Read Mousgoum Matewus 8 Bible Online

Matewus 8 - Mousgoum bible

Matewus 8

¹Won hlai n’a niyasi azumai amai midiɗi huwuŋ par ya, firiɗi ɗai viya a tapa pini,

²ɗif zi dugum ktai a halasi, a hurga azumai wuzani a muɗa: Epiɗ-ɗai, na ɓa ku dara ɗa ku bundaŋa hilu.

³A wûti tini a tikiti sini, a muɗa: Mu dara, bunda hilu. Tizaw a bunda hilu war dugumni par.

⁴Yesu a miɗini, ku muɗa hanɗa wiini ɗif kai, amma hala ku siŋka suku wuzani pai si ɓaka, ku za ɓaka na Musus a gada midini lai, aga a za aŋ zaida buriɗi.

⁵Won hlai n’a na niya warɗi Kapernahum, paiɗi askarai na miya ktai pini a halasi sini, a siiwaŋ a muɗa:

⁶Epiɗ-ɗai, ɗifŋa n’a zina pa a na aha veglek, ezini a ɗiya amai kai, a na azumai waŋ, a na sɗa gir viya gara.

⁷Yesu a miɗini: aga mu halaɗi mu zuulaŋ.

⁸Amma paiɗi askarai na miya ktai pini a waya seŋ a muɗa: Epiɗ-ɗai, ta mu kiɗa buri tuku ku niya a haya kai, ku muɗa seŋ ktai bas, ɗifŋa n’a zina pa ɗa aga a zuula.

⁹Buri ta lai mu na azumai piɗi ɗai n’abakai n’e sûwiŋa gaini spak, amma askarai zamai e ɗa azumai pa lai. Mu miɗini li wiini ktai ɓa: hala, a hala; wiini na zamai ɓa: halasi, a halasi; wiini ɗifŋa zi sda ɓa za hanɗa, a zaŋ lai.

¹⁰Amma won hlai na Yesu a ɵina seŋ hanɗa, a bunda hiyak a muɗa siɗi nagai n’e tipi pini: jre, mu miɗiki, warɗi Izrayel tekeɗeɗi mu nava yimi n’abai maini hanɗa nɵa kai.

¹¹Mu miɗiki viya aga e hilisi piɗi futi na dawai par par, piɗi futi na koskoi par lai, aga e simni azumai aŋ simi gaini Abraham gaini Isaak gaini Yakob lai warɗi paini fuŋ-n’Alaw.

¹²Amma aliɗi pai aga e birgiɗi anene war gegeŋ, warni a tuwi gaini hirɗini sesiyeŋ.

¹³Yesu a muɗa sini paiɗi askarai na miya ktai pini ɗa: hala, a za suku pini yimiku. Ɗifni n’a zina pini a zuula warɗi piɵiɗi futi na dama.

¹⁴Won hlai na Yesu a niya aha warni dalamni Peter, a tiliti suwulni Peter azumai waŋ, siɗi a sawa afu.

¹⁵A tetemiti tiɗi, siɗi n’a sawa afu a hiniti, te faka amai te zina pini lai.

¹⁶Amma won hlai na futi te za li koskoi, e kiɗisi ɗai na ksalai aŋ midiɗi sini viya, a birga ksalai edi gaini miɗi ktai, nagai paŋ na ksalai a ziɗi gir a zûûliɗi.

¹⁷Kapai wala na ɗif na mini Alaw Esaya a muɗa aga a va amai, won hlai n’a muɗa: A tika hurufmu paŋ midini, a liba veglek na wimu paŋ lai.

¹⁸Won hlai na Yesu a tala firiɗi ɗai viya a gunaŋ azumai, a sa miɗi buri e bindi anene kata.

¹⁹Ɗif zi ɗû wazagai ktai a halasi a midini: Api zi hitri, mu dara mu tapa puku woɗi paŋ n’aga ku hala.

²⁰Yesu a miɗini: Huɗi ɗa waŋni a na, wala zi ɗifli n’arbani hlai n’amai gutni a na lai, amma Ahini-ɗif ɗa hlai n’a wa midini woni ɗik kaw aŋ kai.

²¹Amma na zamai ktai arbaɗi ɗaini zi hitri, a miɗini, Epiɗ-ɗai, hinaŋa mu hala mu pasi apa tiɓ haw.

²²Amma Yesu a miɗini: tapasi pa, hiniɗi ɗai zi mri e pi ɗai ɗi zi mri.

²³Won hlai n’a niya warni hulum, ɗaini zi hitri e hili pini.

²⁴Berber n’abai a tikasi midini yem-ra n’abai, haa hulum a va gaini mayaw. Amma ni a nafu a weseŋ.

²⁵Ɗaini zi hitri e hilisi sini e ɵiyiŋ amai e miɗi: Epiɗ-ɗai, kurɗiyi kruɗ mi ɗa biɗihi.

²⁶A miɗiɗi: ki hûni buri ma ɗa, tiki na gaini yimi n’agwi? Nɵa a faka amai, a ɓara berber gaini yem-ra n’abai, hlai a bunda ɗiŋ.

²⁷Ɗai hanɗa e bindi hiyak e miɗi: Ɗif hanɗa a ɗif na maɵa maɵa ɗa, na berber gaini yem-ra n’abai a gada pini ɗa?

²⁸Won hlai n’a yima amai mini Dan anene kata sek, midini afti na wiiɗi ɗai na Gadarenekai, ɗai na gaini kɵai midiɗi sulu e niyisi edi warni yeɵ par e hilisi mini, sabapai gara, e hini ɗif a vuga warɗi futi na ɗaw kai.

²⁹E tiki piɗi e ɗûûli e miɗi: na tipiyi gaiku ɗa a maɗa? Tuku Ahini Alaw? Ku halasi aŋ tûrliyi wuzani hlai ɗi?

³⁰Farani hoho n’abai a nafu aŋ suma kuzum edi siɗi gaigai agwi.

³¹Ksalai e siiwi Yesu e miɗi: na ɓa ku dara ku birgiyi edi ɗa, ku hiniyi mi niyi warni farani hoho ɗa.

³²A miɗiɗi: ki hili. E niyisi edi e niyi warni farani hoho. Nɵa, fara paŋ a faka gaini luwi, a yakaɗi amai midini boŋor par azumai warni yem-ra n’abai, a mra agoɗom.

³³Amma ɗai n’e giɗimiŋ, e liwi e hili warni fuŋ n’abai e miɗi labar n’a za ɗa paŋ edi, gaini wala n’a za siɗi ɗai na ksalai aŋ midiɗi ɗa lai.

³⁴Nɵa ɗai na war fuŋ n’abai ɗa paŋ e niyisi edi mini Yesu. Won hlai n’e tiliŋ, e siiwiŋ buri a yima sini edi midini aftiɗi par.