Read Mousgoum Matewus 27 Bible Online

Matewus 27 - Mousgoum bible

Matewus 27

¹Won hlai na dawai par a za li, paakai n’abakai zi ɓaka gaiɗi n’abakai n’arbaɗi ɗai, e kiti miɗi midini Yesu kapai e siɗi aŋ fiɗiŋ edi.

²E niggiŋ ɓak, e hili gaini, e kiŋ e siŋ tini Lawan Pontiyus Pilatus.

³Won hlai na Yudas n’a saŋ edi, a tala ɓa sariya te ko midini li, hiinini a tuura, a wayasi siɗi paakai n’abakai zi ɓaka gaiɗi n’abakai gaini sulai zi arzaŋ na doogo doogo hu ɗa, a muɗa:

⁴Si na mu sa ɗif na tini war seŋ kai edi ɗa, mu za tuwur. E wiyini seŋ e miɗi: Jaayi maa, hanɗa a seŋku.

⁵Yudas a poko sulai amlai warni hlai na sɗik, a hala a nagga sini amai.

⁶Amma paakai n’abakai zi ɓaka e mili sulai ɗa e miɗi: Ki mili sulai hanɗa warni Zunduk na wiini tempel ɗa kai, buri hanɗa a sulai zi fel.

⁷E kiti seŋ arbaɗi marɗi buri e wûri vuwai na wiini ɗif zi ɵi grak gaini sulai ni aŋ hlai n’e piɗi ɗai na morkokai woni.

⁸Buri nɵa, vuwai hanɗa e sini yiki ɓa: vuwai zi fel, yiki hanɗa a hina sini ɵa haa girna.

⁹Won hlai ni wala n’a muɗa mini ɗif na mini Alaw Yeremiyas a va amai, e mili sulai zi arzaŋ doogo doogo hu, hanɗa a farai n’aliɗi Izrayel, e kitiŋ aŋ siŋ midini ni na e firiyiŋ ta ɗa,

¹⁰E siŋ midini vuwai na wiini ɗif zi rgi grak, maini Epiɗ-ɗai a muɗaŋ ɗa ɵa.

¹¹Yesu a ɗiya wuzani Lawan Pilatus, Lawan a zilbaŋ: tuku ku paiɗi Yudeyakai ɗi?

¹²Yesu a midini: ku muɗa na ɗa a ni mal. Amma midini seŋ paŋ na paakai n’abakai zi ɓaka gaiɗi n’abakai n’arbaɗi ɗai lai e piŋ midini, a waya seŋ kai zaŋ.

¹³Nɵa Pilatus a miɗini: Ku na ɵina seŋ n’e piŋ muduku na tiɓ ɗi?

¹⁴Amma a waya seŋ midini ktai kai zaŋ, haa Lawan ɗa a bunda hiyak gara.

¹⁵Miɗi fet paŋ, pini de ɗa, Lawan a ɵa ɗif zi daŋgai ktai suuwa suuwa, ɗif na ɗai e diri ɓa a ɵiŋɗi ɗa.

¹⁶War sarti ni ɗa, ɗifɗi zi daŋgai ktai a na, na ɗai paŋ e siɗiŋ, yikini Barabbas.

¹⁷Buri nɵa won hlai n’a tala ɓa, ɗai e tipisi li tap ɗa, a zilbiɗi: Ki firiyi ɓa, mu ɵiki edi ɗa asiya ɗa? Barabbas, zaw Yesu n’e yikiŋ ɓa: Kristu ɗa ɗi?

¹⁸Buri a sɗa ya ɓa, e siŋ war tini aŋ sile.

¹⁹Won hlai n’a sumna warɗi Paramai zi sariya ɗa, munini te ɵinasi ɗif sini aŋ miɗini ɓa: ku wa suku warni seŋni ɗif na jre-ɗikat hanɗa kai, buri mu fana duvuk na ɗa aŋ gir tini weseŋ zi pɵi.

²⁰Paakai n’abakai zi ɓaka gaiɗi n’abakai n’arbaɗi ɗai, e ziɗi piɗi ɗai buri e zilbi ɓa, a ɵiɗisi ɗa a Barabbas, amma e fiɗi Yesu edi.

²¹Lawan a tika seŋ a miɗiɗi: arbaɗi ɗai na sulu hanɗa, ki firiyi ɓa, mu ɵiki edi ɗa asiya ɗa? E miɗi: Barabbas.

