Read Mousgoum Matewus 5 Bible Online

Matewus 5 - Mousgoum bible

Matewus 5

¹Won hlai n’a tala firiɗi ɗai a niya amai midiɗi huwuŋ, a sumna azumai dam, ɗaini zi hitri e hilisi sini.

²Asakal par a tika seŋ, a hitriɗi a muɗa:

³Sleɗ midiɗi nagai n’e siɗi siɗi murgakai war seze, buri paini fuŋ-n’Alaw te wiiɗi.

⁴Sleɗ midiɗi nagai n’e ɗa war kwimi, buri nagai aga e nivi arai zi pi.

⁵Sleɗ midiɗi nagai na hangalai, buri aga e nivi afti tini Alaw par aŋ bulum.

⁶Sleɗ midiɗi nagai na wiyamai gaini sai te ziɗi burini jre-ɗikat, buri nagai aga e vi.

⁷ɵeɗ midiɗi nagai na hiinini haw warɗi gara, buri Alaw aga a hiina haw buriɗi nagai lai.

⁸ɵeɗ midiɗi nagai n’agulɗi hilu, buri nagai aga e tili Alaw.

⁹Sleɗ midiɗi nagai n’e kisi ɵeɗ arbaɗi ɗai, buri nagai aga e yiki ɓa alini Alaw.

¹⁰Sleɗ midiɗi nagai n’e ziɗi gir arɗi burini jre-ɗikat, buri paini fuŋ-n’Alaw te wiiɗi.

¹¹Sleɗ miɗiki won hlai na ɗai e tirkiki, e ziki gir, e miɗi eles na meefeŋ na maɗi-maɗi paŋ miɗiki buriya ta.

¹²Firiyi, firiyi abai gara, buri vrakki a na abai amai war fuŋ-n’Alaw, buri ɓa ɗai na mini Alaw n’e ɗika wuzaki par e ziɗi gir ɗa maini hanɗa ɵa.

¹³Tiki, ki ɗi hum na wiiɗi yai, won hlai na hum a ɓa lemni edi li ɗa, aga a bunda setet katawai pra maɵa maɵa ɗa? A nafa wala kir kai, a hina tar ɗa a pûkûni n’edi, a kirpini n’azumai pini eziɗi ɗai lai.

¹⁴Tiki ki ɗi gaglai na wiiɗi yai, fuŋ n’a na midiɗi huwuŋ a siɗa aŋ ŋoya kai.

¹⁵E tiki afu war lampa buri e piti azumai piɗi wulai kai, amma e hikiti amai sini wala n’e hiki lampa sini ɗa, kapai te za gaglai buriɗi nagai n’e ɗa war dalam ɗa paŋ.

¹⁶A zuva ɓa, gaglaiki a ŋala wuzaɗi ɗai maini hanɗa ɵa, kapai e tili sidaki na pɗem, e sini kol wiini Epiki na war fuŋ-n’Alaw lai.

¹⁷Ki hiini kapai ɓa mu halasi kapai mu ɓulka edi ɗa a seŋ zi gadai na wiini Musus, zaw na wiiɗi ɗai na mini Alaw ɗi ɗa, a na ɵa kai, mu halasi buri mu ɓulkaŋ edi kai, amma buri mu vaŋ amai.

¹⁸Jre mu miɗiki, haa hlai n’amai gaiɗi yai a vada edi ɵa, wala hlai na nɵa ɗef, zaw na gaini tûûrini tar na warni ɗû par aga a tika edi kai haa wazagai n’a muɗaŋ ɗa a va amai.

¹⁹Buri nɵa, asiya ɗi paŋ n’a za pini ktai arbani gadai n’agogoi hanɗa kai, a hitriɗi ɗai aŋ zi nɵa lai, aga a yika aŋ n’agwi warɗi paini fuŋ-n’Alaw, amma ni n’a za pini gadai hanɗa, a hitriɗi ɗai aŋ zi nɵa lai, aga a yika aŋ abai warɗi paini fuŋ-n’Alaw.

²⁰Buri mu miɗiki, na ɓa jreki te sûwiti na wiiɗi ɗai zi ɗû wazagai gaiɗi Farisekai kai ɗa, aga ki niyi warɗi paini fuŋ-n’Alaw kai zaŋ.

²¹Tiki, ki ɵini ɓa seŋ a muɗa siɗi na marai ɓa: ku ɵiɓa belek, ni n’a ɵiɓa belek li ɗa, sariya aga te yimaŋ.

²²Amma muta mu miɗiki: asiya ɗi paŋ n’a za ɗa a hiy kadai sini tawalni ɗa, sariya aga te yimaŋ, asiya ɗi paŋ n’a muɗa sini tawalni ɓa: raka, aga a ɗiya wuzaɗi ɗai zi kiti seŋ, asiya ɗi paŋ n’a muɗa sini tawalni ɓa: dûûli, aga a sɗa gir warɗi avai z'afu.

²³Won hlai na ku hala aŋ za ɓaka midini gûwiŋ zi ɓaka, na ɓa woni muduku a kɵa gaini seŋ n’aŋ warni tawalku suku,

²⁴ku hina ka ɓakaku woni wuzani gûwiŋ zi ɓaka ɗa, ku hala ku toya gaini tawalku avut, asakal par ku halasi ku za ɓakaku ɗa.

