Read Mousgoum Matewus 26 Bible Online

Matewus 26 - Mousgoum bible

Matewus 26

¹Won hlai na Yesu a vada seŋ zi miɗi hanɗa paŋ ya, a miɗiɗi wiiɗi ɗaini zi hitri:

²Ki siɗi ya ɓa mefeŋ aŋ kai sulu, kapai fet na wiini Paska te za, Ahini-ɗif aga a sa edi aŋ toko amai sin luwuŋ zi dagra.

³Won hlai ni paakai n’abakai zi ɓaka gaiɗi n’abakai n’arbaɗi ɗai, e tipi war pakataini pai n’abai zi ɓaka na yikini Kaifas.

⁴E kiti seŋ buri e yimi Yesu gaini yel, aŋ fiɗiŋ lai.

⁵Amma e miɗi, warɗi fet kai, kapai dûrgûzi aga a faka amai arbaɗi ɗai kai.

⁶Amma won hlai na Yesu a halasi war Betaniya warni dalamni Simon zi duggum,

⁷muni ktai te halasi sini gaiɗi gazasai alabaste gaini emel na wûrini abai gara, te miŋni midini won hlai n’a sumna aŋ suma.

⁸Amma won hlai ɗaini zi hitri e tili hanɗa e zi hiy e miɗi, te tuura yitir hanɗa edi nɵa buri ma ɗa?

⁹Emel hanɗa, a kiɗa a wura edi, buri sulai viya, e siŋɗi wiiɗi na murgakai lai.

¹⁰Won hlai na Yesu a siɗa hanɗa a miɗiɗi, ki hûwyiti muni buri ma ɗa? Na te zaŋ buriya na ɗa a wala na pɗem.

¹¹Buri ɓa na murgakai e ɗa arbaki kûreɗ-kûreɗ, amma ta mu na arbaki kureɗ kai.

¹²Buri won hlai na te ma emel hanɗa sa, te zizinaŋa buri piŋa n’azumai.

¹³Jre mu miɗiki, -woɗi paŋ na labar zi firiyi hanɗa aga a ɓaka edi warɗi yai ɗa, wala na te zaŋ ɗa lai, aga a muɗa edi kapai ɗai midiɗi a kɵa gaiɗi.

¹⁴Won hlai ni ktai arbaɗi na doogo pi sulu, na yikini ɓa Yudas Iskariot, a hala siɗi paakai n’abakai zi ɓaka

¹⁵a muɗa: ki siŋa ɗa a ma ɗa, na kapai mu saŋ edi war tiki ɗa? Nagai e sini sulai na muɗukwi doogo doogo hu.

¹⁶Won hlai ni par a paiya aŋ saŋ war tiɗi.

¹⁷Amma war mefeŋ n’avut na wiini peŋ na is arni kai ɗa, ɗai zi hitri e hilisi sini Yesu e miɗini: Ku firiya ɓa mi zizinuku simi na miɗi fet na wiini Paska ɗa wata ɗa?

¹⁸A wiyiɗi seŋ a muɗa: Hili warni fuŋ n’abai ɗa, sini wala kene se ki miɗini ɓa: Api zi hitri ɓa: Hlai a cosi li, a dara a ziti fet na wiini Paska ɗa ahaku gaiɗi ɗaini zi hitri.

¹⁹Ɗai zi hitri e zi maini na Yesu a miɗiŋɗi nɵa, e zizini simi na miɗi fet na wiini Paska ɗa lai.

²⁰Won hlai na futi te za li koskoi, a sumna azumai aŋ suma gaiɗi na doogo pi sulu.

²¹Won hlai n’e ɗa aŋ simi a muɗa: Jre mu miɗiki, ktai aga a za tege pa.

²²Nagai paŋ e kwimi gara, ɗif paŋ a zilbaŋ ɓa: Epiɗ-ɗai, muta ɗi? Epiɗ-ɗai muta ɗi?

²³A wiyiɗi seŋ: Ni n’a wa tini war tasa gaya ɗa, a ni n’aga a saŋa edi ɗa.

²⁴Ahini-ɗif aga a hala maini na ɗû a muɗasi midini nɵa, amma haw gara burini ɗif n’aga a saŋ edi ɗa, ɗif hanɗa a wa wii edi kai maa pɗem pɗem.

²⁵Yudas, ni n’a za tege pini ɗa, a zilbaŋ: Rabbi, muta ɗi? A miɗini, tuku gaini muku ku muɗaŋ ya.

²⁶Won hlai n’e simni aŋ simi, Yesu a tika peŋ ktai, asakal n’a ɓakaŋ ya, a ɓurwaŋ, a siŋɗi wiiɗi ɗaini zi hitri a muɗa: Miliŋ, simiŋ hanɗa a sa;

²⁷Asakal par a tikiti kup zi ci ktai, asakal n’a sa tese ya, a sitiɗi a muɗa: Ci paŋ warɗi.

²⁸Hanɗa a felŋa, fel na wiini bonu na hehe, n’a ma edi buriɗi ɗai viya buri ni na wiini tuwur.

