Read Mousgoum Matewus 7 Bible Online

Matewus 7 - Mousgoum bible

Matewus 7

¹Ku ɗûkliti sariya kai, kapai sariya te ɗukla miɗiki kai.

²Buri ɓa sariya na ki ɗa ziŋɗi wiiɗi ɗai na ɗa, aga e ziki sariya wiiki tiki nɵa lai, daram na ki ɗa ŋi gaiɗi ɗa, aga a ɗa siki tiki gaiɗi na lai.

³Tuku ku tala evek n’a na arni tawalku ɗa, amma voɗok na arku tuku ɗa, ku sɗaŋ kai ɗa maɵa maɵa ɗa?

⁴Ku sɗa aŋ muɗa sini awalku ɓa: hinaŋa mu tikasi evek na arku ɗa edi, paŋ kai voɗok n’a na arku tuku ɗa a tika edi gaiku kai ɗa maɵa maɵa ɗa?

⁵Tuku zi rhai, tika voɗok na arku edi avut ɗaw haw, nɵa aga ku sɗa futini tikini evek na arni tawalku ɗa edi.

⁶Ki si wala na sɗik wiini hirgakai kai, ki pûki aidawki azumai wuzani hoho kai, ɵa kai ɗa aga a kirpaŋ azumai, aga a bundasi siki a ɓisiki edi lai.

⁷Siiwi aga a siki, piyi aga ki nivi, ɵiɓi mini dalam aga e miliŋki edi lai;

⁸Buri asiya ɗi paŋ, n’a siiwa a nava, n’a paya a nava, n’a ɵiɓa mini dalam aga e miliŋni edi lai.

⁹Ktai arbaki na ahini a siiwaŋ burini ɓuk, a tika ahi-fuŋ a siŋni ɗa, a na ɗi?

¹⁰Zaw n’a siiwaŋ burini hilif, a sini wala meefeŋ a na ɗi?

¹¹Na ɓa tiki na ki ɗa maafanai, ki siɗi aŋ si wazagai na pɗamai wiiɗi aliki, azi gama Epiki na war fuŋ-n’Alaw aga a siɗi wazagai na pɗamai wiiɗi nagai n’e siiwiŋ ɗa.

¹²Wala paŋ na ki diri ɓa ɗai e ziŋ siki ɗa, tiki lai zi hanɗa siɗi, hanɗa a gadai na wiini Musus gaiɗi ɗai na mini Alaw.

¹³Ki niyi ɗa warni mini hlai na gaini hiɵi, buri ɓa futi na te ka sini bi n’edi ɗa te na buruki, mini hlai bruk lai, n’e niyi warni ɗaw ɗa e ɗa viya lai.

¹⁴Amma mini hlai n’a ka sini suŋfa ɗa a na agwi, futi te na gaini hiɵi lai, nagai n’e niviŋ ɗa e ɗa agwi lai.

¹⁵Ki giɗimi siki wuzaɗi ɗai na mini Alaw z'alasakai, n’e hilisi siki ɗa maini adumai ɵa, amma warɗi n’amlai ɗa e ɗi belemke si virmi.

¹⁶Aga ki siɗiɗi sini aliɗi. Ɗif a rawasi alini luwuŋ zi vin sini luwuŋ zi hedek par ɗi? Zaw alini luwuŋ Fige sini duvuɗvuɗ par ɗi?

¹⁷Luwuŋ na pɗem paŋ a wa ali na pɗamai, luwuŋ na meefeŋ ɗe a wa ali na maafanai lai.

¹⁸Luwuŋ na pɗem a kiɗa a wa ali na maafanai kai, luwuŋ na meefeŋ a kiɗa a wa ali na pɗamai kaalai.

¹⁹Luwuŋ paŋ n’a wa ali na pɗamai kai, aga a ɗukla azumai, a ɵiŋka arni afu,

²⁰nɵa aga ki siɗiɗi ɗa sini aliɗi.

²¹Aga e niyi warɗi paini fuŋ-n’Alaw ɗa e ɗi nagai n’e miɗiŋa ɓa: Epiɗ-ɗai, Epiɗ-ɗai ɗa paŋ kai, sai a ni n’a za dirini Apa na war fuŋ-n’Alaw.

²²Viya aga e miɗiŋa warni mefeŋ ni ɓa: Epiɗ-ɗai, Epiɗ-ɗai, tiyi mi miɗi seŋ na wuze ɗa war yikuku kai ɗi? Mi birgi ksalai edi war yikuku kai ɗi? Mi zi wazagai zi hiila viya yikuku lai kai ɗi?

²³Nɵa aga mu wiyiɗi seŋ ɓa: mu siɗiki ka duk kai, yimi siki edi sa par, tiki na ki zi sda na meefeŋ.

²⁴Buri nɵa, asiya ɗi paŋ n’a ɵina seŋ hanɗa war ma par, n’a za pini lai ɗa, ni aga a za aŋ ɗif zi yel, n’a rga dalamni amai midini huwuŋ.

²⁵Faŋ a ɵa abai, yem zi ki a cosi, smer a vuvuwa a ɵiɓa sini sini dalam hanɗa, amma dalam ɗa a kɵa kai, buri ezini a tora midini huwuŋ.

²⁶Amma asiya ɗi paŋ n’a ɵina seŋ hanɗa ma par, amma a za pini kai ɗa, aga a za aŋ ɗif zi dûûli n’a rga dalamni midini kaikai.

²⁷Faŋ a ɵa abai, yem zi ki a cosi, smer a vuvuwa, a ɵiɓa sini dalam hanɗa, dalam ɗa a kɵa, kɵini a za abai lai.

²⁸Won hlai na Yesu a vada gaini seŋ zi miɗi hanɗa ya, firiɗi ɗai a bunda hiyak burini hitirini.

²⁹Buri a hitriɗi ɗa maini ɗif n’aŋ gaini spak pini nɵa, maiɗi ɗai ɗi n’e ɗû wazagai ɗa nɵa kai.