Read Mousgoum Matewus 4 Bible Online

Matewus 4 - Mousgoum bible

Matewus 4

¹Nɵa Seze a ka Yesu edi war basga na kaɗataŋ, kapai Mat a tetemaŋ.

²Asakal na Yesu a tika sai mefeŋ doogo doogo puɗu girvudi gaini duvuk, wiyamai te zaŋ.

³Zi tini ɗai a halasi a miɗini: na ɓa k’Ahini Alaw ɗa, muɗa sini ali-fuŋ hanɗa a bunda aŋ wala zi simi.

⁴Yesu a waya seŋ: aŋ gaini ɗû ɓa: ɗif murɗek a sumna karni gaini wala zi simi kiini kai, amma gaini seŋ paŋ n’a niyasi edi mini Alaw par.

⁵Mat a kaŋ war fuŋ n’abai na sɗik, a tikaŋ amai merfeŋni tempel, a miɗini

⁶a miɗini: na ɓa k’Ahini Alaw ɗa, bula suku azumai haw, buri aŋ gaini ɗû ɓa: aga a sa miɗi wiiɗi ɗaini zi ɵeŋ buriku, aga e ziyiku amai warni tiɗi kapai azuku a daba sini ahi-fuŋ kai.

⁷Yesu a miɗini, aŋ gaini ɗû lai ɓa: aga ku piyini mini Epiɗ-ɗai Alaw na wiiku kai.

⁸Mat a tikaŋ pra, a kaŋ katawai amai midiɗi huwuŋ na muguwi, a siŋkini aftiɗi paakai na midiɗi yai ɗa paŋ gaiɗi abai na paŋ.

⁹A miɗini: hanɗa paŋ ɗa aga mu suŋku, na ɓa ku hurga li azumai wuza ɗa.

¹⁰Yesu a miɗini: Faka edi ma par, Satan, buri aŋ gaini ɗû ɓa: Aga ku hurga ɗa azumai wuzani Epiɗ-ɗai Alaw na wiiku, ku siiwa ɗa a ni ktai lai.

¹¹Nɵa Mat a hinaŋ, ɗai zi ɵeŋ na war fuŋ n’Alaw e hilisi e zini pini.

¹²Won hlai n’a ɵina ɓa, e ɵi Yohana warɗi daŋgai su ɗa, Yesu a yima sini edi war Galeliya par.

¹³A hala a Nazaret par, a sumna a Kapernahum, midini afti na wiini Zabulon gaini na wiini Naftali.

¹⁴Kapai wala n’a muɗa min ɗif na min Alaw Esaya aga a va, n’a muɗa,

¹⁵Aftini Zabulon gaini Naftali, ɵimani yem-ra-n’abai duɓani Yurdan, Galileyaɗi ɗai na kadai.

¹⁶Ɗai n’e simni war gegeŋ e tili gaglai n’abai, siɗi nagai n’e simni war aftini mri, war sezeni mri lai siɗi nagai gaglai a diya amai.

¹⁷Won hlai hanɗa par Yesu a tika pini aŋ ɓaka seŋ a muɗa, ki himi, buri paini fuŋ-n’Alaw te ŋasi gobi.

¹⁸Won hlai na ni a na paiya ɵimani yem-ra-n’abai na Galileya, a tiliɗi tawalakai sulu, Simon, n’e yikiŋ Peter, gaini tawalni Andrea, n’e ɗa aŋ ɵi ava agoɗom, buri nagai e ɗi ɗai zi yimi hilif.

¹⁹A miɗiɗi, tipisi pa, aga mu bindiki aŋ ɗai zi yimi ɗai.

²⁰Tizaw tar, e hini avaɗi e tipi pini.

²¹Won hlai n’a na hala wuzani, a tiliɗi tawalakai na zamai sulu, Yakob, ahini Sebedew, gaini tawalni Yohana, e simni warni hulum gaini epiɗi, Sebedeu, e ɗa aŋ sisini avaɗi, a yikiɗi.

²²Tizaw tar e hini hulum gaini epiɗi e tipi pini.

²³Yesu a paya war Galileya paŋ a hitriɗi ɗai warni sinagogneɗi. A ɓaka labar zi firiyi midiɗi pai, a zuula veglek na zamai zamai paŋ gaini huruf n’arbaɗi ɗai paŋ.

²⁴Labar burini a wa edi war Siriya paŋ, e kiɗinisi sini ɗai zi veglek paŋ na veglek zamai zamai paŋ gaini gir paŋ a yimiɗi, gaiɗi nagai na ksalai aŋ midiɗi, nagai na gaini duuli n’a bunda pin tile, gaiɗi nagai na gaini gumriki a zûûliɗi paŋ.

²⁵Firiɗi ɗai e tipi pini war Galileya gaiɗi Dekapolis gaiɗi Yeruzalem gaini Yudea par, gaini afti na duɓani Yurdan par lai.