²⁹Mu miɗiki tiyana par aga mu ca siyemni ali luwuŋ zi vin hanɗa gaiki kir kai, haa mu caŋ gaiki katawai ɗa warɗi pai na wiini Apa.

³⁰Won hlai na e zini yama na wiini David n’a muɗa midiɗi fet ɗa ya, e hili edi siɗi huwuŋ zi luwuŋ olive;

³¹Nɵa Yesu a miɗiɗi: War duvuk hanɗa aga mu za aŋ wala zi dibi buriki paŋ, buri ɗû a ɗosi nɵa: Aga mu fuɗa ɗif zi giɗimi, adumai na war faraŋ aga a ɵara edi.

³²Amma mu ɵiya amai li ɗa, aga mu halaɗi wuzaki a Galileya.

³³Peter a waya seŋ a miɗini: Koo ɓa ku za aŋ wala zi dibi buriɗi paŋ kaw, aga ku za aŋ wala zi dibi buriya ta duk kai zaŋ.

³⁴Yesu a miɗini: Jre, mu muɗuku: war duvuk na ɗa, haa hlai na yugur a yika ta ɗa, aga ku ɓuɓura muku azi hu buriya.

³⁵Peter a miɗini: Koo mu mra buriku kaw, mu mra gai mri ɵa, aga mu ɓuɓura maa buriku kai. Ɗai zi hitri paŋ e miɗi ɵa lai.

³⁶Asakal a halasi gaiɗi won hlai n’e yikiŋ ɓa: Getsemane, a miɗiɗi wiiɗi ɗai zi hitri: simni ka woni na ca,

³⁷mu dara mu yima sa edi war baŋa agwi aŋ siiwa. A yima Peter gaiɗi alini Zebedewus na sulu pini, a tika pini a kwima, hunai te tika piɗi aŋ yimaŋ lai.

³⁸A miɗiɗi: Sumfaɗi agula a kwima gara haa mini mri, simni ka woni na ca, simni karki gaya.

³⁹A tora wuzani sek agwi, a kɵa azumai, a pa arni azumai midini afti a siiwa a muɗa: Apa na ɓa a sɗa aŋ za ɗa, ku hiniti kup hanɗa te sa sa kai, paŋ ktai maini na mu daraŋ nɵa kai, amma maini na tuku ku daraŋ ɗa nɵa.

⁴⁰A halasi siɗi ɗai zi hitri a niviɗisi weseŋ a miɗini wiini Peter: Ki kiɗi aŋ simni karki gaya ler nɵa ktai kai ɗi?

⁴¹Simni karki, siiwi, kapai tanai a niviki kai, Seze a kurfuk, amma neŋ-si a huruf.

⁴²A yima sini edi siɗi par pra, azi n’ag'aŋ sulu, a siiwa a muɗa: Apa na ɓa kup hanɗa te kiɗa aŋ ɗala buriya kai, sai ɓa mu citi tetew ɗa, hina diriku a za maini na ku daraŋ ɵa.

⁴³A halasi a niviɗisi weseŋ pra, arɗi a yima amai kai tini weseŋ.

⁴⁴A hiniɗi ka mak, a yima sini edi azi n’ag'aŋ hu aŋ siiwa, a muɗa ɗa a seŋ ni dama.

⁴⁵Asakal a wayasi siɗi ɗai zi hitri a miɗiɗi: ki kili miki ɗa a weseŋ bas, siki amla lai, ler a cosi li, Ahini-ɗif aga a sa edi tiɗi ɗai na tuwarai.

⁴⁶Fiki amai, hulumu, ni n’aga a saŋa edi ɗa a ŋasi gobi.

⁴⁷A nafu aŋ muɗa hai, a tala ɗa Yudas ktai arbaɗi na doogo pi sulu, a cosi sini gaini firiɗi ɗai pini, gaini kaɵkar gaini amaraŋa lai tiɗi. E ɵiniɗisi ɗa e ɗi paakai n’abakai zi ɓaka, gaiɗi n’abakai n’arbaɗi ɗai.

⁴⁸Ni n’aga a saŋ edi ɗa a miɗiɗisi ya ɓa: Ni n’aga mu kɵa amai wulani ɗa, a ni, ki yimiŋ.

⁴⁹A faka tar a hala sini Yesu a muɗa: Rabbi, ku yiva li ɗi, a kɵa amai wulani lai.

⁵⁰Yesu a miɗini: Marmaya, na ku halasi aŋ zaŋ ɗa, zaŋ. Nɵa ɗai ɗa e hilisi e yimi Yesu, e hili gaini.

⁵¹Ktai arbaɗi na pini Yesu, a sotosi kaɵkarni edi, a bla bege na wiini pai n’abai zi ɓaka ɗa, a ɗukla ɵimani edi.

⁵²Yesu a miɗini: Wa kaɵkarku war sotoni, buri nagai paŋ n’e hitimi gaini kaɵkar ɗa, aga e mri mini kaɵkar lai.