²²Pilatus a miɗiɗi: Aga mu za ɗa a ma ɗa gaini Yesu n’e yikiŋ ɓa Kristu ɗa? Paŋ e miɗi: hinaŋ a toko amai sini luwuŋ zi dagra.

²³A muɗa: Buri ma ɗa? A za na meefeŋ ɗa a ma ɗa? Amma e ɗûûli abai a suwa pra: hinaŋ a toko amai sin luwuŋ zi dagra.

²⁴Won hlai na Pilatus a tala haa, aga a za wala ktai kir kai ɗa, dûrgûzi a riya amai sek lai ɗa, a tika yem a ma tini edi wuzani arɗi ɗai paŋ, a muɗa: Seŋŋa warni felni ɗif na jre-ɗikat hanɗa kai. Ki siɗi seŋni ki ɗi tiki.

²⁵Ɗai paŋ e wiyi seŋ e miɗi: felni a zilba tiyi tiyi, tiɗi aliyi lai. Nɵa Pilatus a ɵiɗisi Barabbas edi su, a sa miɗi buri e ɵiɓi Yesu gaini daɓala, a saŋ e tûkûŋ amai sini luwuŋ zi dagra.

²⁶Nɵa Pilatus a ɵiɗisi Barabbas edi su, amma Yesu ɗa a ɵoɗo sini edi gaini daɓala, a siŋɗi aŋ tûkûŋ amai sin luwuŋ zi dagra.

²⁷Won hlai ni, askarai na wiini Lawan e yimi Yesu, e kiŋ amlai warni kaŋ na wiiɗi askarai, e tipiɗisi askarai zi giɗimi paŋ sini.

²⁸E fûkû sapani edi, e wiini kaput na mekele hiira sini,

²⁹e hiti bogorai zi hedek e pitini midini, e sini vayai war tini na wus, e hûrgi azumai wuzani e zini yewere e miɗi: Lapiya, paiɗi Yudeyakai!

³⁰E ɵiɓi teenek sini, e tiki vayai ɗa e ɵiɓi midini gaini.

³¹Asakal na e zini yewere ɗa ya, e fûkû kaput na sini edi, e wiini sapani dama sini, e hili gaini aŋ tûkûŋ amai sini luwuŋ zi dagra.

³²Won hlai n’e ɗa aŋ hili edi sek ɗa, e yimi ɗif ktai na Kerene par na yikini ɓa: Simun, e yimiŋ gaini gdaŋ aŋ luba dagrani Yesu.

³³E cû war hlai na e yikiŋ ɓa: Golgota, a dara a muɗa: Hlai zi Keɵke na Humok.

³⁴E sini vin na e zilniŋ gaini wala na ɗewek. Won hlai n’a tetemaŋ a dara a caŋ kai.

³⁵E tûkûŋ amai sini luwuŋ zi dagra, e ɓûrwi sapani arbaɗi pini wala zi vili.

³⁶E simni azumai aŋ giɗimiŋ aŋ pai.

³⁷Amai par midini e ɗû seŋ na e tûkûŋ amai pini ɗa maini nɵa: Hanɗa a Yesu na paiɗi Yudeyakai.

³⁸Gorɓolokai sulu e ɗifu gaini tûki amai sini luwuŋ zi dagra lai, ktai war galni na wus par, na ktai war galni na muni par lai.

³⁹Nagai n’e vigi ɗa, e tirkŋ, e kikiyi miɗiɗi,

⁴⁰E miɗi: tuku, na ku haɗa tempel azumai, ku rgaŋ amai war mefeŋ hu lai ɗa, kora suku haw kir ka, na ɓa k’ahini Alaw ɗa, niyasi azumai sini luwuŋ zi dagra par haw ka.

⁴¹Paakai n’abakai zi ɓaka gaiɗi n’abakai n’arbaɗi ɗai lai e zini yewere e miɗi:

⁴²A kurɗa ɗai zamai kir ka, sini dama a kurɗa gaini kai! A paiɗi Izrayel kir ka, a niyasi azumai sini dagra par haw, kapai mi yimi warni.

⁴³A koraŋ tiyana haw kir ka, Ni a baya tini Alaw, n’a muɗa lai ɓa a Ahini Alaw ɗa.

⁴⁴Gorɓolokai lai, nagai n’e tûkûɗi amai sini luwuŋ zi dagra gaini ɗa, e zini yewere ɵa lai.

