Read Mousgoum Matewus 28 Bible Online

Matewus 28 - Mousgoum bible

Matewus 28

¹Asakal Sabbat par, gorof na hlai a sɗasi edi war demas sek ɗa, Mariya Magdalene gaiɗi Mariya na ktai lai e hilisi buri e tili waŋ ɗa.

²Tizaw, ziriyini afti n’abai a za, ɗif zi ɵeŋ na war fuŋ-n’Alaw par na wiini Epiɗ-ɗai a niyasi azumai amai warni Hlai n’amai par, a halasi a ligititi fukuni ɗa edi likat, a sumna midiɗi dam.

³Sini a tala maini wilɗi nɵa, sapa sini muɗukwi tal maini fiyaw nɵa lai.

⁴Ɗai zi giɗimi e ziriyi tiɗi hunai, e bindi maini na gaini mri ca nɵa.

⁵Amma ɗif zi ɵeŋ na war fuŋ-n’Alaw par a muɗa siɗi falakai maini nɵa: tiki ɗa, ki hûni kai, mu siɗa ɓa, ki piyi na ɗa a Yesu, n’e tûkûŋ amai sini luwuŋ zi dagra ɗa.

⁶Aŋ woni na kai, a ɵiya amai ya, maini n’a miɗiŋki ɗa nɵa. Hilisi, tili hlai n’a naka woni waŋ ɗa.

⁷Hili witaw, ki miɗi wiiɗi ɗaini zi hitri ɓa a ɵiya amai arbaɗi zi mri par ya. A na hala wuzaki a Galeliya sek, aga ki tiliŋ ɗa woni. A na maini hanɗa ɵa, mu miɗiŋki ya.

⁸E hili edi sini waŋ par witaw, gaini hunai gaini firiyi n’abai lai, e liwi buri e ki labar wiiɗi ɗai zi hitri na wiini Yesu.

⁹Yesu a nava gaiɗi a muɗa: Mu ziki wuti. E hilisi sini, e yimi ezini e hûrgi azumai wuzani.

¹⁰Nɵa Yesu a miɗiɗi: ki hûni kai, hili, ki miɗiɗi wiiɗi tawalakaya ɓa: e hilisi Galeliya, aga e niviŋaɗi ɗa woni.

¹¹Won hlai n’e ɗa warɗi futi, zamai arbaɗi ɗai zi giɗimi waŋ e hilisi aha war fuŋ n’abai e miɗi seŋ n’a za paŋ wiiɗi paakai n’abakai zi ɓaka.

¹²Paakai n’abakai zi ɓaka e tipi gaiɗi n’abakai n’arbaɗi ɗai, e kiti miɗi buri e siɗi farai viya wiiɗi ɗai zi giɗimi.

¹³E miɗiɗi ɓa: Ki miɗi ɓa, ɗaini zi hitri e hilisi duvuk e hiliŋ hill, won hlai na mi ɗa weseŋ.

¹⁴Na ɓa Lawan a ɵina seŋ hanɗa li ɗa, tiyi aga mi miɗi gaini kapai a ziki wala na meefeŋ kai.

¹⁵Askarai e mili farai ɗa, e zi maini na ɗai e miɗiŋɗi nɵa, miɗi hanɗa a wa edi arbaɗi Yudeyakai haa girna.

¹⁶Ɗai zi hitri na doogo pi ktai e hili a Galileya siɗi huwuŋ na Yesu a miɗiɗi gaiɗi,

¹⁷Won hlai n’e tiliŋ, e hûrgi azumai wuzani, amma na zamai e giriŋi.

¹⁸Yesu a torosi siɗi a miɗiɗi: spak paŋ a sa ta, na warni fuŋ-n’Alaw gaini na midiɗi yai lai,

¹⁹hili, ɗai na war pinziba paŋ, ki bindiɗi aŋ ɗai zi hitri, ki siɗi baptisme war yikini Api, war yikini Ahi, war yikini Seze sɗik lai,

²⁰ki hitriɗi aŋ yimi wazagai na mu gidiki gaini paŋ ɗa, mu na gaiki ɵa kureɗ, haa war dibiɗi yai.