⁵³Ku sɗa ɓa, mu kiɗa aŋ siiwa Apa buri a ɵinaŋasi vokɗi askarai na war fuŋ-n’Alaw a suwa Legiyon doogo pi sulu tiyana tar.

⁵⁴Kapai ɗû n’a muɗa wala na maini hanɗa ɵa ɗa, a kiɗa aŋ va amai ɗa maɵa maɵa ɗa?

⁵⁵Yesu a miɗini wiini firi ɓa: Ki hilisi aŋ yimiŋa gaini kaɵkar gaini maraŋa lai maini gorɓolo ɵa maɵa maɵa ɗa? Mefeŋ paŋ mu nafu warni tempel dam aŋ hitra, ki yimiŋa ka kai,

⁵⁶Amma hanɗa a za nɵa kapai ɗû na wiiɗi ɗai na mini Alaw ɗa a va amai. War hlai ni ɗai zi hitri paŋ e hiniŋ e pri edi.

⁵⁷Nagai n’e yimi Yesu ɗa e kiŋ sini pai n’abai zi ɓaka Kefas, woni ɗai zi ɗû wazagai gaiɗi n’abakai n’arbaɗi ɗai e tipi woni.

⁵⁸Peter a ɵa pini gaigai par su haa aha war dalamni pai n’abai zi ɓaka ta, a niya aha woni, a sumna azumai gaiɗi ɗai zi gɗam dam kapai a tala wala n’aga a za ɗa.

⁵⁹Paakai n’abakai zi ɓaka gaiɗi ɗai zi kiti seŋ ɗa paŋ, e piyi zaida na jre kai ktai midini Yesu, kapai e siɗi aŋ fidiŋ edi.

⁶⁰Zaidakai na jrekai kai viya e hilisi, e nivi wala ktai midini kai, sini vidini sek ɗa, ɗai sulu e hilisi e miɗi ɓa:

⁶¹A muɗa ɓa: Mu kiɗa mu haɗa empel na wiini Alaw azumai, mu rgaŋ amai pra lai.

⁶²Won hlai ni, pai zi ɓaka n’abai a faka amai a muɗa: Seŋ na nagai hanɗa e miɗiŋ muduku na ɗa, tuku ku muɗa kai?

⁶³Yesu a ba mini liyik. Pai n’abai zi ɓaka a tika seŋ a muɗa: Mu huku ma gaini Alaw na karni zaŋ, miɗiyi haw ɗa, ku Kristu n’Ahini Alaw ɗi?

⁶⁴Yesu a miɗini: Ku muɗa na ɗa a ni mal, mi miɗiki ɓa: Tiyana par aga ki tili Ahini-ɗif gaini simni warni hlai zi hormo na wiini Alaw zi spak dam, aga a halasi arbani ɗugu warni hlai n’amai par.

⁶⁵Won hlai ni pai n’abai zi ɓaka a ɓasa sapa na sini edi a muɗa: A tirka Alaw, mu zumu gaiɗi zaidakai na zamai ɗa a ma ɗa? Tiki ki ɵini tirki n’a tirka Alaw, ki hiini maɵa?

⁶⁶E wiyi seŋ e miɗi: a hina burini ɗa a fiɗi n’edi.

⁶⁷Won hlai ni e ɵiɓi teenek arni e ɵiɓiŋ gaini kutupa, gaini pupur lai.

⁶⁸E miɗi: Kristu, vla haw, a ɵuɓuku ɗa asiya ɗa?

⁶⁹Peter a nafu anene dam war pakatai. Ahiyagoi zi sda ktai te halasi sini te muɗa: Tuku lai ku nasi fu gaini Yesu na Galalileya par kai!

⁷⁰Amma a ɓuɓura mini wuzaɗi ɗai paŋ a muɗa: Na ku muɗaŋ na ɗa mu sɗaŋ kai koo!

⁷¹Won hlai n’a hala mini magala sek ɗa, ahiyagoi zamai te talaŋ, te miɗiɗi wiiɗi nagai n’e ɗifu woni ca ɗa ɓa: ɗif hanɗa a na gaini Yesu na Nazaret ɗa par.

⁷²A bla sini edi, a ha wala mini, a muɗa: Mu sɗa ɗif n’aŋ tiki na ɗa kai.

⁷³Amma safai agwi, nagai n’e ɗa ca ca ɗa, e hilisi e miɗini wiini Peter: A futini, tuku lai ku ɗif na gaiɗi ɗai hanɗa, seŋ na ku muɗaŋ ɗa a suŋkuku edi ta.

⁷⁴Won hlai ni Peter a tika pini aŋ tuwa sini dama, a ha wala mini lai a muɗa: Mu sɗa ɗif hanɗa kai! Safai kai, yugur a yika.

⁷⁵Peter midini a kɵa gaini seŋ na Yesu a muɗaŋ ɓa: Haa yugur a yika ta ta ɗa, aga ku ɓuɓura muku buriya azi hu. A niya anene, woni a tuwa abai gara.