɗa:

³⁶Api-zi-hitri, seŋ zi gadai n’abai war Ɗû par a na wata ɗa?

³⁷A miɗini: Aga ku dara Epiɗ-ɗai Alaw na wiiku gaiɗi agulku paŋ gaini sumfaɗi-agulku paŋ gaini hiihiku paŋ lai.

³⁸Handa a seŋ zi gadai n’abai n’avut lai.

³⁹Amma zamai n’aga pini, na gobi gaini lai a na, aga ku dara maiku maini suku nɵa.

⁴⁰Seŋ zi gadai paŋ gaiɗi ɗai na min Alaw lai a na war gadai na sulu hanɗa.

⁴¹Won hlai na Farisekai e ɗa gaini diŋgi, Yesu a zilbiɗi a muɗa:

⁴²Ki hiini maɵa ɗa midini Kristu? Ni a ahini asiya ɗa? E miɗini a ahini David.

⁴³A miɗiɗi, ɓa na ɓa a ahini David ɗa, David warni Seze a yikaŋ Epiɗ-ɗai maɵa maɵa ɗa? Won hlai n’a muɗa:

⁴⁴Epiɗ-ɗai a muɗa sin Epiɗ-ɗaiŋa, Ku sumna war graŋa na wus, Haa mu miliɗi gawku azumai pin bobur-n’azuku

⁴⁵Na ɓa David a yikaŋ Epiɗ-ɗai, nɵa ni a ahini maɵa maɵa ɗa?

⁴⁶Ɗif a kiɗa aŋ wiyini seŋ ktai kir kai, ɗif na kurfuk n’a kiɗa aŋ zilbaŋ asakal mefeŋ ni par aŋ kir kai.