Read Mousgoum Matewus 23 Bible Online

Matewus 23 - Mousgoum bible

Matewus 23

¹Yesu a ɓaka seŋ sin firiɗi ɗai, siɗi ɗaini zi hitri lai, a muɗa:

²ɗai zi ɗû wazagai gaiɗi Farisekai e simni warɗi Paramai na wiini Musus,

³buri nɵa aga ki zi wazagai paŋ n’e gidiki gaini, amma ki zi pin sdaɗi kai. Buri e miɗi gaini miɗi, amma e ziŋ kai.

⁴E niggi zak n’abakai n’a liba gaini gir, e tikiŋ amai midini kerpeɵɗi ɗai, amma gaini midiɗi dama e titimiŋ gaini ahitiɗi kai.

⁵Amma sidaɗi paŋ e ziŋ ɗa arɗi ɗai, Buri e zizini wazagai n’abakai n’e ɗû haga warni, n’e niggiŋ midini arɗi zaw wulani tiɗi gaini vara na mogokai min sapaɗi.

⁶E diri hlai zi simni n’edi avut warɗi fet, e diri Paramai n’edi avut warni sinagogne lai.

⁷E diri ɵiɓini wuti war kosko, e diri ɓa ɗai e yikiɗi ɓa Rabbi lai.

⁸Amma aga ki hini ɗif a yikiki Rabbi kai, buri Api-zi-hitri na wiiki a ktai, Kristu, amma tiki paŋ ki ɗi tawalakai.

⁹Aga ki yiki ɗif na midiɗi yai aŋ epiki kai, buri Epiki a ktai, ni n’a na war fuŋ-n’Alaw.

¹⁰Aga ki hini ɗif a yikiki Api-zi-hitri kaalai, buri Api-zi-hitri na wiiki a ktai, a Kristu.

¹¹Amma n’abai arbaki aga a za aŋ ɗif n’a zina piki.

¹²Buri asiya ɗi paŋ n’a kola sini amai, aga a hosa azumai, amma a siya ɗi paŋ n’a hosa sini azumai, aga a kola amai.

¹³Amma haw buriki, tiki ɗai zi ɗû wazagai gaiki tiki Farisekai, tiki zi rhai, tiki ki dûgûti paini fuŋ-n’Alaw buriɗi ɗai. Tiki dama jaaki buri ki niyi warɗi kai, nagai n’e piyi aŋ niyi ɗa, ki hiniɗi aŋ niyi kaalai.

¹⁴Haw buriki, tiki ɗai zi ɗû wazagai gaiki tiki Farisekai, tiki zi rhai. Tiki ki simiɗi falakai na war greŋ, ki siiwi siiwa na mogo pin arai, buri nɵa aga ki nivi kûɗi-sariya na goma n’a suwa.

¹⁵Haw buriki, tiki ɗai zi ɗû wazagai gaiki tiki Farisekai, tiki zi rhai, buri tiki ki piyi amai anene kata duɓani yem-ra-n’abai, ki piyi midini afti lai aŋ bindi ɗif ktai aŋ tapa piki. Won hlai n’a bunda li, ki bindiŋ aŋ ahiɗi avai-z'afu, meefeŋni azi sulu a suwa meefeŋ na wiiki tiki.

¹⁶Haw buriki, tiki zi ɵi wuze na malvanai na ki miɗi na ɓa ɗif a ha wala mini gaini tempel ɗa, a za wala kai, amma ni n’a ha wala mini gaini or na wiini tempel, ni aga a pulta kai.

¹⁷Tiki zi dûûli na malvanai. N'abai a suwa a na wata ɗa, a or ɗa zaw, a tempel n’a bunda or aŋ sɗik ɗi?

¹⁸Na ɓa ɗif a ha mini gaini gûwiŋ zi ɓaka, a za wala kai, amma ni n’a ha mini gaini wala zi ɓaka n’a na midini hlai zi ɓaka ɗa, a kiɗa a pulta kai.

¹⁹Tiki na malvanai, n’abai n’a suwa a ma ɗa, wala zi ɓaka zaw gûwiŋ zi ɓaka n’a bunda ɓaka aŋ sɗik ɗi?

²⁰Buri nɵa, ni n’a ha mini gaini gûwiŋ zi ɓaka ɗa, a ha mini na ɗa gaini, gaini wazagai n’a na warni paŋ lai.