²⁵Na ɓa seŋ a na arbaku gaini gawku, won hlai na ki ɗa warɗi futi yaw aŋ hili wuzaɗi sariya ɗa, ɵi seŋki piɗi marki kapai gawku a suku tini ɗif zi ɗûkliti sariya kai, kapai ni lai a suku tini ɗif zi giɗimiti daŋgai, aŋ ɵuku warɗi daŋgai kaalai.

²⁶Jre, mu muɗuku, tuku aga ku niyasi edi warɗi par kai, haa ku vurga n’a na arbaki, wala ktai maa a hina kai.

²⁷Tiki, ki ɵini miɗi a muɗa ɓa: ku za maɵara kai.

²⁸Amma ta mu miɗiki, buri asiya ɗi paŋ n’a tiliti muni, a za suuna siɗi li ɗa, a za maɵara gaiɗi warni agulni ya.

²⁹Ɓa arku na wus te firiya te buku, hûrɗiti edi, biliti edi suku par, a pɗem buriku ɓa hlai ktai na suku par agwi kadai a ɓa, a suwa na suku paŋ a ɵiŋka warɗi avai z'afu.

³⁰Ɓa tuku na wus te dara te buku ɗa, ku ɗûkliti edi, ku biliti edi suku par gaigai, a pɗem buriku ɓa hlai ktai na suku par agwi kadai a ɓa a suwa na suku paŋ a ɵiŋka warɗi avai z'afu ɗa.

³¹Miɗi a muɗa ɓa: asiya ɗi paŋ n’a biditi li munini ɗa, a siɗi maktuɓ zi bidi tiɗi ɗaw.

³²Amma ta mu miɗiki ɓa: asiya ɗi paŋ n’a biditi munini, na ɓa burini maɵara kai, a kiti na ɗa aŋ za maɵara, ni n’a tikiti muni zi bidi ɗa, a za ɗa a maɵara lai.

³³Tiki ki ɵini ɓa, seŋ a muɗa siɗi na marai ɓa: ku ha wala muku war rhai kai, wala na ku ha muku midini wuzani Epiɗ-ɗai sai ku vaŋ amai.

³⁴Amma ta mu miɗiki: ki hi wala miki kai zaŋ, gaini Hlai n’amai ɗa kai, buri ɓa ni ɗa a paramay zi pai na wiini Alaw,

³⁵gaiɗi yai ɗa kaalai, buri ɓa na ɗa te wala n’EPIƊ-ƊAI a tika ezini midiɗi aŋ niya amai, gaiɗi Yeruzalem kaalai, buri ɓa te fuŋ n’abai na wiini Pai n’abai.

³⁶Ku ha wala muku gaini humokku kai, buri tuku ku kida ku bunda ayir ktai na humokku muɗukwi kaalai, murɗek kaalai.

³⁷A zuva ɓa, nkam na wiiki ɗa a ɗiya, zaw kai na wiiki ɗa a ɗiya ɵa lai, wala na ki tikiŋsi sini hanɗa paŋ ɗa a na sini na meefeŋ par.

³⁸Tiki ki ɵini ɓa, seŋ a muɗa ɓa: arai buriɗi arai, sesiyeŋ burini sesiyeŋ lai;

³⁹amma ta mu miɗiki: ki fiki amai arni ɗif n’a za meefeŋ siki kai. Na ɓa ɗif a ɵuɓuku li war galaiku na wus ɗa, ku bindini na hanɗa.

⁴⁰Na ɓa ɗif a ɗuula li muduku aŋ militi jaŋfaku ɗa, ku hinaŋ a mula dawraku lai,

⁴¹Na ɓa ɗif a zuku dewele muduku aŋ hala gaini kilometir ɗaw, ku hala gaini kolimetir sulu.

⁴²Sini wiini ni n’a siiwa tuku, ku bula edi sini ɗif n’a dara a tufa tuku kai.

⁴³Tiki, ki ɵini ɓa miɗi a muɗa ɓa: ku dara maiku, ku bula gaw sini gawku,

⁴⁴Amma ta mu miɗiki ɓa: ki diriɗi gawki, ki siiwi buriɗi nagai n’e ziki gir ɗa lai,

⁴⁵nɵa aga ki bindi aŋ alini Epiki na war fuŋ-n’Alaw, buri a hiniti futi te diya midiɗi na maafanai gaiɗi na pɗamai paŋ, a hina faŋ a ɵa midiɗi na jre ɗikat gaiɗi na jre kai ɗa lai.

⁴⁶Buri ɓa, na ɓa ki diriɗi ɗa e ɗi ɗai n’e diriki kiiɗi ɗa, vrak zamai na ki piyi ɗa a na wata ɗa? Ɗai zi tiri kosku ɗa e zi na ɗa ɵa lai kai ɗi?

⁴⁷Na ɓa ki ɵiɓiɗi wuti wiiɗi tawalakaiki kiiɗi ɗa, na ki zi zamai n’a bunda ɗif hiyak a ma ɗa? Pinziba na zamai ɗa e zi na ɗa ɵa lai kai ɗi?

⁴⁸Buri nɵa aga ki vi amai war pɗem maini Epiki na war fuŋ-n’Alaw a na pɗem nɵa.