⁴⁵Girvudi n’arba par haa sa hu ta, gegeŋ a wa tini edi midini afti paŋ.

⁴⁶Sini sa hu ɗa, Yesu a ɗuula gaini gdaŋni a muɗa: Eli, Eli, lema sabak tani! a dara a muɗa: Alaw wiya, Alaw wiya, ku hinaŋa edi buri ma ɗa?

⁴⁷zamai arbaɗi ɗai n’e ɗifu woni ɗa, e ɵini hanɗa e miɗi: A na yika Eliyas aŋ tiki na.

⁴⁸Tizaw, ktai arbaɗi a lawa, a tikasi tipeɵ, a jiibaŋ arni vin na hahayaŋ, a hag'aŋ amai mini vayai a siŋni aŋ ci.

⁴⁹Amma na zamai e miɗi: Hiniŋ, mu tuluŋmu haw, na Eliyas aga a halasi a kurɗaŋ ɗi ɗa.

⁵⁰Amma Yesu a ɗuula gaini gdaŋni pra, suŋfani a wa edi.

⁵¹Won hlai ni, sapa na warni hlai na sɗik a ɓasa amai par haa azumai ta, afti a ziriya, huwaŋai a ɓasa,

⁵²mini waŋ na wiiɗi zi mri a mala edi, ɗai na sɗik viya n’e kili weseŋ e ɵiyisi amai.

⁵³E niyi edi warni waŋ par asakal ɵiyi n’amai na wiini Yesu, e niyi aha war fuŋ n’abai na sɗik, e siŋki siɗi arɗi ɗai viya.

⁵⁴Amma won hlai na paiɗi askarai na miya ktai pini gaiɗi nagai n’e giɗimi Yesu ɗa, e tili afti a ziriya ɗa, hunai n’abai te yimiɗi, e miɗi: ɗif hanɗa a Ahini Alaw fakat.

⁵⁵Falakai viya e tipi pini Yesu war Galeliya par buri e zini pini, e ɗiyisi e tili edi gaigai par.

⁵⁶Mariya Magdalene, gaiɗi Mariya emini Yakob gaini Yosef, gaiɗi emiɗi alini Sebedewus lai e ɗifu gaiɗi.

⁵⁷Amma won hlai na futi koskoi te za li, ɗif zi farai ktai na war Arimateya par, na yikini ɓa: Yosef, a halasi, ni a ɗif zi hitri na wiini Yesu lai.

⁵⁸A hala sini Pilatus, a zilba kopoŋni Yesu, nɵa Pilatus a sa miɗi buri e sini kopoŋ ɗa.

⁵⁹Yosef a tikaŋ, a faɗaŋ war sapa na selte sini kai.

⁶⁰A tikaŋ war waŋ na hehe n’a ɓulaŋ siɗi huwuŋ aŋ wiini, a likititi fukuni n’amai a dûgûti mini waŋ, a hala wiini.

⁶¹Mariya Magdalene gaiɗi Mariya na ktai e ɗifu azumai ca, wuzani hlai n’e pi Yesu woni.

⁶²Dawaini, a dara a muɗa mefeŋ na asakalni mefeŋ zizinisi-si par ɗa, paakai n’abakai zi ɓaka gaiɗi Farisekai e tipi sini Pilatus,

⁶³e miɗini: Epin-gezayi, midiyi a kɵa gaini wala na ɗif z'eles hanɗa a miɗiŋyi won hlai n’a naka karni hai ɗa, a muɗa ɓa: Mu za li mefeŋ hu ɗa aga mu ɵiya amai.

⁶⁴Buri nɵa ku miɗi buri e giɗimi yeɵni pɗem haa sini mefeŋ n’ag'aŋ hu ta, kapai ɗaini zi hitri e hilisi e hiliŋ hill, kapai e miɗi wiiɗi ɗai ɓa a ɵiya amai war mri par ɵiy ɗa kai; wili n’edi na asakal ɗa aga a bunda meefeŋ a suwa n’avut ɗa pra.

⁶⁵Pilatus a miɗiɗi: Askarai zi giɗimi e ɗa, e hili e giɗimi maini na e diri nɵa,

⁶⁶E hili e mili ɗai aŋ giɗimi waŋ ɗa, e dûgi mini waŋ azumai gaini futini, e ɗiyiɗi ɗai zi giɗimi ca ca lai.