²¹Ni n’a ha mini gaini tempel, a ha mini gaini, gaini ni n’a sumna warni lai.

²²Ni n’a ha mini gaini fuŋ-n’Alaw ɗa a ha mini gaiɗi paramaini Alaw gaini ni n’a sumna warɗi lai.

²³Haw buriki, tiki ɗai zi ɗû wazagai gaiki tiki Farisekai, tiki zi rhai, ki si doogoni mante gaini anet gaini kumin, amma ki hini wala n’a na abai a suwa n’aŋ war seŋ zi gadai maini jre, gaini yim gaini yimi ɵa edi. Hanɗa a wazagai n’aga ki ziŋ, na zamai zamai ɗa a hina edi kaalai.

²⁴Tiki zi ɵi wuze na malvanai, ki yûri avili edi, amma ki rɓi ɵigini.

²⁵Haw buriki, tiki ɗai zi ɗû wazagai gaiki tiki Farisekai, zi rhai, tiki ki mi duɓaɗi feŋkiya gaini tasa edi, amma warni a va gaini wazagai zi hill gaini wazagai zi dulam.

²⁶Tuku Farise na melveŋ, ma warɗi feŋkiya gaini tasa edi avut, kapai duɓani a sida aŋ bunda hilu lai.

²⁷Haw buriki, tiki ɗai zi ɗû wazagai gaiki tiki Farisekai, si rhai, tiki ki ɗa maini yeɵ na gaini ɵirɓi muɗukwi, na duɓani pɗem gara, amma warni a va gaini keɵkeɗi ɗai zi mri, gaini wazagai na haharai paŋ.

²⁸Maini nɵa, tiki lai, ki zi siki jrekai arɗi ɗai, amma warki a va gaini rhai gaini wala na war futini ɗikat kai.

²⁹Haw buriki, tiki ɗai zi ɗû wazagai gaiki tiki Farisekai, ki rgi yeɵɗi ɗai na min Alaw, ki zizini yeɵɗi ɗai na jrekai pɗem lai,

³⁰ki miɗi, ɓa tiyi mi ɗifu war mefeŋɗi tamaiyi ɗa, aga mi tipi ktai gaiɗi aŋ ma felɗi ɗai na min Alaw edi kai.

³¹Nɵa ki zi zaida miɗiki dama na ɗa ɓa tiki ki ɗi aliɗi nagai n’e fiɗiɗi ɗai na min Alaw ɗa.

³²Tiki lai ki vi amai daramɗi tamaiki.

³³Tiki wala-meefeŋ, pinsibani hibe, aga ki pri edi min kûɗi-sariya na wiiɗi avai-z'afu maɵa maɵa ɗa?

³⁴Buri nɵa, tili, mu siki ɗai na min Alaw gaiɗi ɗai na yalakai gaiɗi ɗai zi ɗû wazagai, zamai arbaɗi aga ki fiɗiɗi edi, na zamai aga ki tukûɗi amai sin luwuŋ zi dagra, zamai arbaɗi aga ki ɵûɗi siɗi edi warni sinagogneɗi, aga ki ziɗi gir, aga ki ɵimiɗi war fuŋ-fuŋ.

³⁵Kapai felɗi ɗai na jre-ɗikat paŋ n’a ma edi midiɗi yai aga a kɵasi midiki, sini felni Abel na jre-ɗikat par ha felni Sakariyas, ahini Barakiya, na ki fiɗiŋ edi arbani tempel garni hlai zi ɓaka.

³⁶Jre, mu miɗiki, wazagai hanɗa paŋ aga a halasi midini pinziba hanɗa.

³⁷Yeruzalem. Yeruzalem, tuku na ku fiɗiɗi ɗai na min Alaw edi, na ku ɵiŋkiɗi gaini kriyit nagai n’e ɵiniɗisi suku lai. Azi viya mu firya mu tipiɗi aliku maiɗi yuguri na te tapa aliɗi na kuɗu-kuɗu azumai pin baadaɗi nɵa, amma ki diri kai.

³⁸Buri nɵa, dalamki aga a hina edi aŋ greŋ.

³⁹Buri mu miɗiki, tiki aga ki tiliŋa kir kai, haa won hlai n’aga ki miɗi, ɓiki aŋ midini ni n’a halasi war yikini Epiɗ-ɗai.